ရန်ကုန်တိုင်း၊ လှိုင်သာယာ(အရှေ့ပိုင်း)မြို့နယ်ရှိ သာသနာ့ဂုဏ်ရည်ချမ်းသာကြီးကျောင်းတိုက်၏ ဦးစီးပဓာနနာယက၊ နိုင်ငံတော်သြဝါဒါစရိယ၊ တိပိဋကဓရ တိပိဋကကောဝိဒ သြဝါဒါစရိယအဖွဲ့ဥက္ကဋ္ဌ၊ အင်္ဂုတ္တိုရ်နိဿယကျမ်းပြုအကျော်ဆရာတော်ကြီး ဘဒ္ဒန္တပညိဿရာဘိဝံသ(အဘိဓဇမ ဟာရဋ္ဌဂုရု)သက်တော်(၉၀)နှစ်၊ ဝါတော်(၇၀) သည် ဖေဖော်ဝါရီ ၄ ရက်နံနက် ၁၀ နာရီ ၁၅ မိနစ်က ဘဝနတ်ထံပျံလွန်တော်မူခဲ့သည်။
ဆရာတော်ကြီးလောင်းလျာသည် စစ်ကိုင်းတိုင်း၊ ရေဦးမြို့နယ်၊ သရက်ကန်ကျေးရွာ၌ ၁၂၉၆ ခုနှစ်၊ တပေါင်းလပြည့်ကျော် ၁၁ ရက်တွင်ဖွားမြင်တော်မူခဲ့ပြီး ခမည်းတော်မှာ ဦးပေါကူဖြစ်ကာ မယ်တော်မှာ ဒေါ်ဖွားမြူတို့ဖြစ်သည်။
၁၃ဝ၄ ခုနှစ်၊ တန်ဆောင်မုန်းလဆန်း ၅ ရက်တွင် ရေဦးမြို့၊ ချမ်းသာကြီးပါဠိတက္ကသိုလ်ကျောင်းတိုက်ဆရာတော် ဘဒ္ဒန္တပဏ္ဍိစ္စအား ဥပဇ္ဈာယ်ပြု၍ ရှင်သာမဏေအဖြစ်ရောက်ရှိခဲ့ပြီး ၁၃၁၆ ခုနှစ်၊ ပြာသိုလဆန်း ၈ ရက်၌ ရေဦးမြို့နယ်၊ ချမ်းသာကြီးပါဠိတက္ကသိုလ်ကျောင်းတိုက်၏ ခဏ္ဍသိမ်၌ ဆရာတော်ဘဒ္ဒန္တပဏ္ဍိစ္စကို ဥပဇ္ဈာယ်ပြုကာ ရဟန်းအဖြစ်ရောက်ရှိတော်မူခဲ့သည်။
ပရိယတ္တိစာပေများကို ရေဦးမြို့နယ်၊ ကွမ်းအုံကျေးရွာ၊ အောင်ဘုံကျောင်းဆရာတော်၊ ရေဦးမြို့၊ ချမ်းသာကြီးပါဠိတက္ကသိုလ်ကျောင်းတိုက်ဆရာတော်နှင့် စာချဆရာတော်များ၊ ပခုက္ကူမြို့၊ မဟာဝိသုတာရာမတိုက်ဆရာတော်နှင့် စာချဆရာတော်များ၊ မန္တလေးမြို့၊ မစိုးရိမ်ကျောင်းတိုက်ဆရာတော်နှင့်စာချဆရာတော်များ၊ ပခုက္ကူမြို့၊ မဟာဝိသုတာရာမတိုက်၊ ဈေးကျောင်းဆရာတော်၊ အမရပူရမြို့၊ မဟာဂန္ဓာရုံကျောင်းတိုက်ဆရာတော်နှင့် စာချဆရာတော်များထံမှ သင်ယူ ဆည်းပူးတော်မူခဲ့သည်။
ဆရာတော်ကြီးသည် အစိုးရပထမပြန် စာမေးပွဲတွင် ပထမငယ်၊ ပထမလတ်၊ ပထမကြီးတန်းတို့ကိုအောင်မြင်ခဲ့ပြီး သာသနဓဇသိရီပဝရဓမ္မာစရိယဘွဲ့၊ သကျသီဟပရိယတ္တိသာသနဟိတဓမ္မာစရိယဘွဲ့၊ အဘိဓမ္မပါဠိပါရဂူဘွဲ့တို့ကိုလည်းအောင်မြင်တော်မူခဲ့သည်။
ထို့ပြင် ဆရာတော်ကြီးသည် သာသနာ့ဂုဏ်ရည်ချမ်းသာကြီးကျောင်းတိုက်၌ စာသင်သား ရဟန်း၊ သာမဏေများအား ပရိယတ္တိစာပေများကို သင်ကြားပို့ချပေးတော်မူခဲ့ပြီး အင်္ဂုတ္တိုရ်ပါဠိတော်(၁၁)ကျမ်း၏ အနက်အဓိပ္ပါယ် အကျယ်အဖွင့်ကျမ်း(၅)တွဲ၊ သုတ်မဟာဝါဋီကာ နိဿယ အဓိပ္ပါယ်အကျယ်အဖွင့်ကျမ်း(ပ၊ ဒု)တွဲတို့ကို ရေးသားပြုစုတော်မူခဲ့သည်။
ဆရာတော်ကြီးသည် တိပိဋက ပါဠိ-မြန်မာအဘိ ဓာန်ကျမ်းပြုအဖွဲ့ဝင်နှင့် အဖွဲ့ခေါင်းဆောင်၊ နိကာယ်စာမေးပွဲဥက္ကဋ္ဌ၊ နိကာယ်စာမေးပွဲ ပုစ္ဆက၊ ဝိသုဒ္ဓိမဂ်သင်တန်းနည်းပြတာဝန်၊ တိပိဋကဓရ ရွေးချယ်ရေးစာမေးပွဲဩဝါဒါစရိယအဖွဲ့ ဥက္ကဋ္ဌ၊ နိုင်ငံတော်ဩဝါဒါစရိယ၊ မဟာတေဇမုနိစေတီတော်ဂေါပကအဖွဲ့ ဩဝါဒါစရိယ၊ ရွှေမေတ္တာလူမှုကူညီရေးအသင်း၏ ဂုဏ်ထူးဆောင်နာယကတို့အဖြစ်ထမ်းဆောင်တော်မူခဲ့ကာ ၂၀၁၆ ခုနှစ်၊ ဇန်နဝါရီ ၄ ရက်တွင် နိုင်ငံတော်အစိုးရက “အဘိဓဇမဟာရဋ္ဌဂုရု”ဘွဲ့တံဆိပ်တော်မြတ် ဆက်ကပ်တော်မူခဲ့သည်။
ထိုသို့ သာသနာ့တာဝန်များ အားကြိုးမာန်တက်ထမ်းဆောင်တော်မူနေရာမှာ ဘဝနတ်ထံပျံလွန်တော်မူသွားခဲ့ခြင်းမှာ သာသနာတော်အတွက်များစွာဆုံးရှုံးနစ်နာရပါသည်။