ထိုင်ဝမ်ပဋိပက္ခဖြစ်လာပါက အမေရိကအနေဖြင့် ဖိလစ်ပိုင်စစ်အခြေစိုက်စခန်းများအားအသုံးပြုနိုင်ဟုဖိလစ်ပိုင်သံအမတ်ဆို

ထိုင်ဝမ်ပဋိပက္ခဖြစ်လာပါက အမေရိကအနေဖြင့် ဖိလစ်ပိုင်စစ်အခြေစိုက်စခန်းများအားအသုံးပြုနိုင်ဟုဖိလစ်ပိုင်သံအမတ်ဆို

ထိုင်ဝမ်-တရုတ်အကျပ်အတည်းတွင် ဖိလစ်ပိုင်အနေဖြင့် ထိုင်ဝမ်အကျပ်အတည်းကယခုထက်ပိုမိုဆိုးရွားလာသည်ရှိသော် အမေရိကန်တပ်ဖွဲ့များအား ၎င်း၏စစ်အခြေစိုက်စခန်းများကို အသုံးပြုခွင့်ပေးမည်ဟုပြောကြားထားသည်။

အမေရိကန်ပြည်ထောင်စုဆိုင်ရာ ဖိလစ်ပိုင်သံအမတ်ကြီးဟိုဆေးမန်နျူဝယ်လ် ရိုမြူဝယ်လ်ဒေး  က၎င်း၏ထုတ်ပြန်ချက်တွင် “ကျွန်တော်တို့အတွက် ကိုယ့်လုံခြုံရေးအတွက်အရေးကြီးပါတယ်” ဟုဆိုခဲ့သည်။ သံအမတ်ကြီးသည် သမ္မတ ဖာဒီနန်မားကို့စ်ဂျူနီယာ၏ ဆွေမျိုးတစ်ဦးဖြစ်ပြီး မနီလာတွင် ဩဇာကြီးမားသည်ဟုသိရသည်။

“စစ်ပွဲတွေ ထိပ်တိုက်ရင်ဆိုင်မှုတွေကို ဘယ်သူမှမဖြစ်စေချင်ပါဘူး၊တွေ့ဆုံဆွေးနွေးမှုတွေ ပိုမိုပြုလုပ်ခြင်းအားဖြင့် တင်းမာမှုတွေကိုလျှော့ချဖို့ နှစ်နိုင်ငံလုံးကိုတောင်းဆိုလိုပါတယ်။ အခုလိုပြဿနာအားလုံးကို ဖြေရှင်းဖို့ကြိုးပမ်းနေရတာဟာ ကျွန်တော်တို့ကမ္ဘာကြီးရဲ့တစ်စိတ်တစ်ပိုင်းဖြစ်နေလို့ပါပဲ” ဟု သံအမတ်ကြီးကထပ်လောင်းပြောကြားသွားသည်။

ဖိလစ်ပိုင်ပိုင်နက်အတွင်း အမေရိကန်တပ်ဖွဲ့ဝင်များ အသုံးပြုနိုင်သည့် စစ်အခြေစိုက်စခန်းအရေအတွက် တိုးမြှင့်ရန်အတွက်လည်း မနီလာနှင့်ဝါရှင်တန်တို့ဆွေးနွေးနေပြီဖြစ်ကြောင်းလည်း အထူးသံအမတ်ကြီးကပြောကြားခဲ့ပြီး “ကျွန်တော်တို့စစ်တပ်နဲ့အမေရိကန်စစ်တပ်က ဖြစ်နိုင်ခြေရှိတဲ့နယ်ပယ်တွေကို ရှာဖွေနေပါတယ်” ဟုလည်း ပြောကြားခဲ့သည်။

