နိုင်ငံတစ်ခုတိုးတက်ရေးအတွက် စီးပွားရေးအား ကောင်းရန်လိအပ်သည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ မေ ၁၉ ရက်နံနက်ပိုင်းကကျင်းပသည့် နိုင်ငံတော်စီမံအုပ်ချုပ်ရေးကောင်စီအစိုးရအဖွဲ့ လုပ်ငန်းညှိနှိုင်းအစည်းအဝေးတွင် ပြောကြားခဲ့ခြင်းဖြစ်သည်။
” နိုင်ငံတစ်ခုတိုးတက်ဖို့အတွက် စီးပွားရေးအရအားကောင်းဖို့လိုအပ်ပါတယ်။ အဲ့လို စီးပွားရေးအားကောင်းအောင်ဆောင်ရွက်ဖို့အတွက် အစိုးရတစ်ရပ်အနေနဲ့ တာဝန်ရှိပါတယ်။ နိုင်ငံရဲ့ GDP ဟာ အိမ်နီးချင်းနိုင်ငံတွေထက်လျော့နည်းနေတာကြောင့် မိမိတို့အနေနဲ့ အခုထက်ပိုမိုကြိုးပမ်း ဆောင်ရွက်သွားရဦးမှာဖြစ်ပါတယ်”ဟု နစကဥက္ကဋ္ဌကပြောသည်။
ထို့ကြောင့် အစိုးရအနေဖြင့် မူဝါဒကိုသာချမှတ်ပေးမည်ဖြစ်ပြီး တိုင်းနှင့်ပြည်နယ်များမှအောင်မြင်အောင်အကောင်အထည်ဖော်ဆောင်ရွက်ရမည်ဖြစ်ကာ အလုပ်လုပ်နိုင်အောင်ဖန်တီးပေးရန်နှင့် တို-က်တွန်းပေးရန်မှာ အစိုးရတွင်တာဝန်ရှိပြီး မိမိတို့အနေဖြင့် ချေးငွေများထုတ်ပေးခြင်း၊ လိုအပ်သည်များ ဖြည့်ဆည်းပေးခြင်းတို့ကို ဆောင်ရွက်ပေးလျက်ရှိသည်ဟု ပြောသည်။
” သို့သော် တိုင်းနဲ့ပြည်နယ်တွေအလိုက်လုပ်ငန်းတွေ ထိုက်သင့်သလောက်အောင်မြင်မှုမရှိခဲ့ပါဘူး။ စိုက်ပျိုးရေးလုပ်ငန်းတွေမှာ ပန်းတိုင်ရည်မှန်းချက်ပြည့်မီမှုမရှိသေးတာကိုတွေ့ရပါတယ်။ ဆီထွက်သီး နှံလည်းအထွက်နှုန်းအားနည်းနေဆဲဖြစ်လို့ ပြည်ပကနေတင်သွင်းနေရဆဲဖြစ်ပါတယ်။ အဲဒီလို စိုက်ပျိုးသီးနှံတွေ ပန်းတိုင်ရည်မှန်းချက်မပြည့်မီတာကြောင့် နိုင်ငံ့ဝင်ငွေ အမေရိကန်ဒေါ်လာ(၈)ဘီလီယံကျော်ခန့်လျော့နည်းခဲ့တာကို တွက်ချက်မှုတွေအရတွေ့ရှိရပါတယ်”ဟု နစက ဥက္ကဋ္ဌက ပြောသည်။
ထို့ကြောင့် သီးထပ်စွမ်းအားများ ရာနှုန်းပြည့်မီအောင်ဆောင်ရွက်နိုင်မည်ဆိုပါက အမေရိကန် ဒေါ် လာ(၁၄)ဘီလီယံခန့်ဝင်ငွေပိုမိုရရှိလာမည်ဖြစ်ပြီး မြန်မာနိုင်ငံသည် ရေခံမြေခံကောင်းများနှင့် လုပ်အားအရင်းအမြစ်များရှိပြီးဖြစ်သော်လည်း အမှန်တကယ် အလုပ်လုပ်ခြင်းမရှိသဖြင့် ဝင်ငွေနည်းရခြင်းဖြစ်ကာ ငွေကြေးဈေးနှုန်းများ မတည်မငြိမ်ဖြစ်ရခြင်းကိုလည်း အချက်တစ်ချက်အနေဖြင့်စဉ်းစားရန်လိုပြီး နိုင်ငံဝင်ငွေတိုးတက်ရန် ကုန်ထုတ်လုပ်မှုကိုတိုးမြှင့်ဆောင်ရွက်နိုင်ပါက ငွေကြေးဈေးနှုန်းများတက်လာမည်မဟုတ်သကဲ့သို့ ကုန်ဈေးနှုန်းများလည်းတိုးမြှင့်လာမည်မဟုတ်၍ အလုပ်ကိုအမှန်တကယ်လုပ်ကြရန်နှင့် နိုင်ငံ့စီးပွားရေးကိုမြှင့်တင်ရန်လိုအပ်မည်ဟု ပြောသည်။
