ပါလက်စတိုင်း ၆၀၀ ကျော် ပြန်လွှတ်မည့် အစီအစဉ်ကို အစ္စရေး ရွှေ့ဆိုင်း

စနေနေ့တွင် ပါလက်စတိုင်း အကျဉ်းသား ၆၀၀ ကျော် ကိုလွှတ်ပေးရန် စီစဉ်ထားမှုကို နောက်ထပ် ဓ-ါးစာခံများကို လွှတ်ပေးရာတွင် သိက္ခာကျစေသည့် အခမ်းအနားမျိုးကို မပြုလုပ်သည့် အချိန်အထိ ရွှေ့ဆိုင်းလိုက်သည်ဟု အစ္စရေးက ပြောကြားသည်။ 

ဂါဇာတွင် အစ္စရေးဓ-ါးစာခံများကို လွှဲပြောင်းပေးအပ်ရာ၌ အရှက်ရကာ သိက္ခာကျစေသည့် အခမ်းအနားများပြုလုပ်ခြင်းကို ပြင်းပြင်းထန်ထန်ရှုတ်ချကြောင်းနှင့် ဟားမတ်စ်အဖွဲ့သည် စည်းမျဉ်းများကို အကြိမ်ကြိမ်ချိုးဖောက်နေကြောင်း တနင်္ဂနွေနေ့(ဖေဖော်ဝါရီ ၂၃) အစောပိုင်းက သတင်းထုတ်ပြန်ချက်တွင် အစ္စရေးဝန်ကြီးချုပ် နေတန်ယာဟု၏ ရုံးက ပြောကြားခဲ့သည်။

“မိမိတို့ရဲ့ ပြန်ပေးဆွဲခံရသူတွေကို ဂုဏ်သိက္ခာကျဆင်းစေမယ့် သိက္ခာချတဲ့ အခမ်းအနားတွေ၊ ဝါဒဖြန့်လုပ်ငန်းအတွက် ထိန်းသိမ်းထားသူတွေကို ရက်စက်စွာ အသုံးချတာတွေ အပါအဝင် ဟားမတ်စ်တွေက လုပ်နေတဲ့ ထပ်ခါတလဲလဲ စည်းမျဉ်းချိုးဖောက်မှုတွေကြာင့် နောက်ထပ် ပြန်ပေးဆွဲခံထားရသူတွေကို လွှတ်ရာမှာ သိက္ခာကျ စေတဲ့အခမ်းအနားတွေ မလုပ်ဘူးဆိုတဲ့ အာမခံချက် မရမချင်း ယမန့်နေ့မှာ စီစဉ်ထားတဲ့ အကြမ်းဖက်သမားတွေ လွှတ်ပေးရေးကို ရွှေ့ဆိုင်းလိုက်သည်” ဟု အစ္စရေးဝန်ကြီးချုပ်ရုံးက ပြောဆိုခဲ့သည်။

သိမ်းပိုက်ခံ အနောက်ဘက်ကမ်းဒေသရှိ အိုဖာအကျဉ်းထောင်ဂိတ်ပေါက်များမှ ပါလက်စတိုင်း အကျဉ်းသားများကို တင်ဆောင်ထားသည်ဟု ယူဆရသော မော်တော်ယာဉ်များ နောက်ကြောင်းပြန်လှည့်လာရချိန်တွင် အဆိုပါ သတင်း ထုတ်ပြန်ချက် ထွက်ပေါ်လာခြင်းဖြစ်သည်။

စနေနေ့တွင် လွှတ်ပေးလိုက်သည့် အစ္စရေးဓ-ါးစာခံ ခြောက်ဦးအတွက် အလဲအလှယ်သဘောအဖြစ် ပါလက်စတိုင်း အကျဉ်းသား ၆၂၀ ဦး လွှတ်ပေးမည့် အစီအစဉ်ကို ရွှေ့ဆိုင်းလိုက်ခြင်းဖြစ်သည်။

ဓ-ါးစာခံခြောက်ဦးအနက် ငါးဦးကို လူအုပ်ကြီးရှေ့မှောက်တွင် မျက်နှာဖုံးစွပ်၊ လက်နက်ကိုင် စစ်သွေးကြွများက စောင့်ကြပ်ထားသည့် ယင်း ထုတ်ပြမှုမျိုးသည် ရက်စက်ကြမ်းကြုတ်သည်ဟု ကုလသမဂ္ဂနှင့် အခြားသူများက ယခင်လွှဲပြောင်းပေးမှုများအပြီးတွင် ဝေဖန်ထားခဲ့သည်။

ခြောက်ဦးမြောက် ဓါ-းစာခံကို ကြက်ခြေနီအဖွဲ့ထံ သီးသန့်အစီအစဉ်ဖြင့် လွှဲပြောင်းပေးခဲ့သည်။

Ref: စကိုင်းနူးစ်