ကိုရီးယားရောက်မြန်မာများအနေဖြင့် နိုင်ငံကူးလက်မှတ်ကို တရားမဝင် သက်တမ်းတိုးပါက အရေးယူဆောင်ရွက်သွားမည်ဖြစ်ကြောင်း ကိုရီးယားနိုင်ငံဆိုင်ရာ မြန်မာသံရုံးကထုတ်ပြန်အသိပေးထားသည်။
နိုင်ငံကူးလက်မှတ်များ၏ တရားဝင်မှုသည် ကိုင်ဆောင်အသုံးပြုသူများအတွက် အရေးကြီးသော အခန်းကဏ္ဍမှ ပါဝင်သကဲ့သို့ ကိုင်ဆောင်အသုံးပြုရာတွင်လည်း တရားဝင်သက်တမ်းရှိမှု၊ ကိုင်ဆောင် အသုံးပြုခြင်းဆိုင်ရာ စည်းမျည်းစည်းကမ်းသတ်မှတ်ချက်များနှင့် ညီညွတ်မှုရှိရန် အရေးကြီးကြောင်း သံရုံး၏ အသိပေးချက်တွင် ပါရှိသည်။
ကိုရီးယားသမ္မတနိုင်ငံ၏ လူဝင်မှုကြီးကြပ်ရေးဌာနမှ တာဝန်ရှိသူများ အနေဖြင့်လည်း ပြည်ပနိုင်ငံသားများ ကိုင်ဆောင်ထားသော နိုင်ငံကူးလက်မှတ်များ၏ တရားဝင်မှု ရှိ/မရှိကို စစ်ဆေးကြပ်မတ်လျက်ရှိရာ၌ အချို့သော မြန်မာနိုင်ငံသားများ ကိုင်ဆောင်အသုံးပြုနေသည့် နိုင်ငံကူးလက်မှတ်များတွင် တံဆိပ်တုံးရိုက်နှိပ်ပြီး သက်တမ်းတိုးထားသည့်ကိစ္စနှင့်စပ်လျဉ်း၍ တရားဝင်မှုနှင့် စစ်မှန်မှု ရှိ/မရှိတို့ ကို မြန်မာသံရုံးသို့ ဆက်သွယ်မေးမြန်းမှုများ လုပ်ဆောင်လျက်ရှိကြောင်း ထုတ်ပြန်ချက်အရ သိရသည်။
ထိုသို့ ကိုရီးယား သမ္မတနိုင်ငံလူဝင်မှုကြီးကြပ်ရေးဌာနက ဆက်သွယ်မေးမြန်းမှုများအရ မြန်မာသံရုံးက စိစစ်ခဲ့ရာ အချို့သော နိုင်ငံကူးလက်မှတ်များတွင် တရားမဝင် တံဆိပ်တုံး အတုအပဖြင့် ရိုက်နှိပ်ကာ သက်တမ်းတိုးထားပြီးသကဲ့သို့ လုပ်ဆောင်ထားသည်ကို တွေ့ရှိရကြောင်း၊ ထို့ကြောင့် လူဝင်မှုကြီးကြပ် ရေးဌာနမှ တာဝန်ရှိသူများက အဆိုပါနိုင်ငံကူးလက်မှတ်ကိုင်ဆောင်အသုံးပြုသူများအား လေဆိပ်မှ ထွက်ခွာခွင့်ကို ငြင်းပယ်ကာ ထိန်းသိမ်းခဲ့သည့်ဖြစ်စဉ် မကြာသေးမီကာလ၌ ဖြစ်ပေါ်ခဲ့ရာ မြန်မာသံရုံး အနေဖြင့် ငြင်းပယ်ထိန်းသိမ်းခံရသူများအတွက် လိုအပ်သော ကောင်စစ်ဆိုင်ရာကိစ္စရပ်များကို ဆောင်ရွက်ပေးခဲ့ရကြောင်း သိရသည်။
သို့ဖြစ်၍ ကိုရီးယား သမ္မတနိုင်ငံသို့ ရောက်ရှိနေကြသော မြန်မာနိုင်ငံသားများအနေဖြင့် မိမိတို့၏ နိုင်ငံကူးလက်မှတ်များကို တရားဝင်သော နည်းလမ်းဖြင့်သာ သက်တမ်းတိုးခြင်းကို ဆောင်ရွက်ကြရန် နှင့် မလိုလားအပ်သော အခက်အခဲများ မဖြစ်ပေါ်စေရေးနှင့် ဥပဒေအရ အရေးယူခံရခြင်း မဖြစ်ပေါ်စေရေးတို့အတွက် သတိပြုလိုက်နာဆောင်ရွက်နိုင်ရန် သံရုံးက အသိပေးကြေညာထားသည်။
ထို့ပြင် တရားမဝင် တံဆိပ်တုံး အတုအပ အသုံးပြုနေသူများကိုလည်း ထိရောက်စွာ အရေးယူနိုင်ရေးအတွက် မြန်မာသံရုံးအနေဖြင့် ကိုရီးယားအာဏာပိုင်များနှင့် ဆက်လက် ညှိနှိုင်းဆောင်ရွက်လျက်ရှိကြောင်း သိရသည်။