နစက ဥက္ကဋ္ဌသည် မေ ၂၁ ရက်နံနက်ပိုင်းက ရန်ကုန်တိုင်းရှိ ပဲခူးမြစ်ကူးတံတား(သန်လျင်တံတားအမှတ် -၃)တည်ဆောက်ရေးစီမံကိန်းနှင့်မြန်မာ- ကိုရီးယားချစ်ကြည်ရေး (ဒလ)တံတားစီမံကိန်း လုပ်ငန်းဆောင်ရွက်ပြီးစီးမှုများကို ကြည့်ရှုစစ်ဆေးခဲ့သည်။
သာကေတမြို့နယ်နှင့်သန်လျင်မြို့နယ်တို့ကို ဆက်သွယ်တည်ဆောက်ထားသည့် ပဲခူးမြစ်ကူးတံတား(သန်လျင်တံတားအမှတ်-၃)တည်ဆောက်ရေးစီမံကိန်းအား နစက ဥက္ကဋ္ဌမှကြည့်ရှုစစ်ဆေးစဥ် စီမံကိန်းတွင်အသုံးပြုသည့် သံနှင့်သံမဏိပစ္စည်းများဆားငန်ရေဒဏ်ခံနိုင်ရေးနှင့်စံချိန်စံညွှန်းကိုက်ညီရေးတို့ကို စနစ်တကျဆောင်ရွက်ရန် စီမံကိန်းအပိုင်းအလိုက်ဆောင်ရွက်၍ရသည့်လုပ်ငန်းများကို ကြိုတင်ပြီးစီးအောင်ဆောင်ရွက်ပြီး စီမံကိန်းတစ်ခုလုံးသတ်မှတ်ကာလအတွင်းပြီးစီးရေးအတွက်ဆောင်ရွက်သွားရန်မှာကြားခဲ့သည်။
ပဲခူးမြစ်ကူးတံတား(သန်လျင်တံတားအမှတ်-၃) တည်ဆောက်ပြီးစီးပါက သံလျင်တံတားအမှတ် -၁ တွင်ယာဉ်ကြောပိတ်ဆို့မှုများကို ဖြေရှင်းပေးနိုင်မည်ဖြစ်ကာ သီလဝါအထူးစီးပွားရေးဇုန်ကို အကြောင်းပြု၍ ပြည်တွင်း၊ပြည်ပစီးပွားရေးလုပ်ငန်းများတိုးပွားလာပြီး ရန်ကုန်မြို့အပါအဝင် ရန်ကုန်တောင်ပိုင်းခရိုင်မြို့နယ်များဖြစ်သည့် သန်လျင် ၊ကျောက်တန်း၊ခရမ်း၊သုံးခွ တို့မှပြည်သူများ လူမှုစီးပွားဘဝတိုးတက်လာမည်ဖြစ်သည်။
ထို့ပြင် သီလဝါအထူးစီးပွားရေးဇုန်နှင့်သန်လျင်ဒေသဖွံ့ဖြိုးတိုးတက်လာမည့်အပြင် အရှေ့-အနောက် စီးပွားရေးစင်္ကြံလမ်းမကြီးကိုအသုံးပြု၍ ဘားအံ-မြဝတီအထိ ဆက်စပ်သွားလာနိုင်မည်ဖြစ်၍ မွန်ပြည်နယ်၊ကရင်ပြည်နယ်ဖွံ့ဖြိုးတိုးတက်လာမည်ဖြစ်ကာ ဒေသတွင်းနိုင်ငံများနှင့်ပါ ဆက်သွယ်မှုပိုမိုဖွံ့ဖြိုးလာမည်ဖြစ်ပြီး အဆင့်မြင့်နည်းပညာဖြင့် ဆောက်လုပ်သည့်တံတားဖြစ်၍ မြန်မာအင်ဂျင်နီယာများအနေဖြင့် တံတားတည်ဆောက်ခြင်း၊ခေတ်မီနည်းပညာနှင့်အတွေ့အကြုံများရရှိနိုင်ပြီး ကျွမ်းကျင်လုပ်သားများလည်း ပေါ်ထွက်လာမည်ဖြစ်ကာ အလုပ်အကိုင်အခွင့်အလမ်းများလည်း ပိုမိုရရှိစေမည်ဖြစ်သည်။
