ပူတင်နှင့် တိုက်ရိုက်ဆွေးနွေးရန်အသင့်–ယူကရိန်းသမ္မတဇလန်းစကီး

ဖေဖော်ဝါရီ ၅

ယူကရိန်းခေါင်းဆောင် ဗလိုဒီမီးရ် ဇလန်းစကီး သည် သုံးနှစ်နီးပါးကြာ စစ်ပွဲကိုအဆုံးသတ်ရန် ရုရှားသမ္မတ ဗလာဒီမာပူတင်နှင့် တိုက်ရိုက်ဆွေးနွေးရန် အဆင်သင့်ရှိကြောင်း အင်္ဂါနေ့က တွေ့ဆုံမေးမြန်းမှုတစ်ခုတွင် ပြောကြားခဲ့သည်။
မော်စကို၏ကျူးကျော်မှု သုံးနှစ်မြောက် နီးကပ်လာချိန်တွင် အိမ်ဖြူတော်သို့ပြန်လည်ရောက်ရှိလာပြီး တိုက်ပွဲများအဆုံးသတ်ရန် ကတိပြုထားသည့် ဒေါ်နယ်ထရမ့်ပ် နှင့်အတူ ဆွေးနွေးပွဲများကို စတင်ရန် ၎င်း၏ ပြေကြားချက်များ ထွက်ပေါ်လာခဲ့သည်။

ဗြိတိန် သတင်းထောက် ပီးယားစ်မော်ဂန် နှင့် တွေ့ဆုံမေးမြန်းခန်းကို YouTube တွင် တင်ထားခဲ့သည်။

စေ့စပ်ညှိနှိုင်းရေး စားပွဲတစ်ခုထဲတွင် ပူတင်နှင့် မျက်နှာချင်းဆိုင်ထိုင်နေပါက မည်သို့ဖြစ်မည်နည်းဟု မေးမြန်းရာ ဇလန်းစကီး က “အဲဒါက ယူကရိန်းနိုင်ငံသားတွေအတွက် ငြိမ်းချမ်းရေး ယူဆောင်လာပေးနိုင်တဲ့ တစ်ခုတည်းသော အရာဖြစ်ရင် ပြည်သူ တွေကို မဆုံးရှုံးစေရင် ဒီတွေ့ဆုံမှုမှာ သေချာပေါက် ကျွန်တော် ပါဝင်သွားမှာပါ” ဟု ၎င်းက ဆွေးနွေးပွဲ၌ ပါဝင်သူ လေးဦးနှင့် အတူ ရှိနေမည်ဖြစ်ကြောင်း ပြောကြားခဲ့သည်။

ပါဝင်သူများမှာ မည်သူမည်ဝါ တို့ ဖြစ်သည်ကို မဖော်ပြထားသော်လည်း မော်ဂန်သည် ရုရှား၊ ယူကရိန်း၊ အီးယူနှင့် အမေရိကန်တို့အကြား ရှိလာနိုင်သော ဆွေးနွေးပွဲများအကြောင်းကို အစောပိုင်းတွင် ပြောဆိုခဲ့သည်။

“ကျွန်တော် သူ့အပေါ် သဘောကောင်းမှာ မဟုတ်ပါဘူး၊ သူ့ကို ရန်သူလို့ ကျွန်တော် မှတ်ယူပါတယ်။ ရိုးရိုးသားသား ပြောရရင် သူကလည်း ကျွန်တော့်ကို ရန်သူလို့ တွေးမယ် ထင်ပါတယ်” ဟု ယူကရိန်း ခေါင်းဆောင်က ပြောကြားခဲ့သည်။

မော်စကိုသည် ယူကရိန်းနှင့် ဆွေးနွေးမည်ဟု ပြီးခဲ့သည့် သီတင်းပတ်က ပူတင်က ပြောကြားခဲ့သော်လည်း ဇလန်းစကီး နှင့် တိုက်ရိုက်ပြောဆိုခြင်းကို ငြင်းပယ်ထားခဲ့သည်။

နှစ်နိုင်ငံစလုံးသည် ဖြစ်နိုင်ချေရှိသော ဆွေးနွေးပွဲများမတိုင်မီ စစ်မြေပြင်တွင် အသာစီးရရန် ကြိုးပမ်းခဲ့ကြသည်။

ကိယက်ဗ်သည် ရုရှားတပ်ဖွဲ့များကို ထိန်းထားရန် ရုန်းကန်နေရပြီး ယူကရိန်းသည် ရုရှားနိုင်ငံမှ ဆုံးရှုံးခဲ့သော နယ်မြေအချို့ကို ပြန်လည်ရရှိရန် မဖြစ်နိုင်ကြောင်း ဇလန်းစကီး က ဝန်ခံခဲ့သည်။

“ဝမ်းနည်းစရာမှာ ကျွန်ုပ်တို့၏မိတ်ဖက်များကပေးသော ထောက်ပံ့မှုများသည် ပူတင်ကို ကျွန်ုပ်တို့၏နယ်မြေများမှ အပြည့်အဝတွန်းထုတ်နိုင်ရန် မလုံလောက်ပါ” ဟု ၎င်းက ပြောကြားခဲ့သည်။

အီးယူနှင့် ကိယက်ဗ် တို့သည် မော်စကိုကို တရားမျှတမှုမရှိသော အရာများကိုလိုက်လျောရန် Trump က ကိယက်ဗ် ကို အတင်းအကျပ် ဖိအားပေးမည်ကို စိုးရိမ် နေကြသည်။
ဇလန်းစကီးက နေတိုးအဖွဲ့သို့ ဝင်ရောက်ရန် ယူကရိန်း၏ အစီအစဉ်သည် ယခင် အတိုင်းပင် ရှိနေဆဲ ဖြစ်သောကြောက့်တိုက်ပွဲများ ကို အဆုံးသတ်ရန်နှင့် “လုံခြုံရေးအာမခံချက်များ” ရမှသာ ပြေလည်မည်ဖြစ်ကြောင်း ထပ်လောင်းပြောကြားခဲ့သည်။

Ref: ဖရန်စ့်၂၄