ထိုင်းနိုင်ငံရှိ အီလက်ထရောနစ် စက်ရုံတွင် သွားရောက်အလုပ်လုပ်ကိုင်နေသည့် မြန်မာလုပ်သား ၁၀၀၀ ကျော်ကို ထိုင်းလုပ်ငန်းရှင်က လျှော်ကြေးပေးပြီး နေရပ်ပြန်လိုသူများအား မြဝတီနယ်စပ်သို့ ပြန်ပို့ပေးမည်ဖြစ်ကြောင်း သိရသည်။
ထိုင်းနိုင်ငံရှိ ဖစ်ဘူရီခရိုင်နှင့် စမွတ်စခွန်ခရိုင်တို့ရှိ Cal-Comp Electronics အီလက်ထရောနစ် စက်ရုံတို့တွင် အလုပ်လုပ်ကိုင်နေသည့် မြန်မာအလုပ်သမားများသည် အဆိုင်း (၃) ဆိုင်းဖြင့် လုပ်ကိုင်နေရာမှ (၂) ဆိုင်းဖြင့် လုပ်ကိုင်လိုခြင်းကြောင့် ဆန္ဒပြမှုများဖြစ်ပွားခဲ့ခြင်းကြောင့် ထိုင်းနိုင်ငံရှိ မြန်မာအလုပ်သမား သံအရာရှိရုံးက ကြားဝင်ညှိနှိုင်းပေးခဲ့ရခြင်း ဖြစ်သည်။
ယင်းသို့ ညှိနှိုင်းရာတွင် အလုပ်သမားများ၏ ဆန္ဒအရ (၂) ဆိုင်းဖြင့် လုပ်ကိုင်မည်ဆိုပါက (၁) ဆိုင်းစာ ဦးရေအား လျှော့ချရမည်ဖြစ်ကြောင်း စက်ရုံဖက်မှ အသိပေးကြောင်း သိရသည်။
စက်ရုံဖက်မှ ယင်းကဲ့သို့ အသိပေးခဲ့သည့်အတွက် အလုပ်သမားများအကြား ဆန္ဒမဲပြုကြရာတွင် ဖစ်ဘူရီခရိုင် စက်ရုံမှ အလုပ်သမားများနှင့်ညှိနှိုင်းမှုအဆင်ပြေခဲ့ပြီး စမွတ်စခွန် ခရိုင်ရှိ စက်ရုံမှ အလုပ်သမားများ၏ ၈၅ ရာခိုင်နှုန်းက အဆိုင်း (၂) ဆိုင်းဖြင့် လုပ်ကိုင်ရန် ရွေးချယ်မှုကြောင့် အလုပ်သမား (၁၀၅၇) ဦးကို အလုပ်မှ ထုတ်ပယ်ခဲ့ခြင်းဖြစ်ကြောင်း သိရသည်။
အဆိုပါ စမုစခွန်ခရိုင်ရှိ စက်ရုံမှ အလုပ်ထုတ်ခံရသည့် မြန်မာလုပ်သား (၁၀၅၇) ဦးကို ဥပဒေနှင့် အညီ လျော်ကြေးပေးအပ်ခဲ့ရာ အနည်းဆုံး ဘတ် (၁၉၄၁၅) ဘတ်မှ အမြင့်ဆုံး (၉၆၃၆၉) ဘတ်အထိရရှိခဲ့ကြပြီး နေရပ်ပြန်လိုသူများကို အလုပ်ရှင်အနေဖြင့် မဲဆောက်နယ်စပ်အထိ ပို့ဆောင်၍ မြန်မာနိုင်ငံရှိ နေရပ်ဒေသ ခရီးအကွာအဝေးအလိုက် ခရီးစရိတ်များ ထောက်ပံ့ပေးမည်ဖြစ်ကြောင်း မြန်မာအလုပ်သမား သံအရာရှိရုံးမှ သိရသည်။
လက်ရှိတွင် ထိုင်း/မြန်မာ အေဂျင်စီများက ထိုင်းနိုင်ငံအတွင်းရှိ စက်ရုံများတွင် ပြန်လည်လုပ်ကိုင်လိုသူ၊ နေရပ်ပြန်လိုသူ၊ အလုပ်ပြောင်းရွှေ့စာရရှိလိုသူ(အလုပ်သစ်ရရှိလိုသူ၊ အခြားဆန္ဒရှိသူများ)စာရင်း ကောက်ခံလျှက်ရှိကြောင်း သိရသည်။
အဆိုပါ စာရင်းများရရှိပါက စာရင်းခွဲခြား၍ လိုအပ်သည်များကို ဆက်လက်ညှိနှိုင်းဆောင်ရွက်ပေးသွားမည်ဖြစ်သည့်အတွက် အလုပ်သမားများအနေဖြင့် ထိုင်း/မြန်မာအေဂျင်စီများထံ (မိမိတို့) ဆန္ဒရှိသည့်အတိုင်း စာရင်းပေးသွင်းနိုင်ကြောင်း အလုပ်သမားသံအရာရှိရုံးက ထုတ်ပြန်ထားသည်။
