ခရိုင်ရုံးက ချမှတ်ခဲ့သော စီမံခန့်ခွဲမှုဒဏ်ကြေးကို ပေးဆောင်ရန် ပျက်ကွက်ခဲ့မှုကြောင့် အဆိုတော် Psy ၏ ဆိုးမြို့တော်ရှိ နေအိမ်ကို အာဏာပိုင်များက ယာယီသိမ်းဆည်းမှုလုပ်ခဲ့သည်ဟု ဒေသတွင်းမီဒီယာများက နိုဝင်ဘာ ၂၅ ရက်တွင် ဖော်ပြသည်။
Biz Hankook သတင်းဌာနက ဖော်ပြသည့် သတင်းအရ အသက် ၄၆ နှစ်အရွယ် ပေါပ့်ကြယ်ပွင့်၏ Yongsan-gu ရှိ နေအိမ်တွင် တရားမဝင် မွမ်းမံပြင်ဆင်မှုလုပ်ခဲ့ခြင်းအတွက် ခရိုင်ရုံးသို့ တိုင်ကြားခံခဲ့ရသည်ဟု ဆိုခဲ့သည်။
အဆိုပါနေအိမ်သည် ချမ်းသာကြွယ်ဝသော Hannam-dong ခရိုင်ရှိ ဇိမ်ခံတိုက်ခန်းအဆောက်အအုံမှ တိုက်ခန်းတစ်ခုဖြစ်ပြီး ယင်းတွင် Psy ၏ မိသားစုက ငှားရမ်းနေထိုင်ခဲ့ခြင်းဖြစ်ကာ ၂၀၂၀ ပြည့်နှစ်တွင် အိမ်သစ်သို့ ပြောင်းရွှေ့ခဲ့ကြသည်။
Psy အနေဖြင့် အိမ်တွင် ပြုလုပ်ထားသော ပြင်ဆင်မွမ်းမံထားမှုများကို ပြန်ဖျက်ပေးရန် သို့မဟုတ်ပါက ဒဏ်ကြေးပေးဆောင်ရန် ခရိုင်ရုံးက သတိပေးခဲ့သော်လည်း တစ်နှစ်ကျော်ကြာသည်အထိ လိုက်နာဆောင်ရွက်ခဲ့ခြင်းမရှိဟု ဆိုသည်။ မေလတွင် အိမ်ကို ခရိုင်ရုံးက သိမ်းဆည်းခဲ့သည်။
ယင်းနောက်တွင် Psy က အောက်တိုဘာလ၌ ဒဏ်ကြေးများ ပေးဆောင်ခဲ့သောကြောင့် အိမ်သည် အစိုးရ၏ သိမ်းဆည်းမှုမှ ပြန်ကင်းလွတ်ခဲ့သည်။
Psy ၏ အေဂျင်စီဖြစ်သော P Nation က ပြောဆိုရာတွင် တရားမဝင်ပြင်ဆင်မွမ်းမံမှုများကို ဆောက်လုပ်ရေးကုမ္ပဏီက လုပ်ဆောင်ခဲ့ခြင်းဖြစ်ကြောင်းနှင့် ယင်းကို ခရိုင်ရုံးက အကြောင်းကြားစာပို့မှသာ သူ သိရှိခဲ့ခြင်းဖြစ်ကြောင်း ဆိုခဲ့သည်။
အာဏာပိုင်များက ထုတ်ပြန်သော သတိပေးချက်နှင့် ပတ်သက်၍ Psy သည် နောက်ကျစွာ ဆောင်ရွက်ခဲ့သောကြောင့် ဒဏ်ကြေးပေးဆောင်ရန် နှောင့်နှေးခဲ့ရခြင်းဖြစ်သည်ဟုလည်း အေဂျင်စီက ပြောဆိုခဲ့သည်။
သူနှင့် အိမ်ရာရှိ အခြားအိမ်ပိုင်ရှင်များသည် တရားမဝင် မွမ်းမံဆောက်လုပ်မှုများကို ပြန်လည်ဖျက်သိမ်းရန်အတွက် Yongsan-gu ရုံးနှင့် ပူးပေါင်းဆောင်ရွက်နေသည်ဟုလည်း အေဂျင်စီက ဆက်လက်ပြောဆိုခဲ့သည်။