ထိုင်းကာကွယ်‌ရေးစီးချုပ်နှင့် တရုတ်ကာကွယ်ရေးဝန်ကြီး တွေ့ဆုံ

တရုတ်နိုင်ငံ ကာကွယ်ရေးဝန်ကြီး Dong Jun သည် ထိုင်းဘုရင့်တပ်မတော် ကာကွယ်ရေးဦးစီးချုပ် Songwit Noonpackdee နှင့် သောကြာနေ့က ပေကျင်းတွင် တွေ့ဆုံခဲ့သည်။

ယင်းသို့ တွေ့ဆုံမှုအတွင်း တရုတ်နှင့် ထိုင်းနိုင်ငံတို့၏ လေးနက်သော ချစ်ကြည်ရင်းနှီးမှုသည် မိသားစုတစ်စုတည်းဖြစ်သည့်အပြင် နှစ်နိုင်ငံစစ်ရေး ပူးပေါင်းဆောင်ရွက်မှုများ၏ ခိုင်မာသောအခြေခံအုတ်မြစ် ဖြစ်ကြောင်းကို ပြောကြားလိုက်ပြီး အောင်မြင်မှု အသီးအပွင့်များကို Dong က ချီးကျူးပြောဆိုခဲ့သည်။

လက်ရှိပူးပေါင်းဆောင်ရွက်မှု ယန္တရားကို အပြည့်အဝအသုံးချရန်၊ စစ်ရေးပူးတွဲလေ့ကျင့်မှုများနှင့် တပ်ဖွဲ့ဝင်လေ့ကျင့်ရေးကဲ့သို့ နယ်ပယ်များတွင် ပူးပေါင်းဆောင်ရွက်မှုကို မြှင့်တင်ရန်နှင့် ဘုံအနာဂတ်ဖြင့် တရုတ်-ထိုင်း အသိုက်အဝန်းကို တည်ဆောက်ရာတွင် အထောက်အပံ့ဖြစ်စေရေးအတွက် ထိုင်းနိုင်ငံနှင့် လက်တွဲဆောင်ရွက်သွားရန် တရုတ်နိုင်ငံက ဆန္ဒရှိပါကြောင်း Dong က ပြောကြားခဲ့သည်။

ထိုင်းနှင့် တရုတ်နိုင်ငံတို့သည် ချစ်ကြည်ရင်းနှီးသော အိမ်နီးချင်းများဖြစ်ကြပြီး ထိုင်းနိုင်ငံအနေဖြင့် တရုတ်တစ်နိုင်ငံတည်း မူဝါဒကို အစဉ်အမြဲလိုက်နာကိုင်စွဲကြောင်း Songwit က ပြောဆိုသည်။ ထိုင်းစစ်တပ်သည် နယ်ပယ်စုံတွင် တရုတ်နိုင်ငံနှင့် လက်တွေ့ကျသော အပြန်အလှန်ဆောင်ရွက်မှုများနှင့် ပူးပေါင်းဆောင်ရွက်မှုကို ပိုမိုခိုင်မာစေရန်၊ နိုင်ငံစုံရေးရာများတွင် ပူးပေါင်းဆောင်ရွက်မှု အားကောင်းစေရန်နှင့် ဒေသတွင်း လုံခြုံရေး၊ တည်ငြိမ်ရေးတို့ကို ပူးတွဲထိန်းသိမ်းရန် ဆန္ဒရှိပါကြောင်း ၎င်းက ဆက်လက်ပြောကြားခဲ့သည်။

Ref: ရှင်းဟွာ