” ကုန်ဈေးနှုန်းကြီးမြင့်ရခြင်းကို အဖြေရှာဖို့လိုပါတယ်။ ထုတ်လုပ်မှုကုန်ကျစရိတ်မြင့်မားခြင်း၊ ဝယ်လိုအားနဲ့ရောင်းလိုအားမမျှတခြင်းတွေကို ဖြေရှင်းနိုင်ဖို့ဆောင်ရွက်ရပါမယ်။ ဒါ့ကြောင့် ထုတ်လုပ်မှုတိုးမြှင့်အောင် မိမိတို့အနေနဲ့ ကြိုးပမ်းဆောင်ရွက်ကြရပါမယ်။ လျှပ်စစ်စွမ်းအင်ကဏ္ဍနဲ့ပတ်သက်ရင် လိုအပ်ချက်ရှိခဲ့ပါတယ်။ ဒါ့ကြောင့် အချိန်တိုအတွင်း လျှပ်စစ်ရရှိနိုင်ဖို့ ဆိုလာစွမ်းအင်နဲ့ဖြေရှင်းဆောင်ရွက်နိုင်ဖို့ကို ကြိုးပမ်းဆောင်ရွက်ခဲ့ပါတယ်။ အကြမ်းဖက်သမားတွေအနေနဲ့ လျှပ်စစ်ဓာတ်အားတွေထုတ်လုပ်လို့မရနိုင်စေဖို့ စက်ရုံ၊ အလုပ်ရုံတွေ၊ ဓာတ်အားပေးတိုင်တွေကို ဖျ-က်ဆီးတာ၊ နှောင့်ယှက်တာ၊ ခြိမ်းခြောက်တာတွေကိုဆောင်ရွက်လျက်ရှိပေမယ့် လျှပ်စစ်စွမ်းအားဝန်ကြီးဌာနကဝန်ထမ်းတွေက လျှပ်စစ်စွမ်းအားပေးနိုင်ဖို့အတွက် အစွမ်းကုန်ဆောင်ရွက်နေတာကို အသိအမှတ်ပြုကျေးဇူးတင်ပါတယ်”ဟု နစက ဥက္ကဋ္ဌကပြောသည်။
ထို့ပြင် ပို့ဆောင်ရေးနှင့် ဆက်သွယ်ရေးဝန်ကြီးဌာနအနေဖြင့် အကြမ်းဖက်သမားများ၏ လမ်းတံတားဖောက်ခွဲဖျ-က်ဆီးမှုများကို ရက်ပိုင်းအတွင်း နာရီပိုင်းအတွင်း ပြန်လည်ကောင်းမွန်အောင်ကြိုးပမ်းဆောင်ရွက်လျက်ရှိသကဲ့သို့ ဆောက်လုပ်ရေးဝန် ကြီးဌာနအနေဖြင့်လည်း ထိခို-က်ပျက်စီးခဲ့ရသည့် လမ်း၊ တံတားများကို အမြန်ဆုံးကောင်းမွန်အောင် ဆောင်ရွက်ပေးလျက်ရှိကာ ပို့ဆောင်ရေးနှင့် လမ်း ပန်းဆက်သွယ်ရေးကောင်းမွန်မှုမရှိပါက စီးပွားရေး ဖွံ့ဖြိုးတိုးတက်မှုရရှိအောင် ဆောင်ရွက်ရန်အခက် အခဲများစွာရှိမည်ဖြစ်ပြီး ပြည်သူတို့၏ လူမှုစီးပွားဘဝများထိခို-က်စေနိုင်မည်ဟု ပြောသည်။
ထို့ကြောင့် မိမိတို့အစိုးရအနေဖြင့် ပြည်သူလူထုကယုံကြည်မှုရှိပြီး အားကိုးရသည့်အစိုးရတစ်ရပ်ဖြစ်အောင်ကြိုးပမ်းဆောင်ရွက်ရန်လိုပြီး သမိုင်းကြောင်းကောင်းကိုရေးထိုးနိုင်ရန်လည်းလိုသည်ဟု နစက ဥက္ကဋ္ဌက ပြောကြားခဲ့သည်။