ပူတာအို ရေခဲတောင်တက်ခရီးစဥ်တွင် အဓိကအားထားရသည့် ဖုန်ရင်ချောင်းကူးတံတား ပြန်လည်ပြင်ဆင်ပြီးစီး

ကချင်ပြည်နယ်၊ ပူတာအိုဒေသအတွင်းရှိ ဖုန်ရင်ရာဇီနှင့် ဖန်ဂရမ်ရာဇီ ရေခဲတောင်တက်ခရီးစဉ်များအတွင်း အဓိက အားထားသွားလာရသည့် ဖုန်ရင်ချောင်းကူးတံတား ပြင်ဆင်ပြီးစီးပြီဖြစ်သဖြင့် ပြန်လည်ဖြတ်သန်းခွင့်ပြုပြီဖြစ်ကြောင်း ‌အဆိုပါ တံတားပြုပြင်ရေးတွင် ပါဝင်သူဒေသခံတစ်ဦးက ပေါ်ပြူလာနယူးစ်ကိုပြောသည်။

အဆိုပါ တံတားမှာ ပူတာအိုခရိုင် ဇီယာဒမ်းကျေးရွာအနီးတွင် တည်ရှိပြီး၊ အခင်းများ ဆွေးမြေ့ပျက်စီးလာခြင်းကြောင့် ရက်သတ္တပတ် (၂)ပတ်ကြာ ပြင်ဆင်ခဲ့ရကြောင်း ဆိုသည်။

” တံတားမရှိခင်က ခက်ခက်ခဲခဲ သွားလာနေရတဲ့နေရာ ဖြစ်တယ်။ ဒီတံတားကြီးက ၂၀၁၉ ခုနစ်မှာ စေတနာရှင်များရဲ့ ကျေးဇူးကြောင့် ဖြစ်လာရတဲ့တံတားတစ်စင်းဖြစ်ပါတယ်” ဟု ၎င်းက ရှင်းပြသည်။

၂၀၁၉ ခုနှစ်အတွင်း စတင်တည်ဆောက်ခဲ့သည့် အဆိုပါ တံတားမှာ ရာသီဥတုဒဏ်ကြောင့် ကြမ်းခင်းနှင့် ဘေးအကာများ ဆွေးမြေ့ပျက်စီးနေပြီဖြစ်သောကြောင့် ပြန်လည်ပြင်ဆင်ခဲ့ရခြင်းဖြစ်သည်ဟု ဆိုသည်။

ဖုန်ရင်ချောင်းကူးတံတားသည် ရေခဲတောင်တက်ဝါသနာရှင်များ တောင်တက်ရာ၌ ဖြတ်သန်းရုံသာမက ပူတာအိုဒေသခံများနှင့် မုန်လန်ဝမ်တုံဒေသတွင် နေထိုင်ကြသော ဒေသခံများ ဆေးမြစ် သစ်ဥသစ်ဖုနှင့် ဘယဆေး ရှာဖွေရာတွင်လည်း မရှိမဖြစ် အသုံးပြုနေရသော ချောင်းကူးတစ်ခုဖြစ်ကြောင်း သိရသည်။

ယင်း တံတားဖြစ်ပေါ်လာပုံသည် ၂၀၁၉ ခုနစ်အတွင်းက ဖန်ဂရမ်ရာဇီရေခဲတောင်ပေါ်၌ မတော်တဆကျ၍ အသက်ဆုံးရှူံးခဲ့သည့် ရေခဲတောင်တက်ဝါသနာရှင် မစိမ့်ထက်၏ မိဘများနှင့်စေတနာ ရှင်များ၏ လှူဒါန်းမှုဖြစ် စတင်တည် ဆောက်ခဲ့ခြင်းဖြစ်သည်။

ထို့ကြောင့် အဆိုပါ တံတားကို ဖုန်ရင်ချောင်းကူးတံတားအ မည်အပြင် မစိမ့်ထက်အား ရည်စူး၍ “စိမ့်ထက်တံတား” ဟုလည်း ခေါ်ဝေါ်ကြကြောင်း သိရသည်။