(၇၅)နှစ်မြောက် စိန်ရတုကချင်ပြည်နယ်နေ့အခမ်းအနားသို့ နစက ဥက္ကဋ္ဌ၊ ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က သဝဏ်လွှာပေးပို့ရာ၌ ထည့်သွင်းရေးသားထားခြင်းဖြစ်သည်။
စစ်မှန်စည်းကမ်းပြည့်ဝသည့် ပါတီစုံဒီမိုကရေစီ ခိုင်မာအားကောင်းလာစေရန်နှင့်နိုင်ငံတော်ဖွံ့ဖြိုးတိုးတက်ရေးအတွက် အဓိကလိုအပ်ချက်မှာ အေးချမ်းသာယာရေးနှင့်တရားဥပဒေစိုးမိုးရေး၊ နိုင်ငံတော်တည်ငြိမ်ရေးနှင့်ထာဝရငြိမ်းချမ်းရေးတို့ဖြစ်သည်ဟု သဝဏ်လွှာ၌ရေးသားထားသည်။
ထို့ကြောင့် တိုင်းရင်းသားညီနောင်အားလုံးတို့အတွက် ရေရှည်တည်တံ့ခိုင်မြဲသည့်ငြိမ်းချမ်းရေးရရှိစေရန်နှင့်နိုင်ငံအဝန်းဟန်ချက်ညီစွာဖွံ့ဖြိုးတိုးတက်ရေးကို အလေးထားဆောင်ရွက်ပေးလျက်ရှိသည်ဟု သဝဏ်လွှာ၌ရေးသားပြောဆိုခဲ့သည်။
နိုင်ငံတော်အစိုးရအနေဖြင့် ငြိမ်းချမ်းရေးလုပ်ငန်းစဉ်များအောင်မြင်စေရန် သက်ဆိုင်ရာအဖွဲ့အစည်းများ၊ သက်ဆိုင်သူများအနေဖြင့် သဘောထားမှန်ကန်ပြီး နိုင်ငံတော်အကျိုးအတွက်ဆိုသည့် ငြိမ်းချမ်းရေးလုပ်ငန်းစဉ်များကို မထိခိုက်စေရန် တတ်နိုင်သမျှထိန်းသိမ်းဆောင်ရွက်လျက်ရှိသည်။
“နိုင်ငံတော်တည်ငြိမ်အေးချမ်းမှုမရှိရင် ဆက်လက်လုပ်ဆောင်ရမယ့် ဒီမိုကရေစီနဲ့ဖက်ဒရယ်စနစ်ကိုအခြေခံတဲ့ ပြည်ထောင်စုတည်ဆောက်ရေး၊နိုင်ငံတော်ဖွံ့ဖြိုးတိုးတက်ရေးတွေဟာ အလှမ်းဝေးနေဆဲသာဖြစ်မယ်ဆိုတာကို အားလုံးသိရှိကြပြီးဖြစ်ပါတယ်”ဟု နစက ဥက္ကဋ္ဌကသဝဏ်လွှာတွင်ရေးသားပြောဆိုခဲ့သည်။
ထို့ကြောင့် လက်ရှိအကြမ်းဖက်မှုများနှင့်လက်နက်ကိုင်တိုက်ခိုက်မှုများကိုလျှော့ချရပ်တန့်ကြရန်လိုအပ်နေပြီဖြစ်သည်ဟု သဝဏ်လွှာ၌ရေးသားထားသည်။
