ဓါးစာခံအလောင်း မှားပို့သည့် ဟားမတ်စ်လုပ်ရပ်က အပစ်ရပ်သဘောတူညီချက်ကို ချိုးဖောက်ခြင်းဖြစ်ဟုဆို

စစ်သွေးကြွအုပ်စု၏ ကတိကဝတ်အရ ဟားမတ်စ်အဖွဲ့က ပြန်လွှဲပေးခဲ့သော ရုပ်အလောင်းတစ်လောင်းသည် ကလေးနှစ်ယောက်အမေ အစ္စရေးမိခင်မဟုတ်ဟု အာဏာပိုင်များက စစ်ဆေးဆုံးဖြတ်ပြီးနောက် အစ္စရေးဝန်ကြီးချုပ် နေတန်ယာဟုက ယင်းလုပ်ရပ်သည် အပစ်ရပ်သဘောတူညီချက်ကို ရက်စက်စွာ နှင့် စိတ်ယုတ်မာစွာ ချိုးဖောက်ခြင်းဖြစ်သဖြင့် ယင်းလုပ်ရပ် အတွက် လက်စားချေသွားမည်ဟု သောကြာနေ့တွင် ကတိပြုခဲ့သည်။

၁၅ လကျော်ကြာ စစ်ပွဲကို ရပ်ဆိုင်းထားကာ သဘောတူညီချက်အကောင်အထည်ဖော်မှု ပထမအဆင့် ပြီးမြောက်ခါနီးတွင် ယင်းဖြစ်ရပ်ကြောင့် အမှားအယွင်း အတိမ်းအစောင်း မခံသော အပစ်ရပ်စဲရေးသဘောတူညီချက်၏ အနာဂတ်နှင့်ပတ်သက်၍ သံသယအသစ်များ ဖြစ်စေခဲ့သည်။ သို့သော်လည်း ပါလက်စတိုင်း အကျဉ်းသား ရာနှင့်ချီကို သက်ရှိထင်ရှား အစ္စရေးဓါးစာခံ ခြောက်ဦးနှင့် လဲလှယ်မည့် သဘောတူညီချက်နောက်တစ်ဆင့်သည် ဆက်လက်၍ ဖြစ် မြောက်မည့် အရိပ်အယောင်များရှိနေသည်။

အစ္စရေးဓါးစာခံများနှင့် ပါလက်စတိုင်းများရှိနေသည့် ဧရိယာတစ်ခုကို အစ္စရေးက ဗုံးကြဲခဲ့ပြီးနောက် ရုပ်အလောင်းများ ရောနှောသွားခြင်းဖြစ်နိုင်သည်ဟု ဟားမတ်စ်က သောကြာနေ့တွင် ထုတ်ပြန်ဖြေရှင်းခဲ့ပြီး ယင်းကိစ္စကို စေ့စေ့စပ်စပ် ပြန်လည်သုံးသပ်သွားမည်ဟု ဆိုခဲ့သည်။

သောကြာနေ့အနှောင်းပိုင်းတွင်မူ ဂါဇာဒေသတွင်းမှ လူသေရုပ်အလောင်းအကြွင်းအကျန်များကို လက်ခံရရှိခဲ့ကြောင်းနှင့် ယင်းကို အစ္စရေးအာဏာပိုင်များထံ လွှဲပြောင်းပေးခဲ့ကြောင်း ကြက်ခြေနီအဖွဲ့က သတင်းထုတ်ပြန်ခဲ့သည်။ ယင်းရုပ်ကြွင်းများကို စစ်ဆေးအတည်ပြုရန်အတွက် အစ္စရေး၏ နိုင်ငံတော်မူခင်းဆေးပညာဓါတ်ခွဲခန်းသို့ ပို့ဆောင်သွားမည်ဟု မျှော်လင့်ရသည်။ အလောင်းစစ်ဆေး အတည်ပြုမှုသည် အချိန်မည်မျှကြာမည်ကို လတ်တလောတွင် မသိရသေးပေ။

ဟားမတ်စ်ခေါင်းဆောင် မာမွတ် မာဒါဝီကလည်း စစ်သွေးကြွများသည် အစ္စရေးမိခင် ရှီရီဘစ်ဘတ်စ် ၏ ရုပ်ကလာပ်ကို ကြက်ခြေနီအဖွဲ့ထံ လွှဲပြောင်းပေးခဲ့ပြီဖြစ်ကြောင်း ကာတာအခြေစိုက် အယ်လ်အာရေဗျ ရုပ်သံဌာနကို ပြောကြားခဲ့သည်။

Ref: အေပီ