ရန်ကုန်တိုင်း၊ ကျောက်တံတားမြို့နယ်၊ (၄) ရပ်ကွက်၊ ပန်းဆိုးတန်းလမ်းရှိ အခွန်ဦးစီးမှူးရုံးတွင် ယနေ့ဇွန် (၅) ရက် နေ့လယ်ပိုင်းက ဗုံးပေါက်ကွဲမှု ဖြစ်ပွားခဲ့ကြောင်း သိရသည်။
ယနေ့ နေ့လယ် (၁၂)နာရီကျော်အချိန်က ကျောက်တံတား မြို့နယ်၊ ပန်းဆိုးတန်းလမ်းရှိ အလယ်အလတ်အခွန်ထမ်းများဆိုင်ရာ အခွန်ဦးစီးမှူးရုံး၏ (၃)လွှာတွင် ရုံးသို့လာရောက်သူများ ယာယီထိုင်နိုင်ရန်ချထားသည့် စတီးထိုင်ခုံဘေးမှ ဗုံးပေါက်ကွဲခဲ့ခြင်းဖြစ်ပြီး ဒုဦးစီးမှူး အပါအဝင်ကြောင်း သိရသည်။
“ဗုံးပေါက်သံကတော့ အတော်ကျယ်ကျယ်ကြားလိုက်ရတယ်။ အဲဒီနားက ကျွန်တော်ဖြတ်သွားတဲ့ အချိန်ကြားလိုက်ရတာ၊ အော်ဟစ်နေတဲ့ အသံတွေလည်း ကြားရတယ်။ သိပ်မကြာဘူး လုံခြုံရေးအဖွဲ့တွေရောက်လာတာတွေ့တယ်။ နောက် လူနာတင်ကားတွေရောက်လာပြီး ဆေးရုံဖက်ကို မောင်းထွက်သွားကြတယ်”ဟု အခင်းဖြစ်စဥ်အားကြုံတွေ့ခဲ့သူတစ်ဦးက ပြောသည်။
ဗုံးပေါက်ကွဲမှုကြောင့် အခွန်ဌာန၏ ဒု-ဦးစီးမှူး မဖြိုးဖြိုးအောင် အပါအဝင် အခွန်ဝန်ထမ်း (၃) ဦးနှင့်အခွန်ရုံးသို့လာရောက်သည့် အရပ်သားအမျိုးသမီး(၂) ဦး(စုစုပေါင်း (၅) ဦး)တို့တွင် ဗုံးစထိမှန်ဒဏ်ရာများရရှိခဲ့ကြသဖြင့် ရန်ကုန်ပြည်သူ့ဆေးရုံကြီးသို့ ပို့ဆောင်ပေးခဲ့ကြကြောင်း သိရသည်။
