မြန်မာနိုင်ငံအတွင်းသို့ ပြည်ပခရီးသွားဧည့်သည်များ ဝင်ရောက်လာနိုင်ရန်အတွက် ဖြေလျှော့မှုများ ပြုလုပ်သင့်ကြောင်းမြန်မာနိုင်ငံခရီးသွားလုပ်ငန်းရှင်များအသင်းမှ နာယကအတွင်းရေးမှူး ဦးသက်လွင်တိုးက ပြောသည်။
“ ပြည်ပကဧည့်သည်တွေကလည်း ထင်သလောက်မလာသေးဘူးပေါ့။ အဲဒီတော့ဖြေလျှော့မှုတွေက လုပ်ရပါမယ်။ လုံခြုံမှုကိုလည်းပိုပြီးမြှင့်တင်ပေးဖို့လိုပါမယ်။ ဖြေလျှော့မှုတွေဆိုတဲ့နေရာမှာ carrier free tourism ဆိုပြီးကြွေးကြော်နေတာရှိပါတယ်။ သက်ဆိုင်ရာဝန်ကြီးဌာနက တစ်ကယ်တော့ carrier ဟာ ပြည်ဝင်ဗီဇာတွေကို ကန့်သတ်တာထားတာတွေရယ်။ အာမခံတွေကိုမယူမနေရဆိုတဲ့ အကြီးမားဆုံးသော carrier ကြီးပါ။ ဘာလို့လဲဆိုတော့ ပြည်ပကလာတဲ့ဧည့်သည်တွေဟာ ကိုဗစ်အတွက်ပဲဖြစ်ဖြစ် သူတို့ရဲ့ခရီးသွားအာမခံတွေက အခိုင်အမာပါလာတဲ့နိုငံတွေများပါတယ်။ မပါပဲနဲ့လည်းမြန်မာပြည်ကိုသူတို့မသွားကြပါဘူး။ အဲဒါကိုသိရှိဖို့လိုပါတယ်။ အဲဒါကိုထပ်ပြီးတော့ ယူရင် အဲဒီပေါ်မှာသူတို့က စိတ်ခုသွားပြီးတော့ မလာတော့ဘူးပေါ့။ မလာတော့လည်းဒီကလူတွေ အလုပ်လက်မဲ့တွေ ပိုများကုန်တာပေါ့”ဟု၎င်းကဆိုသည်။
လက်ရှိတွင် ပြည်ပခရီးသွားဧည့်သည်တွေထက် ပြည်တွင်းခရီးသွားလုပ်ငန်းမှာ ပိုပြီးတိုးတက်နေကြောင်း၊ အများဆုံးသွားရောက်သည့် ခရီးစဉ်ဒေသများမှာ ပင်လယ်ကမ်းခြေ၊ ပုဂံ၊ပြင်ဦးလွင်သို့ အများဆုံးသွားရောက်ပြီး ကျိုက်ထီးရိုးနှင့် အင်းလေးဒေသခရီးစဉ်များကို လုံခြုံရေးအခြေအနေကြောင့် သွားရောက်မှုနည်းပါးကြောင်းသိရသည်။
“ ပြည်တွင်းလေယာဉ်တွေကလည်း ဧည့်မရှိတော့ မဆွဲနိုင်တော့ဘူး။ ဒေသအချို့ကိုသာ ပြေးဆွဲနေတာပေါ့။ဒါတောင်တစ်ပါတစ်ကြိမ်ပဲ ပြေးနေတာ။ နိုင်ငံခြားဧည့်သည်တွေက ဒါတွေကိုကြည့်နေတာလေ။ ခရီးစဉ်တွေ မငြိမ်သေးသ၍ လေယာဉ်တွေက ခရီးစဉ်တွေပျက်ချင်ပျက်မယ်။ လုပ်ချင်သလိုလုပ်နေမယ်ဆိုရင်။ ဈေးတွေကလည်း မြင့်ချင်မြင့်နေမယ်။ ဒီလိုသာဖြစ်နေရင် ခရီးသွားလုပ်ငန်းက ပြန်လည်ရှင်သန်နိုးထလာနိုင်ဖို့ တော်တော်အခွင့်အလမ်းနည်းသွားပြီ”ဟု ၎င်းကဆက်လက်ပြောကြားခဲ့သည်။
လက်ရှိတွင် ၂၀၂၃ ခုနှစ်၏ နှစ်လအတွင်း ပြည်တွင်းသို့ ထိုင်းနိုင်ငံမှ ခရီးသွားဧည့်သည်အများဆုံး လာရောက်လည်ပတ်မှုရှိခဲ့ပြီး အနောက်နိုင်ငံခရီးသွားဧည့်သည်မှာ နည်းနေကြောင်း၊ ကိုဗစ်ကာလကတည်းက ၂ နှစ်ကျော်ကြာ ရပ်နားထားရသည့် ခရီးသွားလုပ်ငန်းသည် ပြီးခဲ့သည့်နှစ် ခရီးသွားရာသီအစဖြစ်သည့် အောက်တိုဘာလကစပြီး ပြည်တွင်း၊ ပြည်ပခရီးသွား အနည်းငယ် တက်လာခဲ့ကြောင်း သိရသည်။
photo credit – Lucky Treasure Travels Ltd