သံအမတ်ကြီး၏ကြေငြာချက်သည် တရုတ်အားစိတ်ပျက်စေခဲ့သည့် အမေရိကမှထိုင်ဝမ်သို့ ဒေါ်လာ ၁ ဘီလီယံကျော်လက်နက်များ ရောင်းချကြောင်း ဘိုင်ဒင်အစိုးရ၏ကြေငြာချက်ပြီးနောက် ထွက်ပေါ်လာခဲ့ခြင်းဖြစ်သည်။ထို့အပြင်ပြီးခဲ့သည့် သီတင်းပတ်တွင် အမေရိကန်စစ်သင်္ဘောနှစ်စင်းသည် ထိုင်ဝမ်ရေလက်ကြားကိုဖြတ်သန်းခဲ့သည်။

ထိုင်ဝမ်နှင့်ဝေးဝေးနေရန် ပေကျင်းကဝါရှင်တန်အား ထပ်ခါတလဲလဲသတိပေးခဲ့ပြီး “တရုတ်တစ်ပြည်တည်းမူဝါဒ”  ကို ဝင်ရောက်စွက်ဖက်ခြင်းမပြုရန်လည်းသတိပေးခဲ့သည်။သို့သော် ဩဂုတ်လကတည်းက ဝါရှင်တန်သည် ထိုင်ဝမ်သို့ကိုယ်စားလှယ်များမကြာခဏစေလွှတ်ကာ ချဉ်းကပ်မှုများပြုလုပ်ခဲ့သည်။

ဝိုင်ယိုသတင်းများအရ အမေရိကန်အောက်လွှတ်တော်ဥက္ကဌ နန်စီပေလိုစီ၏ ခရီးစဉ်သည် ၂၅ နှစ်အတွင်း အမေရိက၏ ထိပ်တန်းအရာရှိတစ်ဦး၏ ပထမဆုံးခရီးစဉ်ဖြစ်ပြီး သူ၏နောက်တွင် အမေရိကန်လွှတ်တော်အမတ်များတိုင်ပေသို့ ဆက်တိုက်သွားရောက်လည်ပတ်ခဲ့သည်။

အမေရိကန်အထက်လွှတ်တော်အမတ် မာရှာဘလက်ဘန်းသည် ထိုင်ဝမ်သို့ပြီးခဲ့သည့်လအနှောင်းပိုင်းက သွားရောက်လည်ပတ်ခဲ့သည့် စတုတ္ထမြောက်လွှတ်တော်အမတ်ဖြစ်လာခဲ့သည်။ပေလိုစီခရီးစဉ်အပြီး၌ ကျွန်းနိုင်ငံတစ်ဝိုက်တွင် တရုတ်ကစစ်ရေးလေ့ကျင့်မှုများပြုလုပ်ကာ ဖိအားများထပ်မံတိုးမြှင့်ခဲ့သည်။

ယနေ့အစောပိုင်းတွင် တရုတ်တိုက်လေယာဉ်နှစ်စင်းသည် ထိုင်ဝမ်ရေလက်ကြား၏အလယ်မျဉ်းကိုထပ်မံဖြတ်ကျော်ပျံသန်းခဲ့သည်ဟု ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့သည်။ဤတွင် ဖိလစ်ပိုင်၊ဗီယက်နမ်၊မလေးရှား၊ဘရူနိုင်းနှင့် ထိုင်ဝမ်တို့သည် တရုတ်ကတောင်တရုတ်ပင်လယ်သည် ၎င်း၏အပိုင်ဖြစ်သည်ဟူသော ခံယူချက်နှင့်ပတ်သက်၍ တန်ပြန်အရေးဆိုမှုများရှိနေသည်ကိုသတိပြုရမည်ဖြစ်ကြောင်းလည်း ရေးသားထားသည်။

ထို့ကြောင့် ဖိလစ်ပိုင်သည် ၎င်း၏စစ်အခြေစိုက်စခန်းများကို အမေရိကန်မှအသုံးပြုနိုင်ရန်တိုးချဲ့ပေးခြင်းသည် ၎င်း၏ကိုယ်ပိုင်အကျိုးရရှိရေးအတွက်သာဖြစ်သည့် ဆုံးဖြတ်မှုမျိုးဖြစ်သည်ဟုဆိုသည်။

Source – Wio News