နစက အနေဖြင့် စစ်မှန်စည်းကမ်းပြည့်ဝသောဒီမိုကရေစီနှင့်ဖက်ဒရယ်စနစ်ကို အခြေခံသည့် ပြည် ထောင်စုတည်ဆောက်ရေးအတွက် “တစ်နိုင်ငံလုံး ထာဝရငြိမ်းချမ်းရေးရရှိရေးအတွက် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ပါ သဘောတူညီချက်များအတိုင်း ဖြစ်နိုင်သမျှ အလေးထား လုပ်ဆောင်သွားမည်” ဆိုသည့် ဦးတည်ချက်နှင့်အညီ ငြိမ်းချမ်းရေးလုပ်ငန်းစဉ်များကို စဉ်ဆက်မပြတ် အလေးထားဆောင်ရွက်လျက်ရှိသည်ဟု ရေးသားထားသည်။
“တပ်မတော်အနေနဲ့လည်း ၂၀၁၈ ခုနှစ်၊ ဒီဇင်ဘာ ၂၁ ရက်ကစပြီး ၂၀၂၂ ခုနှစ်၊ ဒီဇင်ဘာ ၃၁ ရက်အထိ ၄ နှစ်ကျော်ကာလတိုင် ပစ်ခတ်တိုက်ခိုက်မှုရပ်စဲဖို့အတွက် ထုတ်ပြန်ချက်ပေါင်း ၂၁ ကြိမ် ထုတ်ပြန်ခဲ့ပြီး နိုင်ငံတော်ကာကွယ်ရေးနဲ့အုပ်ချုပ်ရေးဆိုင်ရာအန္တရာယ်တွေကို နှောင့်ယှက်ထိပါးတိုက်ခိုက်ချိန်ကအပ တပ်မတော်ရဲ့ စစ်ရေးဆိုင်ရာလှုပ်ရှားတာတွေကို ရပ်စဲပေးခဲ့ပါတယ်”ဟု နစက ဥက္ကဋ္ဌကသဝဏ်လွှာ၌ရေးသားပြောဆိုခဲ့သည်။
ထို့အတူ လက်တွေ့ကျသည့် ငြိမ်းချမ်းရေး ဆွေးနွေးမှုလုပ်ငန်းစဉ်များ ဆက်လက်အကောင်အထည်ဖော်ဆောင်ရွက်နိုင်ရေး၊ ပြည်သူလူထုတစ်ရပ်လုံး လိုလားတောင့်တလျက်ရှိသည့် ထာဝရငြိမ်းချမ်းရေးရရှိရေးတို့အတွက် နိုင်ငံတော်အစိုးရ၏ လုံခြုံရေးနှင့်အုပ်ချုပ်ရေးဆိုင်ရာယန္တရားများအား နှောင့်ယှက်ထိပါးတိုက်ခိုက်ချိန်မှအပ တပ်မတော်၏ စစ်ရေးဆိုင်ရာလှုပ်ရှားမှုများကို ၂၀၂၃ ခုနှစ် တစ်နှစ်တာကာလ ထပ်မံတိုးမြှင့်ရပ်စဲပေးထားသည်ဟု ရေးသားထားသည်။
နိုင်ငံ၏ကောင်းကျိုးကိုဆောင်ရွက်ရာတွင် တစ်ဦးကောင်း၊ တစ်ဖွဲ့ကောင်းဖြင့်ဆောင်ရွက်၍ မရနိုင်ဘဲတိုင်းရင်းသားအားလုံး၏ အမျိုးသားရေးစိတ်ဓာတ်ကိုအခြေခံသော ပေါင်းစုအင်အားဖြင့် တက်ညီလက်ညီဆောင်ရွက်ရန် လိုအပ်မည်ဟု နစက ဥက္ကဋ္ဌပေးပို့သည့် သဝဏ်လွှာ၌ တိုက်တွန်းရေး သားထားသည်။
ပုံစာ-နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်ဇနီးတို့ ဒီဇင်ဘာ ၁၄ ရက်က ပူတာအိုခရိုင်၊ မလိခမြစ်ကမ်းနံဘေးတွင် တည်ထားကိုးကွယ်သည့် ရှေးဟောင်း သမိုင်းဝင် ကောင်းမှုလုံစေတီတော်မြတ်ကြီးအား သွားရောက်ဖူးမြော်စဉ်