ပနားမားတူးမြောင်းကိုတရုတ်လွှမ်းမိုးမှုရပ်ပါ–မာကို

ပနားမားတူးမြောင်းကို တရုတ်နိုင်ငံက သြဇာလွှမ်းမိုး၊ ချုပ်ကိုင်မှုရှိနေသည်ဟု အမေရိကန်သမ္မတ ဒေါ်နယ်ထရမ့်ပ်က ရှုမြင်ထားပြီး ယင်းကိစ္စရပ်တန့်စေရန် ပနားမားအစိုးရက ချက်ချင်းကိုင်တွယ်လုပ်ဆောင်ခြင်းမရှိပါက ဝါရှင်တန်အနေဖြင့် လိုအပ်သည့် အရေးယူဆောင်ရွက်မှုများလုပ်ဆောင်ရလိမ့်မည်ဟု အမေရိကန်နိုင်ငံခြားရေးဝန်ကြီး မာကို ရူဘီယိုက ပနားမားသမ္မတ ဟိုဆေး ရာအူးလ် မူလီနိုကို တနင်္ဂနွေနေ့တွင် သတိပေးခဲ့သည်။

ပနားမားစီးတီးတွင် အမေရိကန်နိုင်ငံခြားရေးဝန်ကြီးနှင့် ဆွေးနွေးပြီး‌နောက် မူလီနိုက တရုတ်နှင့် တရုတ်စီးပွားရေးလုပ်ငန်းများ၏ ပါဝင်ပတ်သက်သည့် သဘောတူညီချက်များကို ပြန်လည်သုံးသပ်သွားမည်ဟု သဘောထားပေးခဲ့ပြီး ရွှေ့ပြောင်းဝင်ရောက်သူများအရေးအတွက် အမေရိကနှင့် ထပ်မံပူးပေါင်းဆောင်ရွက်သွားမည်ဟု ကြေညာခဲ့သည်။ သို့ရာတွင် ကမ္ဘာ့ဒုတိယ သင်္ဘောအသွားအလာအများဆုံး ရေလမ်းကြောင်းအပေါ် သူ့နိုင်ငံ၏ အချုပ်အခြာပိုင်မှုနှင့်ပတ်သက်၍မူ ဆွေးနွေးရလောက်သည့်အဆင့် မဟုတ်ဟု ထပ်လောင်းပြောကြားခဲ့သည်။

တူးမြောင်းဝင်ပေါက်အနီးရှိ ဆိပ်ကမ်းနှစ်ခုကို ဟောင်ကောင်အခြေစိုက် ကုမ္ပဏီတစ်ခုမှတဆင့် တရုတ်က လုပ်ကိုင်ဆောင်ရွက်နေခြင်းသည် ရေလမ်းကြောင်းအတွက် ခြိမ်းခြောက်မှုဖြစ်ကြောင်းနှင့် အမေရိကန်-ပနားမား သဘောတူစာချုပ်ကို ချိုးဖောက်ခြင်းဖြစ်သည်ဆိုသော ထရမ့်ပ်၏ သတင်းစကားကို ရုဘီယိုက အသိပေးပြောကြားခဲ့သည်ဟု အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တမ်မီဘရုစ်က ထုတ်ပြန်ချက်တွင် ပြောဆိုခဲ့သည်။

အဆိုပါအခြေအနေသည် လက်ခံနိုင်စရာမရှိကြောင်းကို ရူဘီယိုက ရှင်းလင်းစွာပြောကြားခဲ့ပြီး ချက်ချင်းပြောင်းလဲမှုများမလုပ်ဆောင်ပါက အမေရိကန်ပြည်ထောင်စုအနေဖြင့် စာချုပ်ပါ ၎င်း၏ အခွင့်အရေးများကို ကာကွယ်ရန် လိုအပ်သလို အရေးယူဆောင်ရွက်မှုများလုပ်ဆောင်ရလိမ့်မည်ဟု ဆိုခဲ့သည်။

ပနားမားအနေဖြင့် မည်သည့်အဆင့်များ လုပ်ဆောင်ရမည် သို့မဟုတ် အမေရိက,က မည်ကဲ့သို့ လက်တုန့်ပြန်ဆောင်ရွက်မှုများလုပ်မည်ဆိုသည်ကို ရူဘီယိုက တိကျစွာ ပြောဆိုခဲ့ခြင်း မရှိပေ။

Ref: ဂျပန်တိုင်းမ်စ်, စီအင်န်ဘီစီ