ထရမ့်ပ်အစိုးရသည် နိုင်ငံပေါင်း ဒါဇင်များစွာကို ဗီဇာပိတ်ပင်ရန်စဉ်းစားနေ

ဝါရှင်တန်၊ မတ် ၁၆

ထရမ့်ပ် အစိုးရက နိုင်ငံ့တားမြစ်ချက်အသစ်၏ တစ်စိတ်တစ်ပိုင်းအနေနဲ့ ဒါဇင်နှင့်ချီသောနိုင်ငံများမှ နိုင်ငံခြားသားများအတွက် ဗီဇာ ကန့်သတ်ချက်များကို ထုတ်ပြန်ရန် စဉ်းစားနေကြောင်း အဆိုပါကိစ္စနှင့် နီးစပ်သည့် သတင်းရင်းမြစ်များနှင့် ရိုက်တာ မှ ရရှိထားသော အတွင်းရေးမှတ်စုတစ်ခုမှ ဖော်ပြထားသည်။

အဆိုပါ မှတ်တမ်းတွင် နိုင်ငံပေါင်း ၄၁ နိုင်ငံကို သီးခြားအုပ်စုသုံးစုခွဲ၍ စာရင်းပြုစုထားသည်။ အာဖဂန်နစ္စတန်၊ အီရန်၊ ဆီးရီးယား၊ ကျူးဘားနှင့် မြောက်ကိုရီယားတို့အပါအဝင် နိုင်ငံပေါင်း ၁၀ နိုင်ငံကို ပထမအုပ်စုအဖြစ် ဗီဇာကို လုံးဝ ဆိုင်းငံ့ထားမည်ဖြစ်သည်။

ဒုတိယအုပ်စုတွင် အီရီထရီးယား၊ ဟေတီ၊ လာအို၊ မြန်မာနှင့် တောင်ဆူဒန် နိုင်ငံငါးနိုင်ငံတို့သည် ခရီးသွားလာမှုဗီဇာနှင့် ကျောင်းသားဗီဇာအပြင် အခြားသော ရွှေ့ပြောင်းနေထိုင်သူများဗီဇာကိုပါ သက်ရောက်မှုရှိမည့် တစ်စိတ်တစ်ပိုင်း ဆိုင်းငံ့မှုများနှင့် ရင်ဆိုင်ရမည်ဖြစ်သည်။

တတိယအုပ်စုတွင် ဘီလာရုစ်၊ ပါကစ္စတန်နှင့် တာ့ခ်မင်နစ္စတန်တို့အပါအဝင် နိုင်ငံပေါင်း ၂၆ နိုင်ငံကို ၎င်းတို့၏ အစိုးရများက ရက် ၆၀ အတွင်း ချို့ယွင်းချက်၊လိုအပ်ချက်များကို ဖြေရှင်းရန် ကြိုးပမ်းခြင်းမပြုပါက အမေရိကန်ဗီဇာထုတ်ပေးမှုကို တစ်စိတ်တစ်ပိုင်း ဆိုင်းငံ့ထားမည်ဖြစ်ကြောင်း အဆိုပါ မှတ်တမ်းတွင် ဖော်ပြထားသည်။

အမည်မဖော်လိုသူ အမေရိကန်အရာရှိတစ်ဦးက စာရင်းတွင် အပြောင်းအလဲများ ဖြစ်နိုင်ကြောင်း အမေရိကန် နိုင်ငံခြားရေး ဝန်ကြီး မာကို ရုဘီယို အပါအဝင် အစိုးရအဖွဲ့က အတည်ပြုနိုင်ခြင်း မရှိသေးကြောင်း သတိပေးထားသည်။

အဆိုပါ လုပ်ဆောင်ချက်သည် ၂၀၁၈ ခုနှစ်တွင် အမေရိကန် တရားလွှတ်တော်ရုံးချုပ်က အတည်ပြုခဲ့သည့် သမ္မတ ဒေါ်လ်နယ်လ် ထရမ့် ၏ ပထမဆုံး သမ္မတသက်တမ်းကာလတွင် မွတ်စလင်နိုင်ငံ ခုနစ်နိုင်ငံမှ ခရီးသွားများကို တားမြစ်ပိတ်ပင်မှု အကြိမ်ကြိမ်လုပ်ဆောင်ခဲ့သည့် မူဝါဒကိုပြန်လည် အသက်သွင်းစေခဲ့သည့်ပုံစံဖြစ်သည်။

ထရမ့်က နိုင်ငံတော်လုံခြုံရေးဆိုင်ရာ အန္တရာယ်များကို ထောက်လှမ်းရန် အမေရိကန်သို့ ဝင်ရောက်လိုသည့် နိုင်ငံခြားသားများကို လုံခြုံရေး တိုးမြှင့်စစ်ဆေးရန် ဇန်နဝါရီ ၂၀ ရက်နေ့က အမိန့်ထုတ်ပြန်ခဲ့သည်။

ယင်းအမိန့်သည် မတ်လ ၂၁ ရက်မတိုင်မီ ခရီးသွားလာမှုများကို တစ်စိတ်တစ်ပိုင်း သို့မဟုတ် အပြည့်အဝ တားမြစ်ဆိုင်းငံ့သင့်သည့် နိုင်ငံစာရင်းကိုတင်ပြရန် အစိုးရအဖွဲ့ဝင်အချို့ကို ညွှန်ကြားခဲ့သည်။ ၎င်းနိုင်ငံများသည် “စစ်ဆေးမှုနှင့် စစ်ဆေးခြင်းဆိုင်ရာ အချက်အလက် အလွန်ချို့တဲ့အားနည်း သောကြောင့် ဖြစ်သည်” ဟု ထောက်ပြထားသည်။

ထရမ့် ၏ ညွှန်ကြားချက်သည် ၎င်း၏ ဒုတိယ သမ္မတသက်တမ်းအစတွင် စတင်ထုတ်ပြန်ခဲ့သော လူဝင်မှုကြီးကြပ်ရေးအတွက် တင်းကြပ်မှု၏ တစ်စိတ်တစ်ပိုင်းဖြစ်သည်။

ထရမ့်က ၂၀၂၃ ခုနှစ် အောက်တိုဘာလ မိန့်ခွန်းတွင် ၎င်း၏အစီအစဉ်ကို အကြို သုံးသပ်ခဲ့ပြီး  ဂါဇာပင်လယ်ကွေ့၊ လစ်ဗျား၊ ဆိုမာလီယာ၊ ဆီးရီးယား၊ ယီမင်နှင့် “ကျွန်ုပ်တို့၏လုံခြုံရေးကို ခြိမ်းခြောက်သည့် အခြားနိုင်ငံများ” မှ လူများကို ကန့်သတ်မည်ဟု ကတိပြုခဲ့သည်။

Ref: ရိုက်တာ