ရန်ကုန်၊ စက်တင်ဘာ ၅
ရန်ကုန်တိုင်းဒေသကြီး၊ ဒဂုံမြို့သစ် မြောက်ပိုင်းမြို့နယ်ရှိ သီတဂူ စက္ခုဒါနဆေးရုံတွင် (၁၉) ကြိမ်မြောက် သီတဂူ မျက်စိအလှူတော် အစီအစဉ်အဖြစ် မျက်စိဝေဒနာရှင်များကို အခမဲ့ စမ်းသပ်စစ်ဆေး ခွဲစိတ်ကုသပေးခြင်းများ ဆောင်ရွက်ပေးလျက်ရှိကြောင်း သိရသည်။
အဆိုပါ (၁၉) ကြိမ်မြောက် မျက်စိအလှူတော် အစီအစဉ်တွင် စက်တင်ဘာလ ၁ ရက်မှ ၂ ရက်နေ့အထိ မျက်စိဝေဒနာရှင်များကို စမ်းသပ်စစ်ဆေးပေးခဲ့ပြီး စက်တင်ဘာလ ၃ ရက်မှ ၇ ရက်နေ့အထိ ခွဲစိတ်ကုသပေးခြင်းများကို ဆောင်ရွက်ပေးသွားမည်ဖြစ်သည်။ လက်ရှိတွင် မျက်စိဝေဒနာရှင် ၁,၃၀၀ ဦး စာရင်းပေးသွင်းထားကြောင်း သိရသည်။
“မျက်စိအခမဲ့ ခွဲစိတ်ကုသမှု ခံယူထားသူတွေကို အမြင်အာရုံ ကောင်းမကောင်း၊ ထည့်ပေးထားတဲ့ မှန်ဘီလူးတွေ စောင်းတာ၊ နေရာလွဲတာရှိမရှိနဲ့ မျက်စိအောင့်၊ မျက်စိကိုက်တာတွေကို အထူးကု ဆရာဝန်ကြီးတွေက သေချာစစ်ဆေးပေးပြီး လိုအပ်တဲ့ ဆေးဝါးတွေကို ရက်သတ်မှတ်ပြီး ဆက်လက် ထုတ်ပေးသွားမှာပါ” ဟု တာဝန်ရှိသူတစ်ဦးက ပြောသည်။
သီတဂူ ဆရာတော်ကြီးသည် ၁၉၉၃ ခုနှစ် မတ်လ ၁၄ ရက်တွင် စစ်ကိုင်းတောင်ရိုး၌ သီတဂူ အာယုဒါန ဆေးရုံတော်ကို စတင်ဖွင့်လှစ်ခဲ့ပြီး လက်ရှိတွင် တိုင်းနှင့်ပြည်နယ်အသီးသီး၌ သီတဂူ ဆေးရုံတော်ပေါင်း ၄၄ ရုံအထိ ဖွင့်လှစ်ပေးထားနိုင်ခဲ့ကြောင်း သိရသည်။
ထို့အပြင် ယနေ့အထိ သီတဂူဆေးရုံတော်များတွင် မျက်စိဝေဒနာရှင် စုစုပေါင်း ၂ သိန်းကျော်ကို ကြည့်ရှုကုသပေးနိုင်ခဲ့ပြီး ဝေဒနာရှင် ၅ သောင်းခန့်အား မျက်စိအလင်းဒါန ပေးနိုင်ခဲ့ကြောင်းလည်း သိရသည်။