သဘင်အနုပညာရှင်ကြီးများလည်းဆို၊က၊ရေး၊တီး ပွဲအတွက်ပါဝင်ဆွေးနွေး
လာမည်(၂၆)ကြိမ်မြောက် မြန်မာရိုးရာယဉ်ကျေးမှု အဆို၊အက၊အရေး၊အတီး ပြိုင်ပွဲကို
မြန်မာနိုင်ငံသားတို့၏ အမျိုးသားယဉ်ကျေးမှုလက္ခဏာများကို ထင်ဟပ်ဖော်ပြနေသည့် ပြိုင်ပွဲတစ်ရပ်ဖြစ်စေရန် ဆောင်ရွက်သွားရမည်ဖြစ်ကြောင်း နိုင်ငံတော်ဝန်ကြီးချုပ် ဦးညိုစော ကပြောသည်။
ယနေ့စက်တင်ဘာ(၃)ရက်နေ့တွင် ကျင်းပသည် (၂၆)ကြိမ်မြောက် မြန်မာရိုးရာယဉ်ကျေးမှု အဆို၊အက၊အရေး၊အတီး ပြိုင်ပွဲ ကျင်းပရေး ဦးစီးကော်မတီ ပထမအကြိမ် လုပ်ငန်းညိနှိုင်းအစည်းအဝေးတွင် ကော်မတီနာယက နိုင်ငံတော်ဝန်ကြီးချုပ် ဦးညိုစော က အထက်ပါအတိုင်းပြောကြားခဲ့ခြင်းဖြစ်သည်။
ညဏ်ရည်ညဏ်သွေးထက်မြက်ခြင်းသာမက ယဉ်ကျေးသိမ်မွေ့ခြင်းများနှင့်ပါပြည့်စုံသည့် မျိုးဆက်သစ်လူငယ်များ ပေါ်ထွန်းလာစေရေးအတွက် ကြိုပမ်းဆောင်ရွက်ကြရာတွင် မြန်မာ့ရိုးရာယဉ်ကျေးမှု အဆို၊အက၊အရေး၊အတီး ပြိုင်ပွဲကြီးများကို ကျင်းပပြုလုပ်ခြင်းသည် မြန်မာအနုပညာ ကို ဖွံ့ဖြိုးတိုးတက်စေရုံသာမက ထူးခြားပြီး အနက်အဓိပ္ပာယ်ပြည့်ဝလှသည့် မြန်မာ့အနုပညာကို ကမ္ဘာကပင် တွေ့မြင်ကြရမည်ဖြစ်ကြောင်းလည်း ဝန်ကြီးချုပ် ဦးညိုစောက ပြောသည်။
နိုင်ငံတော် အနေဖြင့် မြန်မာ့ရိုးရာယဉ်ကျေးမှု အနုသုခုမ ဆိုင်ရာပညာရပ်များကို မြတ်နိုးတန်ဖိုးထားပြီး ထိန်းသိမ်းစောင့်ရှောက် လက်ဆင့်ကမ်းနေကြသည့် ပညာရှင်ကြီးများ နှင့် တိုင်းဒေသကြီးနှင့်ပြည်နယ်အသီးသီးတွင် ရှိကြသည့် ဝါသနာရှင်မျိုးဆက်သစ်လူငယ်များ ၏ ကြိုးပမ်းအားထုတ်မှုများကို အလေးလက်နက်ထားပြီး ပြိုင်ပွဲကြီးများကိုလည်း နှစ်စဉ်နှစ်တိုင်း စဉ်ဆက်မပြတ်ကျင်းပနေကြောင်း သိရသည်။
အဆိုပါ အစည်းအဝေးကို ပြည်ထောင်စုဝန်ကြီးများ၊နေပြည်တော်ကောင်စီ ဥက္ကဌ ၊ ဒုတိယဝန်ကြီးများ ၊တိုင်းဒေသကြီးနှင့်ပြည်နယ် အစိုးရအဖွဲ့ဝင် ဝန်ကြီးများ၊အမြဲတန်းအတွင်းဝန်များ၊ဘာသာရပ်ဆိုင်ရာ အကဲဖြတ်ပညာရှင်များ ဌာနဆိုင်ရာအကြီးအကဲများနှင့်အတူသဘင်အနုပညာရှင်ကြီးများလည်းတက်ရောက်ဆွေးနွေးခဲ့ကြောင်း သိရသည်။