ကြီးမားသည့် ၆၀၀ မီလီမီတာ ဒုံးပျံများ ပါဝင်သော နျူကလီးယား တန်ပြန်တိုက်ခိုက်မှုကို ပုံဖော်သည့် ပထမဆုံး ပေါင်းစပ်နည်းဗျူဟာ စစ်ရေးလေ့ကျင့်မှုကို မြောက်ကိုရီးယားခေါင်းဆောင် ကင်ဂျုံအန်ဦးဆောင်၍ ဧပြီ ၂၂ ရက်တွင် ပြုလုပ်ခဲ့ကြောင်း နိုင်ငံပိုင် KCNA သတင်းဌာနက ဖော်ပြသည်။
နိုင်ငံတော်၏အကြီးကျယ်ဆုံးနျူကလီးယားအကျပ်အတည်း သတိပေးချက်ထုတ်ပြန်သည့်အချိန်တွင် ‘Hwasanpalryong’ စနစ်မှ နျူကလီးယားတန်ပြန်တိုက်ခိုက်ရေးပုံစံသို့ကူးပြောင်းသည့် လုပ်ထုံးလုပ်နည်းများကို နားလည်သဘောပေါက်စေရန် လေ့ကျင့်ခြင်းအဖြစ်ပြုလုပ်ခြင်းဖြစ်ပြီး၊ နျူကလီးယား တန်ပြန်တိုက်ခိုက်ရေး ကွပ်ကဲမှုစနစ်ကို ဖော်ဆောင်နေကြောင်း သတင်းဌာနက ရေးသားထားသည်။
အလွန်ကြီးမားသော ဒုံးကျည်ပစ်လွှတ်မှုများ၏ ထိမှန်မှုမြင့်မားခြင်းနှင့် တိကျမှုတို့ကို ကင်ဂျုံအန်က အလေးထားခဲ့ပြီး ဒုံးကျည်များသည်လက်ဖြောင့်သေနတ်မှ ကျည်ဆံများနှင့် အလားတူသည်ဟု သူကပြောကြားကြောင်း KCNA သတင်းတွင် ဖော်ပြထားသည်။
စစ်ရေးလေ့ကျင့်မှု၏ အဓိကရည်ရွယ်ချက်မှာ မြောက်ကိုရီးယားနိုင်ငံ၏ နျူကလီးယားစွမ်းအား ယုံကြည်စိတ်ချရမှု၊ သာလွန်မှု၊ စွမ်းအားနှင့် ကွဲပြားသောနည်းလမ်းများကို ပြသရန်နှင့် နျူကလီးယားစွမ်းအားကို အရည်အသွေးနှင့် ပမာဏအရ အားကောင်းစေရန်ဖြစ်သည်။ အဆိုပါ စစ်ရေးလေ့ကျင့်မှုသည် မြောက်ကိုရီးယားနိုင်ငံနှင့် စစ်ရေးအရ ထိပ်တိုက်ရင်ဆိုင်မှုများ ပြုလုပ်နေသော ရန်သူများအား ပြတ်ပြတ်သားသား သတိပေးသည့် အချက်ပြခြင်း ဖြစ်ကြောင်း ဆိုသည်။