ကိုဗစ် ၁၉ ကပ်ရောဂါဆိုင်ရာ စည်းမျဉ်းတင်းကျပ်မှုများနှင့် စီးပွားရေး အားနည်းလာမှုကြောင့် လွန်ခဲ့သော နှစ်အနည်းငယ်သည် တရုတ်နိုင်ငံရှိ သူဌေးကြီးများ အထူးသဖြင့် အိမ်ခြံမြေဈေးကွက်ဖြင့် ကြီးပွားလာသူများအတွက် သာယာပျော်ရွှင်ဖွယ် မကောင်းခဲ့ပေ။
တရုတ်နိုင်ငံရှိ အိမ်ခြံမြေကုမ္ပဏီကြီး ချိုင်းနား အဲဗားဂရန်း၏ ဥက္ကဌဖြစ်သူ ဟွေကာရန်၏ အသားတင်ပိုင်ဆိုင်မှုသည် ၉၃ ရာခိုင်နှုန်းနီးပါး ကျဆင်းသွားကြောင်း ဘလွန်းဘတ် ဘီလျံနာ အညွှန်း၏ ဖော်ပြချက်အရ သိရသည်။
တစ်ချိန်က အာရှတိုက်၏ ဒုတိယ အချမ်းသာဆုံးပုဂ္ဂိုလ်ဖြစ်ခဲ့သည့် ဟွေကာရန်၏ ချမ်းသာကြွယ်ဝမှုသည် ၂၀၁၇ ခုနှစ်တွင် ၄၂ ဘီလီယံရှိခဲ့ရာမှ ယခုအခါ ၃ ဘီလီယံသာ ကျန်ရှိတော့ကြောင်း ဘလွန်းဘတ် သတင်းဌာနက ဖော်ပြထားသည်။
၂၀၂၁ ခုနှစ်ကတည်းက နိုင်ငံ၏ အိမ်ခြံမြေပြဿနာများနှင့် လုံးချာရိုက်နေသော အဲဗားဂရန်းသည် ယခုလက်ရှိ ဒေါ်လာ သုံးရာ ဘီလီယံ အကြွေးပေးရန် ကျန်ရှိနေပြီး တရုတ်နိုင်ငံ၏ ကြွေးမြီအများဆုံး ကုမ္ပဏီဖြစ်နေသည်။
ဟွေသည် အကြွေးနွံနစ်နေသော သူ၏ ကုမ္ပဏီကို ထောက်ပံ့ရန်အတွက် အိမ်များနှင့် ကိုယ်ပိုင်ဂျက်လေယာဉ်များကို ရောင်းချခဲ့သည့်အပြင် သူ၏ ကိုယ်ပိုင် ငွေကြေးများကိုပါ အသုံးပြုခဲ့သည်ဟု သိရသည်။
အဲဗားဂရန်းသည် ဝန်ထမ်း ၂ သိန်းခန့်ရှိသော ကုမ္ပဏီကြီး တစ်ခုဖြစ်သည့်အတွက် အဆိုပါ ကုမ္ပဏီပြိုလဲမှုသည် တရုတ်အိမ်ခြံမြေဈေးကွက်ကို အလွန်ကျပ်တည်းသော အခြေအနေဆီသို့ ပို့ဆောင်စေနိုင်ပြီး အိမ်ပိုင်ရှင်များနှင့် ဘဏ္ဍာရေးစနစ်တို့အား ထိခိုက်စေမည်ကို လေ့လာသူများက စိုးရိမ်နေကြသည်။
Source: CNA