နျူကလီးယားစွမ်းအင်ကို ငြိမ်းချမ်းစွာ အသုံးပြုမှုမြှင့်တင်ရေးကို ထောက်ခံလျက်ရှိကြောင်း သံအမတ်ကြီး ဦးမင်းသိမ်းပြော
နျူကလီးယားစွမ်းအင်ကို ငြိမ်းချမ်းစွာ အသုံးပြုမှုမြှင့်တင်ရေးကို ထောက်ခံလျက်ရှိကြောင်း ကုလသမဂ္ဂနှင့် နိုင်ငံတကာအဖွဲ့အစည်းများဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးမင်းသိမ်းက ပြောသည်။
ဩစတြီးယားနိုင်ငံ၊ ဗီယင်နာမြို့ရှိ Vienna International Centre ၌ စက်တင်ဘာလ ၁၂ ရက်မှ ၁၆ ရက်အထိ ကျင်းပခဲ့သည့် အပြည်ပြည် ဆိုင်ရာအဏုမြူစွမ်းအင်အေဂျင်စီ (International Atomic Energy Agency-IAEA) ၏ အုပ်ချုပ်မှု အဖွဲ့ (Board of Governors) အစည်းအဝေးတွင် နျူကလီးယားလက်နက်မပြန့်ပွားရေးဆိုင်ရာ မြန်မာနိုင်ငံ၏ သဘောထားအမြင်အား ဆွေးနွေးပြောကြားရာတွင် ပြောကြားခဲ့ခြင်းလည်းဖြစ်သည်။
မြန်မာနိုင်ငံသည် နျူကလီးယား လက်နက်မပြန့်ပွားရေးဆိုင်ရာ သဘောတူစာချုပ် (NPT)၊ နျူကလီးယားလက်နက် စမ်းသပ်ဖောက်ခွဲမှုဘက်စုံတားမြစ်ရေးစာချုပ် (CTBT)၊ နျူကလီးယားပစ္စည်းနှင့် နျူကလီးယားဆိုင်ရာ အထောက်အပံ့ပစ္စည်းများ၏ ရုပ်ပိုင်းဆိုင်ရာ အကာအကွယ်ပေးရေးသဘောတူစာချုပ် (CPPNM) နှင့် ၎င်း၏ပြင်ဆင်ချက်၊ အရှေ့တောင်အာရှ နျူကလီးယားလက်နက်ကင်းမဲ့ဇုန်ဖော်ဆောင်ရေး စာချုပ် (SEANWFZ)တို့တွင် အဖွဲ့ဝင်နိုင်ငံဖြစ်ကြောင်း၊ ထို့အပြင် နျူကလီးယားလက်နက်များ တားမြစ်ရေးသဘောတူစာချုပ်(TPNW)၊ အလုံးစုံအကာအကွယ်ပေးရေးသဘောတူညီချက် (CSA) နှင့် NPT ၏ နောက်ဆက်တွဲစာချုပ် (Additional Protocol) တို့တွင်လည်း ပါဝင်လက်မှတ်ရေးထိုး ထားကြောင်း၊ မြန်မာနိုင်ငံအနေဖြင့် IAEA နှင့် တက်ကြွစွာ ပူးပေါင်းဆောင်ရွက်လျက်ရှိပြီး၊ ကမ္ဘာလုံးဆိုင်ရာ နျူကလီးယားဘေးကင်းလုံခြုံမှုနှင့် အကာအကွယ်ပေးမှုများကို မြှင့်တင်၍ ခိုင်မာအားကောင်းလာစေရေးနှင့် နျူကလီးယားနည်းပညာများကို ငြိမ်းချမ်းစွာအသုံးပြုရေး ကဏ္ဍများတွင် အေဂျင်စီ၏လုပ်ပိုင်ခွင့်များနှင့် ဆောင်ရွက်ချက်များအား အစဉ်ထောက်ခံပေး လျက်ရှိကြောင်း သံအမတ်ကြီး ဦးမင်းသိမ်းက ရှင်းလင်းပြောကြားခဲ့သည်။
ထို့အပြင် နျူကလီးယားစွမ်းအင်ကို ငြိမ်းချမ်းစွာ အသုံးပြုမှုမြှင့်တင်ရေးကို ထောက်ခံလျက်ရှိကြောင်း၊ ကမ္ဘာ့ငြိမ်းချမ်းရေးနှင့် တည်ငြိမ်ရေးတို့ကို ထိန်းသိမ်းရန်အတွက် နျူကလီးယားလက်နက်များနှင့် အခြား နျူကလီးယားဖောက်ခွဲရေးပစ္စည်းများကို နျူကလီးယားလက်နက်နိုင်ငံများမှ နျူကလီးယား လက်နက်မရှိသောနိုင်ငံများသို့ တိုက်ရိုက် သို့မဟုတ် သွယ်ဝိုက်၍ လွှဲပြောင်းခြင်းမှ ရှောင်ကြဉ်ရန် အချက်၏အရေးပါမှုကို အလေးပေးဖော်ပြခဲ့ပြီး၊ နျူကလီးယားလက်နက်မပြန့်ပွားရေးကိစ္စရပ်များတွင် IAEA နှင့် အစိုးရအချင်းချင်းဆွေးနွေးမှုလုပ်ငန်းစဉ်များ၏ အခန်းကဏ္ဍများကို ဆက်လက် ဆောင်ရွက်ရေးအပေါ် မြန်မာနိုင်ငံ၏ ထောက်ခံမှုကို ထပ်လောင်းအတည်ပြုပါကြောင်း ဆွေးနွေးပြောကြားခဲ့သည်ဟု သိရသည်။
