ရန်ကုန်တိုင်းပြည်သူ့အငှားအိမ်ရာစီမံကိန်းကြီး ကြပ်ရေးအဖွဲ့ ဥက္ကဋ္ဌ၊ ရန်ကုန်မြို့တော်ဝန် ဦးဗိုလ်ဌေးမှ နိုဝင်ဘာ ၂၃ ရက်(ယနေ့)နံနက် ၇ နာရီက YESC နှင့်မြို့ပြနှင့်အိမ်ရာဖွံ့ဖြိုးရေးဦးစီးဌာနမှ တာဝန်ရှိသူများအား တွေ့ဆုံစဥ်မှာကြားခဲ့ခြင်းဖြစ်သည်။
ဒဂုံမြို့သစ်(တောင်ပိုင်း)မြို့နယ်၊အမှတ်(၇)မြို့ ပတ်လမ်းတွင် ရန်ကုန်တိုင်းပြည်သူ့အငှားအိမ်ရာ တည်ဆောက်ရေးစီမံကိန်း၏ ပထမအဆင့်လုပ်ငန်းများပြီးစီးတော့မည်ဖြစ်ရာ လျှပ်စစ်ဓာတ်အားလိုအပ်ချက်နှင့်ပတ်သက်၍ တွေ့ဆုံခဲ့ခြင်းဖြစ်သည်။
“ပြည်သူ့အဌားအိမ်ရာမှာ ဓာတ်အားခွဲရုံတည် ဆောက်နေချိန် တိုက်ခန်းမှာနေထိုင်မယ့်သူတွေ အခက်အခဲမရှိစေဖို့ ယာယီဓာတ်အားလိုင်းသွယ်တန်းပြီး လျှပ်စစ်မီးရရှိဖို့ကို ဆောင်ရွက်ရပါမယ်” ဟု ရန်ကုန်မြို့တော်ဝန်ဦးဗိုလ်ဌေးကမှာကြားခဲ့သည်။
မြို့ပြနှင့်အိမ်ရာဖွံ့ဖြိုးရေးဦးစီးဌာန၊ရန်ကုန်တိုင်းညွှန်ကြားရေးမှူး ဒေါ်အေးအေးမွန်က စီမံကိန်းဧရိ ယာအတွင်း လျှပ်စစ်ဓာတ်အားရရှိရေးလုပ်ငန်းများကိုတင်ဒါခေါ်ယူခဲ့ပြီးဖြစ်ကာ ဓာတ်အားခွဲရုံတည်ဆောက်ခြင်းလုပ်ငန်းမှာ အချိန်ကာလကြာမြင့်ဦးမည်ဖြစ်၍ အဆောက်အဦးများအတွက် လျှပ်စစ်ဓာတ်အားရရှိရန် အခက်အခဲဖြစ်နေသည်ဟု ရှင်းလင်းတင်ပြခဲ့သည်။
ထို့ပြင် YESC အမှုဆောင်အရာရှိချုပ် ဦးကျော်သူကလည်း ဓာတ်အားခွဲရုံတည်ဆောက်ရေးကာလကြာမြင့်ချိန်၊ယာယီဓာတ်အားလိုင်းသွယ်တန်းပေးနိုင်မည့် ဓာတ်အားခွဲရုံများနှင့်ပေးနိုင်မည့် ပမာဏများကို ရှင်းလင်းတင်ပြခဲ့သည်။
ပြည်သူ့အငှားအိမ်ရာအိမ်ခန်းပေါင်း ၁၀၀၀၀ စီမံကိန်းအား နေရေးအခက်အခဲရှိသည့် နိုင်ငံ့ဝန် ထမ်းများ၊အငြိမ်းစားဝန်ထမ်းများနှင့်ဝင်ငွေနည်းပြည်သူများ စိတ်အေးချမ်းသာစွာနေထိုင် နိုင်ရန် ရည်ရွယ်၍ နေပြည်တော်၊ရန်ကုန်နှင့်မန္တလေးမြို့တို့တွင် အကောင်အထည်ဖော်ဆောင်ရွက်နေခြင်းဖြစ်သည်။
ရန်ကုန်တိုင်းရှိ ပြည်သူ့အဌားအိမ်ရာစီမံကိန်းအား မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်းချုပ်(MCEF)နှင့်မြန်မာနိုင်ငံလိုင်စင်ရ ကန်ထရိုက်တာများအသင်းချုပ်(MLCA)တို့က တာဝန်ယူဆောက်လုပ်လျက်ရှိသည်။
