ထိုင်းရောက်မြန်မာအလုပ်သမားအချို့ စာရွက်စာတမ်းအတုများဖြင့် လိမ်လည်တင်ပြ၍ လျော်ကြေးငွေတောင်းခံမှုများရှိနေ

ထိုင်းနိုင်ငံတွင်ရောက်ရှိ အလုပ်လုပ်ကိုင်နေစဉ်အတွင်း လုပ်ငန်းခွင်မတော်တဆမှုများအပါအဝင် အကြောင်းအမျိုးမျိုးကြောင့် ကွယ်လွန်ဆုံးပါးသွားပါက ရသင့်ရထိုက်သည့် လျော်ကြေးငွေရရှိနိုင်ရေးအတွက် လုပ်ဆောင်ပေးသော်လည်း စာရွက်စာတမ်းအတုများဖြင့် လိမ်လည်တင်ပြ၍ လျော်ကြေးငွေတောင်းခံမှုများရှိနေကြောင်း မြန်မာသံရုံး၊ ဗန်ကောက်မြို့ကအသိပေးထားသည်။

မြန်မာအလုပ်သမားများ ထိုင်းနိုင်ငံတွင်ရောက်ရှိ အလုပ်လုပ်ကိုင်နေစဉ်အတွင်း လုပ်ငန်းခွင်မတော်တဆမှုများအပါအဝင်အကြောင်းအမျိုးမျိုးကြောင့် ကွယ်လွန်ဆုံးပါးသွားပါက ထိုင်းနိုင်ငံအတွင်း ၎င်းတို့၏မိသားစုဝင်များမှ ရသင့်ရထိုက်သည့် လျော်ကြေးငွေရရှိနိုင်ရေးအတွက် ၎င်းတို့တင်ပြလာသော စာရွက်စာတမ်းများအား စိစစ်ပြီး မြန်မာသံရုံးမှ လျော်ကြေးတောင်းခံခြင်းထောက်ခံစာ ထုတ်ပေးလျက်ရှိသည်။

ယင်းသို့ ထုတ်ပေးလျက်ရှိရာတွင် အချို့သည် စာရွက်စာတမ်းများအတုများဖြင့် လိမ်လည်တင်ပြ၍ လျော်ကြေးငွေ တောင်းခံခြင်းအတွက်ထောက်ခံစာ လာရောက်လျှောက်ထားမှုများရှိနေကြောင်း တွေ့ရှိရသည်ဟုဆိုသည်။

ယင်းတွင် ထိုင်းနိုင်ငံ၌ ၃-၁၁-၂၀၂၅ ရက်နေ့က ယာဉ်မတော်တဆမှုကြောင့် ကွယ်လွန်ဆုံးပါးခဲ့သည့် မြန်မာအလုပ်သမား မောင်အောင်မြင့်ဦးအတွက် ရသင့်ရထိုက်သည့် လျော်ကြေးငွေရရှိနိုင်ရေးအတွက် ၎င်း၏ဇနီးဆိုသူ မနှင်းချိုမှ ၂၅-၁၁-၂၀၂၅ ရက်နေ့တွင် မြန်မာသံရုံး၌ ထောက်ခံစာလာရောက် လျှောက်ထားခဲ့သည်။

၎င်းတင်ပြလာသော စာရွက်စာတမ်းပါ အချက်အလက်များအား မြန်မာသံရုံးရှိ မှတ်တမ်းနှင့် တိုက်ဆိုင်စိစစ်ခဲ့ရာ အချက်အလက်များကွဲလွဲနေကြောင်း စစ်ဆေးတွေ့ရှိရသဖြင့် ကာယကံရှင်ကိုယ်တိုင် စာရွက်စာတမ်း မူရင်းများနှင့်တကွ မြန်မာသံရုံး၌ လာရောက်ရှင်းလင်းတင်ပြရန် မနှင်းချိုထံဆက်သွယ်အသိပေးခဲ့သော်လည်း ယနေ့တိုင် လာရောက်ဖြေရှင်းခြင်းမရှိကြောင်း သိရသည်။

သို့ဖြစ်ပါ၍ မနှင်းချိုအနေဖြင့် စာရွက်စာတမ်းမူရင်းများနှင့်တကွ မြန်မာသံရုံး (ဗန်ကောက်မြို့) သို့ အသိပေးကြေညာချက်ထုတ်ပြန်သည့်နေ့မှ ၁၉-၁၂-၂၀၂၅ ရက်နေ့အတွင်း လာရောက်ဖြေရှင်းရန် ထပ်မံအသိပေးထားသည်။

ထို့အတူ စာရွက်စာတမ်းအတုအပ ကိုင်ဆောင်သူ၊ အတုအပပြုလုပ်ပေးသူများကို စစ်ဆေးတွေ့ရှိပါက မြန်မာသံရုံးအနေဖြင့် သက်ဆိုင်ရာအာဏာပိုင်များနှင့် ပူးပေါင်း၍ လိုအပ်သည့်အရေးယူဆောင်ရွက်မှုများ ပြုလုပ်သွားမည်ဖြစ်ကြောင်း သိရသည်။