ယမန်နှစ်က အဂတိလိုက်စားမှုဆန့်ကျင်ရေး ဆန္ဒပြမှုများကြောင့် ယခင်အစိုးရပြုတ်ကျသွားခဲ့ပြီးနောက် ပထမဆုံး အကြိမ်ကျင်းပမည့် လာမည့်လ လွှတ်တော်ရွေးကောက်ပွဲများအတွက် နီပေါလွှတ်တော်ကိုယ်စားလှယ်လောင်းများသည် တနင်္လာနေ့မှ စတင်၍မဲဆွယ်စည်းရုံးနေကြပြီဖြစ်သည်။
“ဒီရွေးကောက်ပွဲက တိုင်းပြည်ရဲ့ အနာဂတ်ကို ပုံဖော်လိမ့်မယ်” ဟု ရွေးကောက်ပွဲကျင်းပမည့် မတ်လ ၅ ရက်အထိ ကြားဖြတ် အစိုးရဝန်ကြီးချုပ်အဖြစ် ဆောင်ရွက်လျက်ရှိသော ဆူရှီလာ ကာကီက မဲဆွယ်ရက်မတိုင်မီတွင် ပြောကြားခဲ့သည်။
ရက်သတ္တနှစ်ပတ်ကြာ မဲဆွယ်ကာလအတွင်း အခင်းအကျင်းသစ်ကို မြင်ရမည်ဖြစ်ကာ အပြောင်းအလဲအတွက် ကတိပြုထားသည့် လူငယ်ကိုယ်စားလှယ်လောင်းများသည် တည်ငြိမ်မှုနှင့် လုံခြုံမှုကို ဆောင်ကျဉ်းပေးသည်ဆိုသော ဝါရင့်နိုင်ငံရေးသမားများကို စိန်ခေါ်မည်ဖြစ်သည်။
ရွေးကောက်ပွဲတွင် အဓိကပြိုင်ဆိုင်မှုအဖြစ် ရက်ပ်ပါတစ်ဖြစ်လဲ မြို့တော်ဝန် ဘာလန်ဒရာရှား(၃၅) နှစ်သည် ဝန်ကြီးချုပ်ဟောင်း၏ မဲဆန္ဒနယ်တွင် ဝန်ကြီးချုပ်ဟောင်း ကေပီ ရှာမာအိုလီနှင့် ထိပ်တိုက်ရင်ဆိုင်ရမည်ဖြစ်သည်။
ဘာလန်ဟု လူသိများပြီး ဖက်ရှင်ကျကျဝတ်စားဆင်ယင်တတ်သော ရှားသည် လူငယ်များဦးဆောင်သော နိုင်ငံရေးပြောင်းလဲမှု၏ သင်္ကေတတစ်ခုအဖြစ် ပေါ်ထွက်လာခဲ့သည်။
သူသည် ပြီးခဲ့သည့် လွှတ်တော်၌ စတုတ္ထအင်အားအကြီးဆုံးပါတီဖြစ်သည့် Rastriya Swatantra ပါတီကို ဝင်ရောက်ခဲ့သည်။
ထို့အပြင် နိုင်ငံ၏ ဝါအရင့်ဆုံးပါတီဖြစ်သော နီပေါကွန်ဂရက်ပါတီသည်လည်း ရွေးကောက်ပွဲဝင်မည်ဖြစ်သည်။ ထိုပါတီသည် တစ်ချိန်က အိုလီ၏ ညွန့်ပေါင်းအစိုးရ၏ အစိတ်အပိုင်းတစ်ခုဖြစ်သော်လည်း အုံကြွမှုနောက်ပိုင်းတွင် ခေါင်းဆောင်သစ်တစ်ဦးဖြစ်သည့် အသက် ၄၉ နှစ်အရွယ် ဂါဂန်သာပါကို ရွေးကောက်တင်မြှောက်ထားခဲ့သည်။
ထို့အပြင် ဂျန်ဇီးနိုင်ငံရေး၏ အခြားတစ်ဖက်တွင်မူ ၂၀၀၈ ခုနှစ်က ရာထူးမှ ဖယ်ရှားခံခဲ့ရကာ နှစ်ပေါင်း ၂၄၀ ကြာ ဘုရင်စနစ်အဆုံးသတ်သွားခဲ့သည့် အသက် ၇၈ နှစ်အရွယ် ဘုရင်ဟောင်း ဂါနန်ဒရာရှားကို ထောက်ခံသူများသည်လည်း မဲဆွယ်စည်းရုံးမှုများ ပြုလုပ်မည်ဖြစ်သည်။
ပထမဆုံးအကြိမ် မဲပေးရမည်ဖြစ်သော မဲဆန္ဒရှင် ၈၀၀,၀၀၀ အပါအဝင် မဲပေးရန် မှတ်ပုံတင်ထားသူ ၁၉ သန်းနီးပါးရှိသည်။
၎င်းတို့သည် အမတ်နေရာ ၂၇၅ နေရာရှိ အောက်လွှတ်တော်အတွက် ကိုယ်စားလှယ်လောင်းများကို တိုက်ရိုက်မဲပေးစနစ်ဖြင့် ၁၆၅ ဦးနှင့် အချိုးကျကိုယ်စားပြုစနစ်ဖြင့် ၁၁၀ ဦးကို ရွေးကောက်တင်မြှောက်မည်ဖြစ်သည်။
တိုက်ရိုက်မဲပေးစနစ်တွင် ကိုယ်စားလှယ်လောင်း ၃,၄၀၀ ကျော် ပါဝင်ယှဉ်ပြိုင်မည်ဖြစ်ပြီး ၃၀ ရာခိုင်နှုန်းသည် အသက် ၄၀ အောက်များဖြစ်ကြသည်။
Ref: ဆော့သ်ချိုင်းနားမောနင်းပို့စ်