ထိုင်ဝမ်အရေး ကန်နှင့် တရုတ်နိုင်ငံခြားရေးဝန်ကြီးနှစ်ဦး အချေအတင်ဖြစ်

အမေရိကန်နိုင်ငံခြားရေးဝန်ကြီး မာကိုရူဘီယိုသည် ထိုင်ဝမ်အရေးနှင့် ပတ်သက်၍ တရုတ်နိုင်ငံခြားရေးဝန်ကြီး ဝမ်ယိနှင့် သောကြာနေ့တွင် စကားအချေအတင်ဖြစ်ခဲ့ပြီး ပေကျင်း၏ အတင်းအကြပ်လုပ်ရပ်များအပေါ် ထရမ့်ပ်၏ ထိပ်တန်းသံတမန်က ရှုတ်ချခဲ့သည်။

ထရမ့်ပ်၏ အစိုးရသည် အမေရိကန်အကျိုးစီးပွားများကို တိုးတက်စေပြီး အမေရိကန်ပြည်သူများကို ပထမဦးစားပေးသောမူဖြင့် တရုတ်နိုင်ငံနှင့် ဆက်ဆံသွားလိမ့်မည်ဖြစ်ကြောင်း ဖုန်းခေါ်ဆိုမှုတွင် ရူဘီယိုက ဝမ်ကို ပြောဆိုခဲ့သည်ဟု နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တမ်မီဘရုစ်က ပြောကြားသည်။

ဒေသတွင်းရှိ ၎င်း၏ မဟာမိတ်များအပေါ် အမေရိကန်၏ ကတိကဝတ်နှင့်ပတ်သက်၍ နိုင်ငံခြားရေးဝန်ကြီးက အလေးပေးပြောကြားသကဲ့သို့ ထိုင်ဝမ်နှင့် တောင်တရုတ်ပင်လယ်ဒေသတွင် တရုတ်နိုင်ငံ၏ အကျပ်ကိုင်သောလုပ်ဆောင်ချက်များကို အလွန်စိုးရိမ်ကြောင်းပြောခဲ့သည်ဟု သူက ဆက်လက်ပြောကြားသည်။

တရုတ်ပိုင်နက်တစ်ခုဖြစ်ပြီး လိုအပ်ပါက အင်အားသုံး၍ပေါင်းစည်းစေရနိုင်သည်ဟု ဆိုထားသော ထိုင်ဝမ်အရေးနှင့်ပတ်သက်၍ ဝမ်က ရူဘီယိုကို တုန့်ပြန်သတိပေးပြောဆိုခဲ့သည်။

ထိုင်ဝမ်က တရုတ်နိုင်ငံမှ ခွဲထွက်ခြင်းကို မည်သည့်အခါမျှ ခွင့်ပြုမည်မဟုတ်ကြောင်း ဝါရှင်တန်သည် တရုတ်တစ်နိုင်ငံတည်းမူဝါဒကို အသိအမှတ်ပြုထားသော ကတိကဝတ်ကို ဖောက်ဖျက်၍မရကြောင်း ဝမ်က ရူဘီယိုကို ပြောဆိုခဲ့သည်ဟု တရုတ်နိုင်ငံခြားရေးဝန်ကြီးဌာန၏ သတင်းထုတ်ပြန်ချက်တွင် ဖော်ပြခဲ့သည်။

အမေရိကန်အထက်လွှတ်တော်အမတ်ဟောင်းအနေဖြင့် တရုတ်နှင့် အမေရိကန်ပြည်သူများ၏ အနာဂတ်၊ ကမ္ဘာ့ငြိမ်းချမ်းရေး၊ တည်ငြိမ်ရေးတို့အတွက် အပြုသဘောဆောင်သော အခန်းကဏ္ဍမှ ပါဝင်ဆောင်ရွက်မည်ဟု မျှော်လင့်ကြောင်းလည်း ဝမ်က ပြောဆိုခဲ့သည်။

၎င်းတို့နှစ်ဦးအကြား ဖုန်းခေါ်ဆိုမှုတွင် ကမ္ဘာ့ထိပ်တန်းစီးပွားရေးအင်အားကြီးနှစ်နိုင်ငံအနေဖြင့် ခေတ်သစ်တွင် အတူတကွလျှောက်လှမ်းရန် နည်းလမ်းမှန်ကို ရှာဖွေသင့်သည်ဟုလည်း ဝမ်က ရူဘီယိုကို ပြောဆိုခဲ့သည်။

Ref: ဖရန့်စ် 24