ပြိုင်ဘက် BG Pathum United (ထိုင်း) အသင်း၏ နိုင်ငံခြားသား ကစားသမားများနှင့် အရေးကြီး ကစားသမားများ၏အကြောင်း သေချာလေ့လာထားပြီး ရဲရဲရင့်ရင့် ကစားသွားမည်ဟု ရှမ်းယူနိုက်တက် နည်းပြဖြစ်သူ ဟီရိုကီ အိုနိုက ပြောသည်။
ယနေ့ ဇန်နဝါရီ (၂၁)ရက် က ရန်ကုန်မြို့ သုဝဏ္ဏအားကစားကွင်း သတင်းစာရှင်းလင်းပွဲခန်းမ၌ ပြုလုပ်သည့် ရှမ်းယူနိုက်တက်အသင်းနှင့် BG Pathum United (ထိုင်း) အသင်းတို့၏ Asean Club Championship Shopee Cup 2024 – 25 ပြိုင်ပွဲ ပွဲကြိုသတင်းစာရှင်းလင်းပွဲတွင် ထိုသို့ ပြောကြား ခဲ့ခြင်းဖြစ်သည်။
“အသင်း နှစ်သင်းကြားက ကွာခြားမှုတွေကို သိပါတယ်။ ဒါပေမဲ့ ကလပ်အသင်း ရပ်တည်မှုအတွက် အကောင်းဆုံး ကစားသွားဖို့ ဆုံးဖြတ်ထားပြီးသားပါ။ BG အသင်းရဲ့ နိုင်ငံခြားသား ကစားသမားတွေ၊ အရေးကြီး ကစားသမားတွေအကြောင်း သေချာ လေ့လာထားပြီး ပြင်ဆင်ထားတယ်။ ရဲရဲရင့်ရင့် ကစားမယ်။ တတ်နိုင်သလောက် ကြိုးစားမယ်။ အမှတ်ရဖို့ ပစ်မှတ်ထားနေပါတယ်။”ဟု ဆိုသည်။
BG Pathum United (ထိုင်း)၏ နည်းပြဖြစ်သူ Supachai Komsilp ကလည်း ” ရှမ်းယူနိုက်တက်အသင်းကို လေးစားမှု အပြည့်ရှိပါတယ်။ အဓိက ကစားသမား အားလုံး ခေါ်လာပါတယ်။ ရှမ်းယူနိုက်တက် အသင်းမှာ နိုင်လိုစိတ်ပြင်းထန်တဲ့ ကစားသမားတွေ ရှိတာတွေ့ရတယ်။ သူတို့ အသင်းရဲ့ PSM ပွဲရယ်၊ တီရန်ဂါနူး ပွဲရယ်ကို Analysis လုပ်ပြီး လေ့ကျင့်ထားတယ်။”ဟု ဆိုသည်။
မနက်ဖြန် ဇန်နဝါရီ(၂၂)ရက် ၊ ညနေ (၆) နာရီအချိန်တွင် ရန်ကုန်မြို့ သုဝဏ္ဏကွင်းအတွင်း အဆိုပါ အသင်း (၂) သင်း ယှဉ်ပြိုင်ကစားသွားကြမည်ဖြစ်သည်။
ACC အုပ်စုအဆင့် ပွဲစဉ် (၃) ပွဲစီ ကစားပြီးချိန်၌ ရှမ်းယူနိုက်တက်အသင်းသည် ရမှတ် (ဝ) မှတ်ဖြင့် အဆင့် (၆)၊ BG Pathum က ရမှတ် (၅) မှတ် ဖြင့် အဆင့် (၃)၌ အသီးသီး ရပ်တည်နေကြသည့်အသင်းများဖြစါသည်။
ရှမ်းယူနိုက်တက်အသင်းသည် အုပ်စု (A)အတွင်း ကျရောက်နေပြီး၊ ထိုင်းကလပ် BG Pathum United အသင်း ၊ မလေးရှားကလပ် Terengganu အသင်း၊ အင်ဒိုနီးရှားကလပ် PSM မာကာဆာ အသင်း၊ ဗီယက်နမ်ကလပ် Dong A Thanh Hoa အသင်း ၊ ကမ္ဘောဒီးယားကလပ် Svay Rieng အသင်းတို့နှင့် ယှဉ်ပြိုင်နေရခြင်းဖြစ်သည်။
ယခု ၂၀၂၅ ခုနှစ် ၊ ဇန်နဝါရီ (၈) ရက်တွင် မလေးရှားကလပ် Terengganu အသင်းကို အိမ်ကွင်း၌ လည်းကောင်း ၊ ဇန်နဝါရီ (၂၂) ရက်တွင် ထိုင်းကလပ် BG Pathum United အသင်းကို အိမ်ကွင်း၌လည်း ကောင်း၊ ဖေဖော်ဝါရီ (၅) ရက်တွင် ကမ္ဘောဒီးယားကလပ် Svay Rieng အသင်းကို အဝေးကွင်း၌ လည်းကောင်း အသီးသီးသွားရောက်ယှဉ်ပြိုင်ကစားရမည် ဖြစ်သည်။