အမေရိကန် သမ္မတ ဒေါ်နယ်ထရမ့်၏ ရုပ်ပုံပါဝင်မည့် ၂၅၀ တန် ဒေါ်လာငွေစက္ကူအသစ် ရို-က်နှိပ်ရန် ပြင်ဆင်မှုများ ပြုလုပ်နေကြောင်း အမေရိကန် ဘဏ္ဍာရေးဝန်ကြီး စကော့တ် ဘဲဆင့်တ်(Scott Bessent) က ပြောကြားလိုက်သည်။
အမေရိကန် ဥပဒေအရ သက်ရှိထင်ရှားရှိသူ မည်သူ့ကိုမျှ အမေရိကန် ငွေကြေးပေါ်တွင် ရုပ်ပုံထည့်သွင်းခွင့် မပြုထားသော်လည်း၊ လက်ရှိနှင့် သမ္မတဟောင်းများ၏ ရုပ်ပုံကို ထည့်သွင်းခွင့်ပြုရန် ကင်းလွတ်ခွင့်ပေးမည့် ဥပဒေကြမ်းတစ်ခုကို လွန်ခဲ့သည့်နှစ်က စတင်မိတ်ဆက် တင်ပြထားခဲ့သည်။
ယခု စီစဉ်နေသည့် ဒေါ်လာ ၂၅၀ တန် ငွေစက္ကူသည် ရာစုနှစ်တစ်ခုကျော်ကာလအတွင်း သက်ရှိထင်ရှားရှိသူတစ်ဦး၏ ရုပ်ပုံကို အမေရိကန် ငွေကြေးပေါ်တွင် ပထမဆုံးအကြိမ် ထည့်သွင်းခြင်း ဖြစ်လာမည်။
ကြာသပတေးနေ့က အိမ်ဖြူတော်တွင် ပြုလုပ်သည့် သတင်းစာရှင်းလင်းပွဲ၌ ဘဲဆင့်တ်က ပြောကြားရာတွင် ဥပဒေအပြောင်းအလဲ ဖြစ်လာနိုင်သည်ကို ကြိုတင်မျှော်မှန်းပြီး ဒီဇိုင်းပုံစံကို ပြင်ဆင်ထားခြင်းဖြစ်ကြောင်း ဆိုသည်။
“လက်ရှိမှာ သက်ရှိထင်ရှားရှိသူတစ်ဦးဖြစ်တဲ့ ဒေါ်နယ် ဂျေ ထရမ့်ကို ဒေါ်လာ ၂၅၀ တန် ငွေစက္ကူပေါ်မှာ ထည့်သွင်းနိုင်ဖို့ ပထမဆုံး လိုအပ်ချက်ကို ပြောင်းလဲပေးမယ့် ဥပဒေကြမ်းတစ်ခုကို အောက်လွှတ်တော်နဲ့ အထက်လွှတ်တော်တို့မှာ တင်ပြထားပါတယ်” ဟု ဘဲဆင့်တ်က ပြောကြားခဲ့သည်။
ထရမ့်က ခန့်အပ်ထားသည့် ဘဏ္ဍာရေးမှူးဘရန်ဒန် ဘိချ် သည် အမေရိကန် လွတ်လပ်ရေးကြေညာစာတမ်း ထုတ်ပြန်သည့် အနှစ် ၂၅၀ ပြည့် အထိမ်းအမှတ်အဖြစ် ငွေစက္ကူအသစ် ထုတ်ဝေရေးလုပ်ငန်းစဉ်ကို အရှိန်မြှင့် ဆောင်ရွက်ရန် ငွေစက္ကူနှင့် တံဆိပ်ခေါင်းရိုက်နှိပ်ရေးဗျူရို (Bureau of Engraving and Printing) ကို တိုက်တွန်းတွန်းအားပေးနေကြောင်း The Washington Post သတင်းစာက ဖော်ပြခဲ့ပြီးနောက် ဘဲဆင့်တ်က ယခုကဲ့သို့ မှတ်ချက်ပြု ပြောကြားခဲ့ခြင်းဖြစ်သည်။
“အနှစ် ၂၅၀ ပြည့် အထိမ်းအမှတ် ငွေစက္ကူပေါ်မှာ လက်ရှိ အမေရိကန်ပြည်ထောင်စုရဲ့ သမ္မတဖြစ်နေတဲ့သူရဲ့ ရုပ်ပုံကို ထည့်သွင်းတာဟာ မလျော်ကန်တာမျိုး ဘာမှမရှိဘူးလို့ ကျွန်တော် ထင်ပါတယ်” ဟု ဘဲဆင့်တ်က သတင်းထောက်များကို ပြောကြားခဲ့သည်။
The Washington Post သတင်းစာက ရရှိထားသည့် ဒီဇိုင်းပုံစံတူတွင် ၁၇၇၆ ခုနှစ် ဇူလိုင်လ ၄ ရက်နေ့က အမေရိကန်နိုင်ငံ လွတ်လပ်ရေး ကြေညာခဲ့ခြင်းကို အစွဲပြု၍ “America 250 anniversary” (အမေရိက နှစ် ၂၅၀ ပြည့် အထိမ်းအမှတ်) ဆိုသည့် စာသားများ ပါဝင်နေသည်ကို တွေ့ရသည်။