နစက ဥက္ကဋ္ဌ ရုရှားနိုင်ငံရှိ ရေတပ်လေ့ကျင့်ရေးကျောင်းသို့သွားရောက်လေ့လာ
ရုရှားနိုင်ငံသို့ရောက်ရှိနေသည့် နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်နှင့်အဖွဲ့သည် စက်တင်ဘာ ၅ ရက်(ယနေ့)နံနက်ပိုင်းက Makarov Pacific Higher Naval School သို့သွား ရောက်လေ့လာခဲ့ကြသည်။
နစက ဥက္ကဋ္ဌအား Makarov Pacific Higher Naval School ၏ကျောင်းအုပ်ကြီး Rear-Admiral Vadimir Vasilievich BURAKOV နှင့်တာဝန်ရှိသူ များက ကြိုဆိုခဲ့ကြပြီးနောက် သင်တန်းကျောင်းအတွင်း သင်တန်းသားအဆောင်နှင့်ဌာနများဖြန့်ခွဲဆောင်ရွက်ထားရှိမှု၊နှစ်စဉ်သင်တန်း သားများကို စိစစ်ရွေးချယ်တက်ရောက်စေမှုနှင့်သင်တန်းသားများအား သင်တန်းနှစ်အလိုက်နှင့်ဘာသာရပ်အ လိုက်သင်ကြားလေ့ကျင့်ဆောင်ရွက်ပေးမှုနှင့်သင်တန်းသမိုင်းအကျဉ်းတို့အား ကျောင်းအုပ်ကြီးကရှင်းလင်းခဲ့သည်။
နစက ဥက္ကဋ္ဌသည် ရေတပ်လေ့ကျင့်ရေးကျောင်းအတွင်းရှိ စာသင်ခန်းများအတွင်း သင်ကြားမှုသင်ယူမှုအထောက်အကူပြုပစ္စည်းများ၊ Multimedia Room များဖြင့်စနစ်တကျလေ့ ကျင့်ပေးမှု၊အလုပ်ရုံများအတွင်း သင်တန်းသားများစက်မှု၊လက်မှုပညာရပ်များဖြင့် လက်တွေ့လေ့ကျင့်ဆောင်ရွက်နေမှုတို့အား လေ့လာခဲ့သည်။
သင်တန်းသားများ၏ စားရေး၊နေရေးနှင့်အုပ်ချုပ်မှုကိစ္စများအဆင်ပြေချောမွေ့စေရေးဖြည့်ဆည်းဆောင်ရွက်ပေးထားမှု၊စာကြည့်တိုက်ကို IT Technology စနစ်ဖြင့်ဆောင် ရွက်ထားရှိမှု၊သင်တန်းသားများကိုယ်တိုင်တီထွင်ထားသည့် ဆိုလာစနစ်သုံးရေယာဉ်စမ်းသပ်မောင်းနှင်မှု၊ကြံ့ခိုင်မှုဌာန၊အိပ်ဆောင်တို့ကိုလည်းလေ့လာခဲ့သည်။
ရေတပ်လေ့ကျင့်ရေးကျောင်းမှသင်တန်းသားများ၏ သိရှိလိုသည်များနှင့်အကြံ ပြုလိုသည်များအား မေးမြန်းမှုများကို နစက ဥက္ကဋ္ဌကပြန်လည်ဖြေကြားခဲ့သည်။
အဆိုပါ Makarov Pacific Higher Naval School ရေတပ်လေ့ကျင့်ရေးကျောင်းသည် ရုရှားနိုင်ငံကာကွယ်ရေးဝန်ကြီးဌာနအောက်ရှိ ရေတပ်လေ့ကျင့်ရေးကျောင်းများအနက် တစ်ခုဖြစ်ကာ ရုရှားနိုင်ငံ၏ Pacific Fleet အတွက် အရာရှိများအား ပြန်တမ်းဝင်အဖြစ်ခန့်အပ်ပေးလျက်ရှိပြီး ၁၉၃၇ ခုနှစ် နိုဝင်ဘာလ ၈ ရက်တွင်ရုရှားနိုင်ငံ၏ တတိယမြောက် ရေတပ်လေ့ကျင့်ရေးကျောင်းအဖြစ် ဖွင့်လှစ်ခဲ့ခြင်းဖြစ်သဖြင့် သက်တမ်းအားဖြင့် ၈၅နှစ်ရှိပြီဖြစ်သည်။
