ပြည်ထောင်စုလွှတ်တော်က အရေးပေါ်အခြေအနေကြေညာခြင်းနှင့် စစ်အုပ်ချုပ်ရေးအမိန့်ထုတ်ပြန်ခြင်းဆိုင်ရာ အဆိုအား အတည်ပြု

ယနေ့ကျင်းပသည့် ပြည်ထောင်စုလွှတ်တော်အစည်းအဝေးတွင် ပြည်ထောင်စုရှေ့နေချုပ် ဒေါက်တာသီတာဦး တင်သွင်းထားသော နိုင်ငံတော်သမ္မတရုံး၏ ဥပဒေကဲ့သို့ အာဏာတည်သော အမိန့်အမှတ် (၁/၂၀၂၆) အရ အရေးပေါ်အခြေအနေကြေညာခြင်းနှင့် အမိန့်အမှတ် (၂/၂၀၂၆) အရ စစ်အုပ်ချုပ်ရေးအမိန့်ထုတ်ပြန်ခြင်းတို့နှင့် စပ်လျဉ်းသည့် အဆိုကို အတည်ပြုကြောင်း ကြေညာခဲ့သည်။

ပြီးခဲ့သည့် ဇွန်လ ၄ ရက်က ဥပဒေရေးရာဝန်ကြီးဌာန၏ ပြည်ထောင်စုဝန်ကြီးနှင့် ပြည်ထောင်စုရှေ့နေချုပ် ဒေါက်တာသီတာဦးက မြို့နယ် (၆၀) တွင် အရေးပေါ်အခြေအနေကြေညာခြင်းနှင့် စစ်အုပ်ချုပ်ရေးအမိန့်ထုတ်ပြန်ခြင်းတို့နှင့် ပတ်သက်၍ ပြည်ထောင်စုလွှတ်တော်၏ အတည်ပြုချက်ရရှိနိုင်ရန် အဆိုတင်သွင်းခဲ့ခြင်းဖြစ်သည်။

အဆိုပါ အဆိုအပေါ် ယနေ့ ဇွန်လ ၉ ရက်တွင် ကျင်းပသည့် တတိယအကြိမ် ပြည်ထောင်စုလွှတ်တော် ဒုတိယပုံမှန်အစည်းအဝေး၌ လွှတ်တော်ကိုယ်စားလှယ် (၄) ဦးက ဆွေးနွေးခဲ့ကြသည်။

ဝန်းသိုမဲဆန္ဒနယ်မှ ဦးစိုးပိုင်က အဆိုအား အတည်ပြုပေးရန် ထောက်ခံဆွေးနွေးခဲ့ပြီး၊ ငါန်းဇွန်မဲဆန္ဒနယ်မှ ဦးလှမင်းကလည်း အရေးပေါ်အခြေအနေကြေညာခြင်းနှင့် စစ်အုပ်ချုပ်ရေးအမိန့်ကို ကြိုဆိုထောက်ခံကြောင်း ဆွေးနွေးခဲ့သည်။ ထို့ပြင် ငါန်းဇွန်မြို့နယ်အတွင်း စစ်အုပ်ချုပ်ရေးအမိန့်မှ ကင်းလွတ်နိုင်ရေးအတွက် လုံခြုံရေးလုပ်ငန်းများကို ပိုမိုထိရောက်စွာ ဆောင်ရွက်ပေးရန် အကြံပြုခဲ့သည်။

တောင်တွင်းကြီးမဲဆန္ဒနယ်မှ ဒေါက်တာကျော်ဆွေကလည်း အဆိုကို ထောက်ခံဆွေးနွေးခဲ့ပြီး အရေးပေါ်အခြေအနေကြေညာခြင်းနှင့် စစ်အုပ်ချုပ်ရေးအမိန့်ကျင့်သုံးခြင်းတို့သည် အုပ်ချုပ်ရေးယန္တရား ပုံမှန်အခြေအနေသို့ အမြန်ဆုံးပြန်လည်ရောက်ရှိစေရေး၊ တရားဥပဒေစိုးမိုးရေး ပြန်လည်တည်ဆောက်နိုင်ရေး၊ ပြည်သူများ၏ လုံခြုံရေးကို အာမခံနိုင်ရေးနှင့် ရေရှည်ငြိမ်းချမ်းရေးအတွက် လိုအပ်သည့် အခြေခံအုတ်မြစ်များ ဖော်ဆောင်နိုင်ရေးတို့အတွက် ရည်ရွယ်ကြောင်း ပြောကြားခဲ့သည်။

ထို့အပြင် ဧရာဝတီတိုင်းဒေသကြီး ကိုယ်စားလှယ်အမှတ် (၅) ဦးထိန်လင်းကလည်း အရေးပေါ်အခြေအနေကြေညာခြင်းနှင့် စစ်အုပ်ချုပ်ရေးအမိန့်သည် ပြည်သူလူထုအား ကန့်သတ်ပိတ်ပင်ရန်မဟုတ်ဘဲ ရေရှည်အေးချမ်းသာယာရေးနှင့် ဖွံ့ဖြိုးတိုးတက်ရေးအတွက် အကာအကွယ်ပေးနိုင်ရန် ဆောင်ရွက်ခြင်းဖြစ်ကြောင်း ထောက်ခံဆွေးနွေးခဲ့သည်။

ထို့နောက် နိုင်ငံတော်သမ္မတရုံး၏ ဥပဒေကဲ့သို့ အာဏာတည်သော အမိန့်အမှတ် (၁/၂၀၂၆) နှင့် အမိန့်အမှတ် (၂/၂၀၂၆) အပြင် ယင်းအမိန့်များ၏ အာဏာတည်တံ့မှု အချိန်ကာလသတ်မှတ်ချက်များနှင့် စပ်လျဉ်း၍ ပြည်ထောင်စုလွှတ်တော်၏ သဘောတူညီချက်ရရှိခဲ့သဖြင့် အဆိုပါ အမိန့်များနှင့် အချိန်ကာလသတ်မှတ်ချက်များကို ပြည်ထောင်စုလွှတ်တော်က အတည်ပြုကြောင်း ကြေညာခဲ့သည်။