ထို့နောက် နစက ဥက္ကဋ္ဌသည် ရန်ကုန်မြို့နှင့်ဒလမြို့တို့အား ဆက်သွယ်ဖောက်လုပ်မည့် မြန်မာ- ကိုရီးယားချစ်ကြည်ရေး(ဒလ)တံတားစီမံကိန်းအား သွားရောက်ကြည့်ရှုစစ်ဆေးပြီး စီမံကိန်းလုပ်ငန်းများအတွက်လိုအပ်သည့် ဆောက်လုပ်ရေးပစ္စည်းများအားလုံး အသင့်ရရှိအောင်ဆောင်ရွက်ရမည်ဖြစ်ပြီး တံတားတွဲဆက်ခြင်းလုပ်ငန်းများစနစ်တကျဖြစ်ရန်လိုကာ စီမံကိန်း ချဉ်းကပ်လမ်းဧရိယာသည် လူနေအိမ်များနှင့် နီးကပ်စွာတည်ရှိ၍ ဘေးအန္တရာယ်ကင်းရှင်းရေးနှင့်ငလျင်ဒဏ်ခံနိုင်ရေးကို စနစ်တကျတွက်ချက်၍ အထူးအလေးထားဆောင်ရွက်ရန်မှာကြားခဲ့သည်။
ထို့ပြင် စီမံကိန်းလုပ်ငန်းများ သတ်မှတ်ကာလအတွင်းပြီးစီးရန် ကြိုတင်ဆောင်ရွက်နိုင်မည့် လုပ် ငန်းများကို မြန်မြန်ဆန်ဆန်ဆောင်ရွက်ရမည်ဖြစ်ပြီး တံတားတည်ဆောက်မှုစီမံကိန်းကာလ ကြာမြင့်သည်နှင့်အမျှ လမ်းကြောင်းပိတ်ဆို့မှုများဖြစ်ပေါ်နေမည်ဖြစ်၍ သတ်မှတ်အချိန်ကာလအတွင်းပြီးစီးအောင်ဆောင်ရွက်ရမည်ဟုလည်းတိုက်တွန်းခဲ့သည်။
မြန်မာ-ကိုရီးယား ချစ်ကြည်ရေး (ဒလ)တံတားတည်ဆောက်ရေးစီမံကိန်းအား ၂၀၁၂ ခုနှစ်တွင် နိုင်ငံတော်သမ္မတဦးသိန်းစိန်၏ ကိုရီးယားနိုင်ငံ ချစ်ကြည်ရေးခရီးစဉ်အတွင်း မြန်မာနိုင်ငံတွင် မြန်မာ-ကိုရီးယားချစ်ကြည်ရေးတံတားစီမံကိန်း တစ်ခုအကောင်အထည် ဖော်ရန်ဆွေးနွေးခဲ့ပြီးနောက် ၂၀၁၃ ခုနှစ်တွင် စီမံကိန်းအားစတင်အကောင် အထည်ဖော်ခဲ့ခြင်းဖြစ်သည်။
၂၀၁၅ ခုနှစ်တွင်တည်ဆောက်ရေးလုပ်ငန်းများကို စတင်ခဲ့ပြီး ကြိုးဆိုင်းတံတား(Cable – Stayed Bridge)အမျိုးအစားဖြစ်ကာ တံတားပြီးစီးပါက ရန်ကုန်မြို့မှ ဒလ၊တွံတေး၊ကော့မှူး၊ကွမ်းခြံကုန်းမြို့နယ်များ၊ဒေးဒရဲတံတားမှတဆင့် ကမ်းခြေဒေသများနှင့်ဧရာဝတီတိုင်းတစ်ခုလုံးသို့ လွယ်ကူလျင်မြန်စွာသွားလာနိုင်မည်ဖြစ်သည်။
ထို့ပြင် ရန်ကုန်မြို့၏ ယာဉ်ကြောပိတ်ဆို့မှုများမှာလည်း အတိုင်းအတာတစ်ခုအထိလျော့ပါးသက်သာသွားမည်ဖြစ်ကာ လူမှုရေး၊စီးပွားရေး၊ပညာရေး၊ကျန်းမာရေးနှင့်သယ်ယူပို့ဆောင်ရေးကဏ္ဍဖွံ့ဖြိုးတိုးတက်မှုအပါအဝင် ကဏ္ဍပေါင်းစုံ၌ဖွံ့ ဖြိုးတိုးတက်လာနိုင်ပြီး ရန်ကုန်မြို့၏အထင်ကရပြယုဂ် (Landmark)တစ်ခုလည်း ဖြစ်လာမည်ဖြစ် ကြောင်း သိရသည်။
