ပို့ဆောင်ရေးနှင့်ဆက်သွယ်ရေးဝန်ကြီးဌာန လက်အောက်ရှိ မြန်မာ့မီးရထားသည် ခရီးသွားပြည်သူများ အဆင်ပြေစွာ သွားလာနိုင်ရေးနှင့် ကုန်စည်များကို ဈေးနှုန်းသက်သာစွာ သယ်ယူပို့ဆောင်နိုင်ရေးအတွက် ပါဆယ်ရထားများ တိုးချဲ့ချိတ်ဆက်ပြေးဆွဲသွားမည်ဖြစ်ကြောင်း သိရသည်။
ယင်းကဲ့သို့ ဆောင်ရွက်ရာတွင် ရန်ကုန်မြို့ပတ်ရထားလမ်းပိုင်း၌ ဘက်ထရီလျှပ်စစ်စက်ခေါင်း အသုံးပြု၍ ရထားတွဲဆိုင်းများ တိုးချဲ့ပြေးဆွဲနေပြီး၊ ခရီးသွားပြည်သူများအတွက် ပိုမိုလွယ်ကူအဆင်ပြေစေရန် ဧပြီ ၄ ရက်မှစ၍ “ခ” အဆက်ရထားကို ထပ်မံတိုးချဲ့ပြေးဆွဲသွားမည်ဖြစ်သည်။
ထို့အပြင် ရန်ကုန်-မန္တလေး လမ်းပိုင်းတွင် အထူးပါဆယ်ရထားများကို ပါဆယ်တွဲ ၁၀ တွဲနှင့် ဘရိတ်တွဲ ၁ တွဲဖြင့် ချိတ်ဆက်ပြေးဆွဲမည်ဖြစ်ပြီး တစ်ခေါက်လျှင် ကုန်စည် ၂၄၃ တန်အထိ တင်ဆောင်နိုင်မည်ဖြစ်သည်။
အဆိုပါရထားများသည် ပဲခူးမှစတင်၍ ကျောက်ဆည်အထိ အဓိကဘူတာများတွင် ရပ်နားမည်ဖြစ်ပြီး ဧပြီ ၄ ရက်မှ စတင်ကာ အဆန်/အစုန် ခေါက်ပြန်စနစ်ဖြင့် ပြေးဆွဲမည်ဖြစ်သည်။
တစ်ဖက်တွင်လည်း ရန်ကုန်-မော်လမြိုင် လမ်းပိုင်း၌ ပါဆယ်တွဲ ၉ တွဲပါဝင်သော အထူးပါဆယ်ရထားများကို ပြေးဆွဲမည်ဖြစ်ပြီး တစ်ခေါက်လျှင် ကုန်စည် ၂၀၆ တန်အထိ တင်ဆောင်နိုင်မည်ဖြစ်သည်။
ထို့ပြင် ရန်ကုန်-ပြည်နှင့် သာစည်-ရွှေညောင်-တောင်ကြီး လမ်းပိုင်းများရှိ လူစီးရထားများတွင်လည်း ပါဆယ်တွဲများ ထပ်မံချိတ်ဆက်ကာ ကုန်စည်တင်ဆောင်နိုင်မှုကို တိုးမြှင့်ဆောင်ရွက်သွားမည်ဖြစ်သည်။
ယခုကဲ့သို့ ပါဆယ်ရထားများ တိုးချဲ့ပြေးဆွဲခြင်းမှာ ကုန်စည်သယ်ယူပို့ဆောင်ခများ လျှော့ချနိုင်ရန်၊ ကုန်ဈေးနှုန်းမြင့်တက်မှုကို ထိန်းညှိနိုင်ရန်၊ သယ်ယူပို့ဆောင်မှုကို မြန်ဆန်စေရန်နှင့် စက်သုံးဆီသုံးစွဲမှု လျှော့ချနိုင်ရန် ရည်ရွယ်ခြင်းဖြစ်ကြောင်း သိရသည်။