ပျံသန်းဝင်ရောက်လာသည့် တရုတ်စစ်လေယာဉ်များအား ထိုင်ဝမ်မှ ဂျက်လေယာဉ်များစေလွှတ်ကာ သတိပေး
ထိုင်ဝမ်ကျွန်း၏တောင်ပိုင်းနှင့် ပစိဖိတ်သမုဒ္ဒရာအတွင်းရှိ ၄င်း၏လေကြောင်းရန်ကာကွယ်ရေးဇုန်တွင်းသို့ ပျံသန်းလာသောတရုတ် ဗုံးကြဲလေယာဉ်များအပါအဝင် တရုတ်လေယာဉ် ၂၉ စင်းအား သတိပေးရန် ထိုက်ဝမ်ကဂျက်လေယာဉ်များ စေလွှတ်ခဲ့ကြောင်း သိရသည်။
ယခုခေါက်ပျံသန်းခဲ့သော တရုတ်မစ်ရှင်၌ တိုက်လေယာဉ် ၁၇ စင်းနှင့် H-6 ဗုံးကြဲလေယာဉ် ခြောက်စင်းတို့အပြင် ရေဒါနှင့် ရေဒီယီုစနစ်ဖျက် လျှပ်စစ်သံလိုက်ရောင်ခြည်သုံး လေယာဉ်၊ ရေငုပ်သင်္ဘောဖျက် လေယာဉ်နှင့် ဝေဟင်ဆီဖြည့်လေယာဉ်များ ပါဝင်ကြောင်း ထိုင်ဝမ်ကာကွယ်ရေး ဝန်ကြီးဌာနက ပြောကြားခဲ့သည်။
ထိုင်ဝမ်သည် တရုတ်လေယာဉ်များအား ၎င်း၏ပိုင်နက်မှ ထွက်သွားရန် သတိပေးသည့်အနေဖြင့် တိုက်လေယာဉ်များကို စေလွှတ်ခဲ့ပြီး ၎င်းတို့၏ လမ်းကြောင်းများကို စောင့်ကြည့်နေကြောင်း ဝန်ကြီးဌာနက ပြောကြားခဲ့သည်။
တရုတ်လေယာဉ်အချို့သည် ထိုင်ဝမ်နှင့် ဖိလစ်ပိုင်အား ပိုင်းခြားထားသည့် ဘာရှီ ရေလက်ကြားသို့ပျံသန်းခဲ့ပြီး တရုတ်နိုင်ငံဘက်သို့ပြန်မလှည့်မီ ပစိဖိတ်သမုဒ္ဒရာအတွင်းသို့ ဝင်ရောက်ခဲ့ကြောင်း ကာကွယ်ရေးဝန်ကြီးဌာနက ပေးထားသည့်မြေပုံအရ သိရသည်။
မေလ ၃၀ ရက်၌ တရုတ်လေယာဉ်အစီး ၃၀၊ ဇန်နဝါရီတွင်လည်း လေယာဉ် ၃၉ စင်း ထိုင်ဝမ်၏ လေကြောင်းကာကွယ်ရေးသတ်မှတ်ဇုန် (ADIZ) သို့ဝင်ရောက်ပျံသန်းခဲ့သည်။
ယင်းကဲ့သို့တရုတ်၏ စစ်ရေးလှုပ်ရှားမှုများကို ထိုင်ဝမ်က “မီးခိုးရောင်ဇုန်” စစ်ပွဲဟုအမည်ပေးထားသည်။
ယခုကိစ္စနှင့်ပတ်သပ်၍တရုတ်ဘက်မှ ချက်ချင်း မှတ်ချက်ပေးခြင်းမျိုး မရှိပေ။ယခင်ကတော့ နိုင်ငံ၏ အချုပ်အခြာအာဏာကို ကာကွယ်ရန် ရည်ရွယ်သည့် စစ်ရေးလေ့ကျင့်မှုဟု တရုတ်ဖက်က ပြောကြားခဲ့ဖူးသည်။
တရုတ်နိုင်ငံသည် ထိုင်ဝမ်နှင့်မျက်နှာချင်းဆိုင်တွင်ရှိသော တရုတ်ပြည်နယ်ကို အစွဲပြု၍ အမည်ပေးထားသော ၎င်း၏ တတိယမြောက် လေယာဉ်တင်သင်္ဘော Fujian ကို ပြီးခဲ့သည့်သောကြာနေ့တွင်ရေချခဲ့သည်။
Source: Aljazeera