AFC Women’s Futsal Asian Cup 2025 ခြေစစ်ပွဲ ပွဲရက်နီးကပ်လာသည်နှင့်အမျှ မြန်မာ့လက်ရွေးစင် အမျိုးသမီးဖူဆယ်အသင်း ယနေ့ ဇန်နဝါရီ (၁၁)ရက်၌ လေ့ကျင့်ပြင်ဆင်မှုများ ပြုလုပ်လျှက်ရှိကြောင်း သိရသည်။
မြန်မာလက်ရွေးစင် အမျိုးသမီးဖူဆယ်အသင်းအနေဖြင့် အိမ်ရှင်နိုင်ငံအဖြစ် ဇန်နဝါရီ (၁၅)ရက်မှစတင်၍ တရုတ်၊ ဗီယက်နမ်နှင့် မကာအိုအသင်းတို့ဖြင့် ယှဉ်ပြိုင်ကစားသွားကြရမည်ဖြစ်သည်။
ပွဲစဉ် ဇယားအနေဖြင့် ဇန်နဝါရီ (၁၅)ရက်တွင် ဗီယက်နမ်အသင်း၊ ဇန်နဝါရီ (၁၇)ရက်တွင် တရုတ် (တိုင်ပေ)အသင်း၊ ဇန် နဝါရီ(၁၉)ရက်တွင် မကာအိုအသင်းတို့နှင့် အုပ်စုပွဲစဉ်များအနေဖြင့် ယှဉ်ပြိုင်ကစားသွားရမည်ဖြစ်သည်။
ပြိုင်ပွဲအတွက် ရွေးချယ်ထားသည့် ကစားသမားများစာရင်းတွင် ချောစန္ဒီအောင်(ဂိုး)၊ သရဖီအောင်(ဂိုး)၊ ယဉ်ယဉ်မိုးနိုင် (ဂိုး)၊ ယုမီမီလွင်၊ နန်းဆိုင်မိန်း၊ မေဇင်ဦး၊ ယမင်းသန့်ဇင်၊ ဆုဝါလွင် ၊ ဝတ်ရည်လွင်၊ ယမင်းလွင်၊ မေထက်ပိုင်၊ ဂျိုမိုးညီ၊ ဇင်ငြိမ်းချစ်၊ ဆက်နွယ်နီ၊ နှင်းစန္ဒာလှိုင်၊ သူဇာလှိုင်နှင့် အေး အေးထွေးတို့ကို ရွေးချယ်ထားကြောင်း သိရသည်။
ခြေစစ်ပွဲများကို အိမ်ရှင်နိုင်ငံများအဖြစ် မြန်မာ၊ ထိုင်း၊ အင်ဒိုနီးရှားနှင့် ဥဇဘက်ကစ္စတန်တို့တွင် ကျင်းပသွားမည်ဖြစ်ကာ (၁၉) သင်း ဝင်ရောက်ယှဉ်ပြိုင်မည်ဖြစ်ပြီး (၅) သင်း (၃) အုပ်စု၊ (၄) သင်း (၁) အုပ်စုခွဲ၍ ကျင်းပသွားမည်ဖြစ် ကြောင်း သိရသည်။
ပြိုင်ပွဲတွင် ခြေစစ်ပွဲ အုပ်စု (၄) ခုမှ ထိပ်ဆုံးရပ်တည်မှု (၂ ) သင်းစီ(၈သင်း)နှင့် အုပ်စု (၄)ခုမှ အကောင်းဆုံး အုပ်စု တတိယရအသင်း စုစုပေါင်း (၉)သင်း ခြေစစ်ပွဲ အောင်မြင်မည်ဖြစ်သည်။
၂၀၂၅ အာရှဖလား အမျိုးသမီး ဖူဆယ်ပြိုင်ပွဲကို အိမ်ရှင်အဖြစ် လက်ခံကျင်းပမည့် တရုတ်၊ ၂၀၁၈ ပြိုင်ပွဲ ချန်ပီယံ အီရန်နှင့် ဒုတိယရ ဂျပန်တို့မှာ တိုက်ရိုက်ဝင်ခွင့်ရခဲ့ပြီး ခြေ စစ်ပွဲအောင် (၉)သင်း၊ စုစုပေါင်း အသင်း (၁၂) သင်းဖြင့် မေ(၇) မှ (၁၈) ရက်အထိ ကျင်းပသွားမည်ဖြစ် သည်။