ပြည်တွင်းဆီစက်များမှ ထွက်ရှိသည့် ကြိတ်ဖတ်များကိုဈေးနှုန်းဆွဲတင်ခြင်းနှင့် သိုလှောင်ထားမှုများ မပြုလုပ်ရန် သတိပေး

တိရစ္ဆာန်အစာအဖြစ် အသုံးပြုနေသည့် ကြိတ်ဖတ်များ ဈေးနှုန်းမြင့်တက်မှုကြောင့် မွေးမြူရေးလုပ်ငန်းများအတွက် လိုအပ်သည့်ကြိတ်ဖတ်များကို ပြည်ပမှတင်သွင်းရန်တောင်းဆိုလာနိုင်သဖြင့် ပြည်တွင်းဆီစက်များအနေဖြင့်ကြိတ်ဖတ်များကို ဈေးနှုန်းဆွဲတင်ခြင်းနှင့် သိုလှောင်မှုများမပြုလုပ်ရန် မြန်မာနိုင်ငံဆီစက်ပိုင်ရှင်များအသင်းမှ သတိပေးထုတ်ပြန်ထားသည်။

ပြည်တွင်းဆီစက်များမှ ထွက်ရှိသည့် ကြိတ်ဖတ်(ပဲ၊ နှမ်း၊ နေကြာ၊ မုံညင်း၊ ပန်းနှမ်း၊ ပဲပုတ်)များကို တိရစ္ဆာန်အစာအဖြစ်အသုံးပြုနေပြီး ပြည်တွင်းမွေးမြူရေးလုပ်ငန်းများက အဓိကဝယ်ယူနေခြင်းဖြစ်သည်။

လက်ရှိတွင် ပြည်ပမှ ပဲပုတ်ဖတ်များကို တင်သွင်းခွင့်ပြုထားပြီး ကြိတ်ဖတ်များ လုံလောက်စွာ မထုတ်လုပ်နိုင်ခြင်းနှင့် ဝယ်ယူရန် ခက်ခဲလာပါက မွေးမြူရေးလုပ်ငန်းရှင်များအနေဖြင့် ပြည်ပမှကြိတ်ဖတ်များကိုတင်သွင်းရန် တောင်းဆိုမှုများရှိလာနိုင်ကြောင်း မြန်မာနိုင်ငံဆီစက်ပိုင်ရှင်များ အသင်းက ဆိုသည်။

ပြည်တွင်းဆီစက်များမှထွက်ရှိသည့် ကြိတ်ဖတ်များ ဈေးနှုန်းမှာ ယခင်က တစ်ပိဿာ ကျပ် (၄၀၀၀) သာ ရှိခဲ့ရာမှ လက်ရှိတွင် ကျပ် (၆၀၀၀)အထိ မြင့်တက်လျက်ရှိပြီး ဝယ်ယူရန်လည်း အခက်အခဲများရှိနေကြောင်း သိရသည်။

ဆီကြိတ်ဖတ်များ ဈေးနှုန်းကြီးမြင့်လာခြင်းဖြင့် စားသုံးသူပြည်သူများစားသုံးနေရသည့် အသား၊ ငါး၊ ဥ၊ နို့ဈေးများလည်း ကြီးမြင့်လာနိုင်ကာ ပြည်တွင်းရှိတိရိစ္ဆာန်အစာလိုအပ်ချက်ရှိလာမှုကြောင့် ပြည်ပမှ ပဲပုတ် ဖတ်များတင်သွင်းရသည့် အခြေအနေသို့ရောက်ရှိလာနိုင်မည်ဖြစ်သည်။

ထို့ကြောင့် ပြည်တွင်းဆီစက်များအနေဖြင့် ကြိတ်ခွဲထွက်ရှိလာသော ကြိတ်ဖတ်များကို ကုန်ချိန်များစွာသိုလှောင်ထားခြင်း၊ ဈေးနှုန်းကြီးမြင့်အောင်လုပ်ဆောင်ခြင်းများ မပြုလုပ်ကြရန် မြန်မာနိုင်ငံဆီစက်ပိုင်ရှင်များအသင်းမှ အသိပေးထုတ်ပြန်ထားသည်။