ပြည်ထောင်စုဝန်ကြီးဦးတင်အောင်စန်းနှင့် ရုရှားနိုင်ငံ လုံခြုံရေးကောင်စီအတွင်းရေးမှူးတို့တွေ့ဆုံ

အချုပ်အခြာအာဏာပိုင်နိုင်ငံများ၏ ပြည်တွင်းရေးကို ဝင်ရောက်စွက်ဖက်ရန်ကြိုးပမ်းမှုများကိုတန်ပြန်ခြင်းအားဆွေးနွေး

အမျိုးသားလုံခြုံရေးဆိုင်ရာအကြံပေးပုဂ္ဂိုလ် နိုင်ငံ တော်သမ္မတရုံးဝန်ကြီးဌာန(၁)ပြည်ထောင်စုဝန်ကြီး ဦး တင်အောင်စန်းနှင့် ရုရှားနိုင်ငံလုံခြုံရေးကောင်စီအတွင်းရေးမှူး မစ္စတာ ဆာဂေးရွှိုင်းဂူတို့ ဖေဖော်ဝါရီ ၂ ရက်က နေပြည်တော်၌ တွေ့ဆုံခဲ့ကြသည်။

တွေ့ဆုံစဉ် လုံခြုံရေးကောင်စီများ၊ အထူးတပ်ဖွဲ့များနှင့် တရားဥပဒေစိုးမိုးရေး အေဂျင်စီများကြား ပူးပေါင်းဆောင်ရွက်မှု၊ ဆိုက်ဘာရာဇဝတ်မှုတိုက်ဖျက်ရေးအပါ အဝင် သတင်းအချက်အလက်လုံခြုံရေးနယ်ပယ်တွင် ပူးပေါင်းဆောင်ရွက်မှုတို့ကို ဆွေးနွေးခဲ့ကြသည်။

ထို့ပြင် အချုပ်အခြာအာဏာပိုင်နိုင်ငံများ၏ ပြည်တွင်းရေးကိုဝင်ရောက်စွက်ဖက်ရန် ကြိုးပမ်းမှုများကို တန် ပြန်ခြင်း၊ နှစ်နိုင်ငံပူးပေါင်းဆောင်ရွက်မှုဆိုင်ရာများနှင့် လေ့ကျင့်ရေးသင်တန်းများ ပံ့ပိုးကူညီပေးခြင်းဆိုင်ရာတို့ကိုလည်း ဆွေးနွေးခဲ့ကြသည်။

ထို့နောက် ရုရှားနိုင်ငံလုံခြုံရေးကောင်စီအတွင်းရေးမှူးသည် မာရဝိဇယဗုဒ္ဓရုပ်ပွားတော်မြတ်ကြီးအားဖူးမြော်ကြည်ညိုပြီး ညပိုင်းတွင် ပြည်ထောင်စုဝန်ကြီးဦးတင်အောင်စန်းမှ ဂုဏ်ပြုညစာစားပွဲဖြင့်တည်ခင်းဧည့်ခံသည်။

ရုရှားနိုင်ငံလုံခြုံရေးကောင်စီအတွင်းရေးမှူးဦးဆောင်သောကိုယ်စားလှယ်အဖွဲ့တွင်ပါဝင်သော ရုရှားနိုင်ငံ ဒစ်ဂျစ်တယ်ဖွံ့ဖြိုးတိုးတက်ရေး၊ ဆက်သွယ်ရေးနှင့် မီဒီယာဝန်ကြီးဌာန ဒု-ဝန်ကြီး Mr. Andrey Zarenin သည် ပို့ဆောင်ရေးနှင့်ဆက်သွယ်ရေးဝန်ကြီးဌာန ဒု-ဝန်ကြီး ဦးသက်ဝင်းအောင်၊ ရုရှားပြည်ထဲရေးဝန်ကြီးဌာန ဒု- ဝန်ကြီး Mr. Igor Zubov နှင့် ရုရှားနိုင်ငံအမျိုးသားအစောင့်တပ်ဖွဲ့ ဒု-အကြီးအကဲ Mr. Oleg Plohoy တို့သည် မြန်မာနိုင်ငံရဲတပ်ဖွဲ့ ရဲချုပ် ဒု-ရဲဗိုလ်ချုပ်ကြီးဝင်းဇော်မိုးတို့နှင့် တွေ့ဆုံဆွေးနွေးမှုများပြုလုပ်ခဲ့ကြသည်။

ထို့ပြင် ပြည်ထဲရေးဝန်ကြီးဌာနမှ ရဲမှူးချုပ်ဇော်လင်းထွန်းနှင့် ရုရှားငွေကြေးစောင့်ကြည့်ရေးဖက်ဒရယ်အဖွဲ့ ဒု-အကြီးအကဲ Mr. Evgeny Gileta ၊ သိပ္ပံနှင့်နည်းပညာဝန်ကြီးဌာန အမြဲတမ်းအတွင်းဝန် ဒေါက်တာစိုင်းကျော်နိုင်ဦးနှင့် ရုရှားနိုင်ငံပိုင် အဏုမြူစွမ်းအင်ကော်ပိုရေးရှင်း Rosatom  နိုင်ငံတကာစီမံကိန်းများဌာန အကြီးအ ကဲ Ms. Marina Belyaeva တို့လည်းတွေ့ဆုံဆွေးနွေးခဲ့ကြသည်။