ရန်ကုန်တိုင်းဒေသကြီး၊ ဒဂုံမြို့သစ် (တောင်ပိုင်း)မြို့နယ်၊ အမှတ်(၆၃) ရပ်ကွက်၊ ဘုရားလမ်းရှိ စက္ကူစက်ရုံမှ စက္ကူကုန်ကြမ်းအမှိုက်ပုံ မီးလောင်မှုဖြစ်ပွားရာ အချိန် (၁)နာရီနီးပါးကြာ ငြှိမ်းသတ်ခဲ့ရကြောင်း မီးသတ်တပ်ဖွဲ့သတင်းများအရ သိရသည်။
ယမန်နေ့ ဖေဖော်ဝါရီ (၁၂)ရက်၊ ည (၁၀)နာရီ၊ (၃၅)မိနစ်အချိန်က အဆိုပါ စက္ကူကုန်ကြမ်း အမှိုက်ပုံ မီးလောင်မှုဖြစ်ပွားကြောင်း သတင်းအရ ဒဂုံမြိုသစ်(တောင်ပိုင်း)မြို့နယ်မီးသတ်စခန်းမှ မီးသတ်ယာဉ်များဖြင့် ထွက်ခွာငြှိမ်းသတ်ခဲ့ရကြောင်း သိရသည်။
ထို့အတူ ၎င်းမီးလောင်ပြင်သို့ YRO အဖွဲ့ဝင် အသင်း (၃) သင်းမှ လူနာတင်ယာဉ် (၄) စီး၊ စေတနာ့ ဝန်ထမ်း (၁၇) ဦးဖြင့် မြန်မာနိုင်ငံမီးသတ်တပ်ဖွဲ့နှင့် ချိတ်ဆက်ကာ မီးငြှိမ်းသတ်ရေးအတွက် ပူးပေါင်းဆောင်ရွက်ခဲ့ကြောင်း သိရသည်။
ထိုသို့ ထွက်ခွာ၍ ဝိုင်းဝန်းငြှိမ်းသတ်ခဲ့ရာ ည (၁၀)နာရီ (၅၈) မိနစ်အချိန်တွင် မီးထိန်းနိုင်ခဲ့ပြီး ည (၁၁)နာရီ (၂၃)မိနစ်အချိန်တွင် မီးငြှိမ်းသတ်နိုင်ခဲ့ကြောင်း သိရသည်။
ဖေဖော်ဝါရီ (၁၂)ရက်၊ ညနေ (၄)နာရီ (၄၁)မိနစ်အချိန်ကလည်း လှည်းကူးမြို့နယ်၊ စခန်းကြီးကျေးရွာ၊ ဖောင်ကြီးလမ်းဘေးတွင် မြက်ခြောက်မီးလောင်မှုဖြစ်ပွားရာ လှည်းကူးမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီးဖြင့် ထွက်ခွာငြှိမ်းခဲ့ရာ ညနေ (၄)နာရီ (၅၄)မိနစ်အချိန် မီးထိန်းနိုင်ခဲ့ကာ ညနေ (၄)နာရီ (၅၆)မိနစ်အချိန် မီးငြိမ်းခဲ့ကြောင်း သိရသည်။
အလားတူ ဖေဖော်ဝါရီ (၁၂)ရက်၊ ညနေ (၃)နာရီ (၅၆)မိနစ်အချိန်ကလည်း ဒဂုံမြို့သစ်(အရှေ့ပိုင်း)မြို့နယ်၊ (၅၄) ရပ်ကွက်၊ ရွာလယ်လမ်းတွင် ကိုင်းတောမီးလောင်မှုဖြစ်ပွားရာ ဒဂုံမြို့သစ်(အရှေ့ပိုင်း)မြို့နယ်မီးသတ်စခန်းမှ မီးငြှိမ်းသတ်ယာဉ်(၂)စီး ထွက်ခွာငြှိမ်းသတ်ခဲ့ရာ ည (၆)နာရီ (၁၄)မိနစ်အချိန် မီးထိန်းနိုင်ခဲ့ပြီး ည (၆)နာရီ (၃၈)မိနစ်အချိန် မီးငြှိမ်းသတ်နိုင်ခဲ့ကြောင်း သိရသည်။
ပွင့်လင်းရာသီ ရောက်ရှိလာသည်နှင့်အမျှ ရန်ကုန်မြို့တွင် မီးလောင်မှုများလည်း ခပ်စိပ်စိပ် ဖြစ်ပေါ်လျက်ရှိရာ အဆိုပါ မီးလောင်မှုများတွင် အမှိုက်ပုံ မီးလောင်မှုများ၊ မြက်ခြောက်နှင့် ကိုင်းတောမီးလောင်မှုများလည်း မကြာခဏ ဖြစ်ပေါ်လျက်ရှိကြောင်း သတင်းများအရ သိရသည်။