ဒုတိယ ဗိုလ်ချုပ်ကြီးရာပြည့် ဦးဆောင်သည့် ငြိမ်းချမ်းရေးဖော်ဆောင်မှု ညှိနှိုင်းရေးအဖွဲ့နှင့် နိုင်ငံရေးပါတီများအစုအဖွဲ့၏
အလုပ်အဖွဲ့တို့အကြား ၂၀၀၈ ဖွဲ့စည်းပုံ အခြေခံဥပဒေပြင်ဆင်ရေးကိစ္စ တွေ့ဆုံဆွေးနွေးမှုများ လုပ်ဆောင်ခဲ့ကြောင်း သိရသည်။
အဆိုပါ ဆွေးနွေးမှုကို ယနေ့ ဖေဖေါ်ဝါရီ (၁၇)ရက် နံနက်ပိုင်းက နေပြည်တော်ရှိ အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုဗဟိုဌာနတွင် လုပ်ဆောင်ခဲ့ခြင်းဖြစ်ကြောင်း သိရသည်။
ဆွေးနွေးပွဲတွင် ၂၀၀၈ ဖွဲ့စည်းပုံအခြေခံဥပဒေမှ ပြင်ဆင်လိုသည့် အချက်များနှင့် ပတ်သက်၍ ကျားဖြူပါတီ ဥက္ကဋ္ဌ ဦးစိုင်းအိုက်ပေါင်း ဦးဆောင်သည့် နိုင်ငံရေးပါတီများ အစုအဖွဲ့၏ အလုပ်အဖွဲ့မှ အဆိုပြုတင်ပြခဲ့ကြောင်း သိရသည်။
အဆိုပါ အဆိုပြု တင်ပြချက်များကို အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီက လေ့လာဆန်းစစ်ချက်များကို တစ်ချက်ချင်းအလိုက် အလွတ်သဘော ဆွေးနွေးခဲ့ကြကြောင်း သိရသည်။
ထို့အပြင် နိုင်ငံရေးပါတီများ မှတ်ပုံတင်ခြင်း ဥပဒေသစ်အရ နိုင်ငံရေးပါတီများ ပေါ်ပေါက်လာပါက လက်ရှိနိုင်ငံရေးပါတီများအစုအဖွဲ့၏ အလုပ်အဖွဲ့ အား ပြန်လည်ဖွဲ့စည်းနိုင်မည့် အခြေအနေများကိုလည်း ဆွေးနွေးခဲ့ကြကြောင်း သိရသည်။
ယင်းနောက် နှစ်ဖက်တွေ့ဆုံဆွေးနွေးမှုများအရ ရရှိလာသည့် သဘောထားများကို သဘောထားစုစည်းချက်များအဖြစ် မှတ်တမ်းတင်ခဲ့ကြကြောင်းလည်း သိရသည်။
