နိုင်ငံရေးမတည်ငြိမ်မှုကို အဆုံးသတ်မည်–ဗြိတိန်ဝန်ကြီးချုပ်

       
တနင်္လာနေ့က ဘတ်ကင်ဟမ်နန်းတော်တွင်တတိယမြောက် ချားလ်စ်ဘုရင် နှင့် တွေ့ဆုံစဉ် အန်ဒီ ဘန်ဟမ်၏ ဝန်ကြီးချုပ်ခန့်အပ်မှုကို အတည်ပြုခဲ့သည်။ ဆယ်စုနှစ်တစ်ခုအတွင်း ယူနိုက်တက်ကင်းဒမ်း၏ သတ္တမမြောက် ဝန်ကြီး တက်ချုပ်လာပြီးနောက် နိုင်ငံကို ဒုက္ခပေးနေသော နိုင်ငံရေးမတည်ငြိမ်မှုကို အဆုံးသတ်မည်ဖြစ်ကြောင်းနှင့် အဓိကကျ‌ေသာပြောင်းလဲမှုကို ဖော်ဆောင် ပေးမည်ဖြစ်ကြောင်း ၎င်းက ကတိပြုခဲ့သည်
          
လူကြိုက်များသော အင်အားစုများ၏ ဆက်တိုက်အောင်မြင်မှုများရနေစဉ် ရွေးကောက်ပွဲတွင် အပြတ်အသတ်အနိုင်ရခဲ့ပြီးနောက် ၂ နှစ်အကြာတွင် ရာထူးမှဖယ်ရှားခံလိုက်ရသော ကီယာ စတားမာ၏ နေရာကို ဘန်ဟမ်က လွှဲယူမည်ဖြစ်သည်။
       
“ဗြိတိန်နိုင်ငံဟာ တည်ငြိမ်မှုကို ပြန်ဖော်ဆောင်နိုင်တယ်ဆိုတာ ကျွန်တော်တို့ ကမ္ဘာကို ပြသဖို့ လိုပါတယ်” ဟု ဘန်ဟမ်က ၎င်း၏ တရားဝင်အိမ်တော်ဖြစ်သော လန်ဒန်ရှိ အမှတ် ၁၀ ဒေါင်းနင်းလမ်းသို့ ရောက်ရှိလာပြီးနောက် ပြောကြားခဲ့သည်။
       
စတားမာကို ၎င်း၏ လုပ်ဖော်ကိုင်ဖက်များက လွန်ခဲ့သည့် တစ်လခန့်တွင် ရာထူးမှ ဖယ်ရှားခဲ့သည်။ ဝန်ကြီးချုပ်အဖြစ် တာဝန်ထမ်းဆောင်ခဲ့ရမှုသည် “ကျွန်ုပ်ဘဝ၏ အထူးအခွင့်အရေး” ဟု ရာထူးမှ ထွက်ခွာပြီးနောက် စတားမာက မှတ်ချက်ပြုခဲ့ပြီး ဘန်ဟမ်ကို သူ အပြည့်အဝထောက်ခံကြောင်း ပြောကြားခဲ့သည်။
     
“ကျွန်တော်တို့ဟာ ဒီအခိုက်အတန့်ကာလကို ဗြိတိန်အတွက် ဆားကစ်ဘရိတ်ကာအဖြစ် ပြုလုပ်မှာဖြစ်ပြီး လွန်ခဲ့တဲ့ နှစ် ၄၀ အတွင်း အကြီးမားဆုံး ပြောင်းလဲမှုများကို ဆောင်ကျဉ်းလာပါမယ်။ နိုင်ငံရေးပုံစံအသစ်နဲ့ စီးပွားရေးပုံစံအသစ်ပါ” ဟု ဘန်ဟမ်က ကြေညာခဲ့သည်။
      
ဗြိတိန်နိုင်ငံသားများအတွက် အသက်ရှုချောင်စေမည်ဟု ကတိပေးသည့်အနေဖြင့် သူသည် နေထိုင်မှုကုန်ကျစရိတ်ကို ကိုင်တွယ်ဖြေရှင်းမည့် အစီအမံများကို ယခုသီတင်းပတ်တွင် ကြေညာမည်ဟု ကတိပြုခဲ့သည်။
        
နိုင်ငံခြားရေးမူဝါဒနှင့် ပတ်သက်၍ ၎င်း၏ ဝန်ကြီးချုပ်သက်တမ်းတွင် ဗြိတိန်၏ ထောက်ခံမှု ခိုင်မာစွာ ရှိနေမည်ဖြစ်ကြောင်း အာမခံရန်အတွက် ယူကရိန်းသမ္မတ ဇလန်းစကီးသည် ပထမဆုံး စကားပြောမည့် နိုင်ငံခြားခေါင်းဆောင်များထဲမှ တစ်ဦးဖြစ်လာမည်ဟု သူက ပြောကြားခဲ့သည်။
    
အမေရိကန်သမ္မတ ဒေါ်နယ်ထရမ့်ပ် ကို ဦးစွာဖုန်းခေါ်ဆိုမှုပြုလုပ်မည်ဟုလည်း ဝန်ကြီးချုပ်သစ်က ပြောကြားခဲ့သည်။ ယင်းနောက် မကြာမီမှာပင် ခေါင်းဆောင်နှစ်ဦး ဖုန်းပြောခဲ့ကြောင်း အိမ်ဖြူတော်အရာရှိတစ်ဦးက ပြောကြားခဲ့သည်။
       
တရုတ်ဝန်ကြီးချုပ် လီကျန်က ဘန်ဟမ်ကို ဂုဏ်ပြုစကားပြောကြားခဲ့ကြောင်းနှင့် ပူးပေါင်းဆောင်ရွက်ရန် မျှော်လင့်ကြောင်း ပြောခဲ့သည်ဟု နိုင်ငံပိုင် ရှင်းဟွာသတင်းဌာနက ဖော်ပြခဲ့သည်။

Ref: အယ်ဂျာဇီးယား