ဘေးကင်းစွာ ရေကြောင်းသွားလာခွင့်ပြုမည့် အမေရိက,က ကြားဝင်စေ့စပ်သော ယူကရိန်းနှင့် ပင်လယ်နက်ဆိုင်ရာ အပစ်အခတ်ရပ်စဲရေးကို မော်စကိုက မူအားဖြင့် သဘောတူခဲ့ပြီးနောက် ရုရှားဘက်က တောင်းဆိုချက်များကို အမေရိကန်ပြည်ထောင်စုက အကဲဖြတ်သုံးသပ်သွားမည်ဟု အမေရိကန်နိုင်ငံခြားရေးဝန်ကြီး မာကို ရူဘီယိုက မတ်လ၂၆ ရက် နေ့ တွင် ပြောကြားခဲ့သည်။
ရေကြောင်းသွားလာမှု ဘေးကင်းစေရေး၊ တိုက်ခိုက်မှုများ ရပ်တန့်ရေးနှင့် ကုန်သွယ်သင်္ဘောများကို စစ်ရေးရည်ရွယ်ချက်အတွက် အသုံးမပြုရေးတို့နှင့် ပတ်သက်၍ ဆော်ဒီအာရေဗျတွင် ဆွေးနွေးခဲ့ကြပြီးနောက် ယူကရိန်း၊ ရုရှားတို့နှင့် ပင်လယ်နက်ဆိုင်ရာ သဘောတူညီချက်များကို သီးခြားစီ ရရှိခဲ့သည်ဟု အမေရိက,က မတ် ၂၅ ရက်တွင် ကြေညာခဲ့သည်။
“ဆွေးနွေးမှုတွေ အပြီးမှာ ရုရှားတွေက သူတို့ ဖြစ်စေလိုတဲ့ အခြေအနေ အသေးစိတ် တွေကို ဖော်ပြခဲ့ပြီး ဒါကို အကဲဖြတ်ဖို့ လုပ်ဆောင်သွားပါမယ်” ဟု မစ္စတာ ရူဘီယိုက မတ်လ ၂၆ ရက်နေ့က ဂျမေကာသို့ သွားရောက်သည့် ခရီးစဉ်အတွင်း၌ သတင်းထောက်များကို ပြောကြားခဲ့သည်။
မတ်လ ၂၅ ရက်နေ့တွင် ခရမ္မလင်က ထုတ်ပြန်ခဲ့သော သဘောတူညီချက်ဆိုင်ရာ လိုအပ်သော စည်းကမ်းသတ်မှတ်ချက်များတွင် အဓိက စိုက်ပျိုးရေးဆိုင်ရာ ဘဏ်၊ အစားအစာနှင့် ဓါတ်မြေသြဇာ ပို့ကုန်သမားများနှင့် ရုရှားသင်္ဘောများကို ကန့်သတ်ထားမှုများနှင့် ပိတ်ဆို့အရေးယူထားမှုများကို ရုပ်သိမ်းရေးတို့ ပါဝင်ပြီး ၂၀၂၂ ခုနှစ် ပင်လယ်နက်ဆိုင်ရာ ပထမဆုံး သဘောတူညီချက်ကို ၂၀၂၃ ခုနှစ်တွင် သက်တမ်းတိုးစဉ်ကမော်စကိုက တောင်းဆိုခဲ့သည်များအပေါ် အဓိကအားဖြင့် ထင်ဟပ်ကြောင်း သိရသည်။
Ref: သည်စထရိတ်တိုင်းမ်စ်