တပ်မတော်မှ နောင်ချိုမြို့အား ပြန်လည်ထိန်းချုပ်သိမ်းပိုက်ခဲ့ပြီးနောက် နောင်ချို- ကျောက်ကြမ်း-အုမ္မခါး-အုမ္မသီး-ပြင်ဦးလွင်-မန္တလေးလမ်းကြောင်းကြီးပြန်လည်ဖွင့်လှစ်ခဲ့ကာ နောင်ချိုမြို့တည်ဆောက်ရေးလုပ်ငန်းများ၌ အသုံးပြုမည့် ဘိလပ်မြေများကို လျင်မြန်စွာပို့ဆောင်ပေးလျက်ရှိကြောင်း သိရသည်။
ထို့ကြောင့် ယနေ့ ဇူလိုင် ၂၀ ရက်၌ Crown ဘိလပ်မြေစက်ရုံမှ ဘိလပ်မြေများတင်ဆောင်လာသော ကား(၅၉)စီးသည် ၁ စီးလျှင်(၃၃တန်ဖြင့် စုစုပေါင်း(၁,၉၄၇)တန်(စုစုပေါင်း ဘိလပ်မြေ ၃၆,၅၈၀ အိတ်)ကို မန္တလေးမြို့နယ်သို့သွားရောက်ပို့ဆောင် ပေးလျက်ရှိရာ မန္တလေးငလျင်ကြီးဒဏ်ကြောင့် ပျ-က်စီးမှုများဖြစ်ပေါ်ခဲ့သော လူနေအဆောက်အအုံများ၊ လမ်း၊ တံတားများ၊ စေတီ၊ ပုထိုးများ တည်ဆောက်မှုနှင့် အခြားတည်ဆောက်ရေးလုပ်ငန်းများတွင် အဓိကလိုအပ်ချက်ဖြစ်သော ဘိလပ်မြေများကို ဈေးနှုန်းသက်သာဝယ်ယူသုံးစွဲနိုင်မည်ဖြစ် သည်။
လက်နက်ကိုင်အဖွဲ့ဝင်များ နောင်ချိုမြို့အား ထိန်းချုပ်ပြီး နောင်ချို- ကျောက်ကြမ်း-အုမ္မခါး-အုမ္မသီး-ပြင်ဦးလွင်-မန္တလေးလမ်းကြောင်းကြီးအားပိတ်ထားစဥ် မြို့၏ အနောက်မြောက်ဘက် ၇ မိုင်ခန့်အကွာရှိ လောင်ဖန်းကျေးရွာအနီးရှိ Crown ဘိလပ်မြေစက်ရုံမှ ဘိလပ်မြေများကို မန္တလေးငလျင်ကြီးကြောင့်လိုအပ်လျက်ရှိသော နေရာများသို့လွယ်ကူစွာပေးပို့နိုင်ခြင်းမရှိ၍ဒေသခံများမှာ ဘိလပ်မြေများကို ဈေးနှုန်းမြင့်မားစွာဝယ်ယူသုံးစွဲခဲ့ရသည်။
ထိုသို့ ဝယ်ယူနေရသဖြင့် တပ်မတော်မှအပြီးတိုင်ပြန်လည်ထိန်းချုပ်သိမ်းပိုက်ပြီးချိန်တွင် ယင်းလမ်းကြောင်းကြီးအား ပြန်လည်ဖွင့်လှစ်ပေးခဲ့သဖြင့် ကုန်စည်စီးဆင်းမှုများလွယ်ကူစွာစီးဆင်းနိုင်ခဲ့ပြီး ဒေသဖွံ့ဖြိုးရေးလုပ်ငန်းများကို တစ်စိုက်မတ်မတ်လုပ်ဆောင်လျက်ရှိသည်။
ထို့ပြင် ဒေသခံများမှာလည်း ၎င်းတို့၏ နေရပ်ဒေသသို့ စိတ်အေးချမ်းသာစွာပြန်လည်ဝင်ရောက်လာပြီး နေ့စဉ်လူမှုစီးပွားဘဝကိုအေးချမ်းစွာပြန်လည်ဖော်ဆောင်လုပ်ကိုင်နိုင်တော့မည်ဖြစ်ကြောင်း သိရသည်။