နိုင်ငံရေးပါတီများ မှတ်ပုံတင်ခြင်း ဥပဒေသစ်အရ နိုင်ငံရေးပါတီအဖြစ် ဆက်လက်ရပ်တည်လိုသည့် ပါတီများအနေဖြင့် ရက်ပေါင်း (၆၀) အတွင်း မှတ်ပုံတင်ပြန်လည်လျှောက်ထားကြရမည်ဖြစ်ရာ လက်ရှိအချိန်ထိ မှတ်ပုံတင်လျှောက်ထားလာသည့်ပါတီ (၃၈) ပါတီရှိကြောင်း UEC ထံမှ သိရသည်။
ယခင်ဥပဒေအရ မှတ်ပုံတင်ထားသည့် ပါတီ (၉၀) ကျော် ရှိသည့်အနက်မှ ၂၀၂၃ ခုနှစ် မတ်လ (၂၂) ရက်အထိ ပါတီ (၃၈) ပါတီသာ မှတ်ပုံတင်ပြန်လည်လျှောက်ထားသေးကြောင်း UEC က သတင်းထုတ်ပြန်ထားသည်။
ပြည်ထောင်စု ရွေးကောက်ပွဲကော်မရှင်၏ ထုတ်ပြန်ချက်အရ မတ်လ (၂၂) ရက်တွင် NDF ပါတီအပါအဝင် နိုင်ငံရေးပါတီ (၅) ပါတီ မှတ်ပုံတင် ထပ်မံလျှောက်ထားလာကြောင်းလည်း သိရသည်။
လက်ရှိအချိန်ထိ မှတ်ပုံတင် ပြန်လည်လျှောက်ထားလာသည့် ပါတီ (၃၈) ပါတီအနက် ပြည်ထောင်စုအဆင့် စည်းရုံးမည့်ပါတီ(၉) ပါတီရှိပြီး ပြည်နယ်သို့မဟုတ် တိုင်းအဆင့်စည်းရုံးမည့်ပါတီမှာ ပါတီ(၂၉) ရှိကြောင်း သိရသည်။
လက်ရှိတွင် ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ၊ ဖက်ဒရယ်ဒီမိုကရက်တစ်ပါတီ၊ မြန်မာပြည်သူ့ဒီမိုကရက်တစ်ပါတီ (MPD)၊ ပြည်ထောင်စုဒီမိုကရေစီပါတီ (Union Democracy Party)၊ ပအိုဝ်းအမျိုးသားအဖွဲချုပ် (PNO) ၊ ဒီမိုကရက်တစ်အင်အားစုလေဘာပါတီ၊ ဒီမိုကရေစီပါတီသစ်(ကချင်) ၊ပြည်သူ့အကျိုးပြုကျောင်းသားများပါတီ၊ အမျိုးသားဒီမိုကရေစီပါတီသစ် တို့သည် နိုင်ငံရေးပါတီများမှတ်ပုံတင်ခြင်း ဥပဒေသစ်အရ မှတ်ပုံတင် ပြန်လည်လျှောက်ထား ထားကြောင်း သိရသည်။
ထို့အပြင် ဖလုံ-စဝေါ်ဒီမိုကရက်တစ်ပါတီ၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ၊တိုင်းရင်းသားစည်းလုံး ညီညွတ်ရေးပါတီ၊ ရခိုင့်ဦးဆောင်ပါတီ၊ ပြည်သူ့အင်အားပါတီ၊ဝံသာနုပါတီ၊ကချင်ပြည်နယ် ပြည်သူ့ပါတီ (KSPP) ၊ဒီမိုကရက်တစ်ပါတီ၊ လီဆူအမျိုးသားဖွံဖြိုးတိုးတက်ရေးပါတီ(ဒူးလေးပါတီ)၊တိုင်းလိုင်(ရှမ်းနီ)အမျိုးသားများ ဖွံဖြိုးတိုးတက်ရေးပါတီ၊ ရှမ်းနီ(တိုင်းလျန်)သွေးစည်း ညီညွတ်ရေးပါတီ [Shan-Ni Solidarity Party (S.S.P)] ၊ လူထုပါတီ (The Party for People) ၊ ခမီအမျိုးသားဖွံဖြိုးတိုးတက်ရေးပါတီ၊ ညီညွတ်သောတိုင်းရင်းသားလူမျိုးများ ဒီမိုကရေစီပါတီ(UNDP)၊ ရခိုင်ပြည်နယ်အမျိုးသားအင်အားစုပါတီ၊ ပြည်သူ့ရှေ့ဆောင်ပါတီ(PPP) တို့လည်း နစက၏ ပါတီမှတ်ပုံတင်ဥပဒေသစ်အရ ပြန်လည်လျှောက်ထားခဲ့ကြောင်း သိရသည်။
အလားတူ မွန်ညီညွတ်ရေးပါတီ၊ မြန်မာနိုင်ငံတောင်သူလယ်သမားဖွံဖြိုးတိုးတက်ရေးပါတီ၊ ပြည်သူ့အလုပ်သမားပါတီ၊ အာခါ အမျိုးသားဖွံဖြိုးတိုးတက်ရေးပါတီ၊ အမျိုးသားနိုင်ငံရေးဒီမိုကရက်တစ်ပါတီ၊ကချင်အမျိုးသားကွန်ဂရက်ပါတီ၊ ရခိုင်အမျိုးသားပါတီ၊ လူ့ဘောင်သစ်ပါတီ(NSP)၊ အမျိုးသားနိုင်ငံရေးမဟာမိတ်များအဖွဲ့ချုပ်ပါတီ၊ အင်းအမျိုးသား အဖွဲ့ချုပ်ပါတီ (Inn National League Party)၊ ကိုးကန့် ဒီမိုကရေစီနှင့် ညီညွတ်ရေးပါတီ (KKDUP) နှင့် အမျိုးသားဒီမိုကရေစီအင်အားစုပါတီ [National Democratic Force Party (NDF)]တို့လည်း နိုင်ငံရေးပါတီအဖြစ် ဆက်လက်ရပ်တည်ရန် ဆုံးဖြတ်ချက်ဖြင့် ပါတီမှတ်ပုံတင် ပြန်လည်လျှောက်ထားခဲ့ကြောင်း သိရသည်။
နစကက အသစ်ပြဌာန်းလိုက်သည့် နိုင်ငံရေးပါတီများ မှတ်ပုံတင်ခြင်း ဥပဒေအရ မှတ်ပုံတင် ပြန်လည်လျှောက်ထားရန် ကာလပေးထားချက်ဖြစ်သည့် ရက်ပေါင်း (၆၀) မှာ မကြာခင်ရက်ပိုင်းအတွင်း ပြည့်တော့မည်ဖြစ်သည့်အတွက် နိုင်ငံရေးပါတီအဖြစ် ဆက်လက်ရပ်တည်လိုသည့် ပါတီများအနေဖြင့် လာမည့် မတ်လ (၂၈) ရက်နောက်ဆုံးထား မှတ်ပုံတင်လျှောက်ထားကြရန် နစက ပြောရေး ဆိုခွင့်ရှိသူက ပြီးခဲ့သည့်ရက်ပိုင်းအတွင်းက ပြောကြားထားသည်။
