ဖားကန့်မြို့နယ်၊ဆယ်ဇင်းကျေးရွာမှ ရွာသူ၊ရွာသားများ တိုက်ပွဲဖြစ်ပွားနေမှုကြောင့် ဘေးလွတ်ရာသို့ရှောင်တိမ်းနေရ
ကချင်ပြည်နယ်၊ဖားကန့်မြို့နယ်၊ဆယ်ဇင်းကျေးရွာနေ ရွာသူ၊ရွာသားများသည် နစက ၏လုံခြုံရေးအဖွဲ့နှင့် KIA ၊ဒေသခံကာကွယ်ရေးအဖွဲ့တို့ပူးပေါင်းသည့် အဖွဲ့များကြားတွင် ထိတွေ့တိုက်ပွဲများဖြစ်ပွားနေသဖြင့် ဘေးလွတ်ရာသို့တိမ်းရှောင်နေရကြောင်း သိရသည်။
KIA နှင့်ဒေသခံကာကွယ်ရေးအဖွဲ့များပူးပေါင်း၍ သြဂုတ် ၈ ရက်နံနက်ပိုင်းမှစတင်ကာ နစက ၏တပ်စခန်းအားဝင်ရောက်တိုက်ခိုက်ခဲ့ပြီးနောက် သြဂုတ် ၉ ရက်တွင်လည်း ဆယ်ဇင်းကျေးရွာရှိ ရဲစခန်းအား ထပ်မံဝင်ရောက်တိုက်ခိုက်ခဲ့ကြသဖြင့် တိုက်ပွဲများဖြစ်ပေါ်လျက်ရှိခြင်းဖြစ်သည်။
ထိုသို့ တိုက်ပွဲဖြစ်ပွားရာတွင် လက်နက်ကြီးပစ်ခတ်မှုများလည်း ဖြစ်ပေါ်လျက်ရှိ၍ ဆယ်ဇင်းကျေးရွာနေ ရွာသူ၊ရွာသားများမှာ ဟောင်ပါးနှင့်တာမခန်တို့ရှိ ဘုန်းတော်ကြီးကျောင်းများ၊စာသင်ကျောင်းများနှင့်မြေနေရာလွတ်များ၌ ရောက်ရှိခိုလှုံနေကြကြောင်း သိရသည်။
“ဆယ်ဇင်းဘုန်းကြီးကျောင်းမှာ ပိတ်မိနေတဲ့ရွာသူ၊ရွာသားတွေကို ဒီနေ့မနက် ၇ နာရီလောက်က အပစ်အခတ်ရပ်ပြီး ခနထွက်ခွင့်ပေးတယ်လို့သိရတယ် အဲဒီမှာပိတ်မိနေတဲ့လူအရေအတွက်ကအတော်များတယ် လတ်တလောထွက်လာကြတာ လူဦးရေ ၄၀၀ လောက်ရှိတယ် ခနပဲထွက်သွားခွင့်ပြုတဲ့သဘောပေါ့ ရွာထဲမှာကျန်နေတဲ့လူတွေလည်းရှိသေးတယ်”ဟု စစ်ဘေးရှောင်များအား ကူညီပေးနေသူတစ်ဦးကပြောသည်။
အလားတူ ဆယ်ဇင်းကျေးရွာအနီးရှိ ကျေးရွာအချို့မှ ရွာသူ၊ရွာသားများမှာလည်း တိုက်ပွဲဖြစ်ပွားမှုပြင်းထန်လာနိုင်သဖြင့် ကြိုတင်၍ ရှောင်ရှားမှုများပြုလုပ်လျက်ရှိကြောင်း သိရသည်။
“ဆယ်ဇင်းရွာနဲ့နီးတဲ့ရွာကလူတွေလည်း ကြိုပြီးရွှေ့လာကြတာတွေ့တယ် ကျွန်တော်တို့ကတော့ ရသလောက်ကူညီပေးနေပါတယ် တစ်ချို့ကလည်း အမျိုးတွေအိမ်သွားနေကြတာ ကူညီပေးရတာနည်းတယ် ဘုန်းကြီးကျောင်းနဲ့စာသင်ကျောင်းတွေမှာရောက်နေတဲ့လူတွေ မြေနေရာလွတ်မှာယာယီတဲထိုးနေကြတဲ့လူတွေအတွက် တောက်လျှောက်ကူညီပေးနေပါတယ်”ဟု စစ်ဘေးရှောင်ကူညီပေးနေသူတစ်ဦးကပြောသည်။