ဗဟိုဘဏ်အနေဖြင့် ထုတ်ပြန်ထားသည့် စည်းမျဉ်းစည်းကမ်းများကိုမလိုက်နာဟုဆိုကာ Money Changer (၁၀) ခုကို လိုင်စင်ရုပ်သိမ်းခြင်းနှင့် ဆိုင်းငံ့ခြင်းများပြုလုပ်၍ အရေးယူဆောင်ရွက်ထားကြောင်း အသိပေးထုတ်ပြန်ထားသည်။
ဗဟိုဘဏ်၏ ထုတ်ပြန်ချက်အရ Best Yuan Money Changer Co.,ltd ၊ Currency Hub Co.,ltd ၊ Globextra Co.,ltd ၊ My Gold Myanmar Co.,ltd ၊ Sym Chem Co.,ltd ၊ Win Yadana Gems & Jewellery Co.,ltd တို့အား မတ် (၂၆) ရက်မှစတင်ပြီး လိုင်စင်ရုတ်သိမ်းလိုက်ကြောင်း သိရသည်။
အလားတူ Farmer Phoyarzar Auto Mobile Services Co.,ltd ၊ PAAMAA Co.,ltd ၊ Source Strategy Consul tant & Development Co.,ltd ၊ Wu Fu Co.,ltd တို့ကိုလည်း မတ် (၂၆) ရက်မှစတင်ကာ လိုင်စင် ခြောက်လ ဆိုင်းငံ့လိုက်ကြောင်း သိရသည်။
ဗဟိုဘဏ်အနေဖြင့် Money Changer များကို ရှောင်တခင်ဝင်ရောက် စစ်ဆေးလျက်ရှိပြီး နိုင်ငံခြားသုံးငွေ စီမံခန့်ခွဲမှုဥပဒေပါ အချက်များကို လိုက်နာမှုမရှိသည့် Money Changer များအား နိုင်ငံခြားသုံးငွေ စီမံခန့်ခွဲမှုဥပဒေပုဒ်မ ၃၅ ပါ ပြဋ္ဌာန်းချက်များနှင့်အညီ လုပ်ငန်းလိုင်စင်အား ယာယီဆိုင်းငံ့ခြင်းနှင့် အပြီးရုပ်သိမ်းခြင်းတို့ဖြင့် အရေးယူဆောင်ရွက်နေခြင်းဖြစ်သည်။
ထို့ပြင် ငွေလဲကောင်တာများကို ရှောင်တခင် စတင်ဝင်ရောက်စစ်ဆေးခဲ့သည့် မတ်လ (၆)ရက်မှစ၍ လက်ရှိအချိန်အထိ နိုင်ငံခြားသုံးငွေစီမံခန့်ခွဲမှုဥပဒေပါ အချက်များကို လိုက်နာခြင်းမရှိသည့် Money Changer (၁၁) ခုအား လိုင်စင် ရုပ်သိမ်းခြင်း၊ Money Changer (၅)ခုအား လိုင်စင်သုံးလ ဆိုင်းငံ့ခြင်းနှင့် Money Changer (၆) ခုအား လိုင်စင်ခြောက်လဆိုင်းငံ့ခြင်း စသည်ဖြင့်စုစုပေါင်း Money Changer လိုင်စင် (၂၂) ခုအား အရေးယူဆောင်ရွက်ထားပြီးဖြစ်ကြောင်း သိရသည်။
မတ်လ (၁) ရက်တွင် ပြင်ပငွေကြေးဈေးကွက်အတွင်း၌ တစ်ဒေါ်လာ ၃၆၃၀ သာရှိခဲ့ပြီး ယနေ့တွင် တစ်ဒေါ်လာ ၃၈၀၀ ကျော်အထိမြင့်တက်နေခြင်း ဖြစ်သည်။