တောင်တရုတ်ပင်လယ်တင်းမာမှုပြေလည်ရေး ဗီယက်နမ်နှင့် မလေးရှား ကြိုးပမ်း

နှစ်နိုင်ငံ ရေပိုင်နက်အငြင်းပွားမှုနှင့်ပတ်သက်၍ တင်းမာမှုများမြင့်တက်ခဲ့ပြီးနောက် ဆက်ဆံရေးကို မြှင့်တင်ရန်နှင့် တောင်တရုတ်ပင်လယ်ဒေသတွင် ငြိမ်းချမ်းရေး ကို ထိန်းသိမ်းရန်အတွက် ပိုမိုနီးကပ်စွာ ပူးပေါင်းဆောင်ရွက်ရန် ဗီယက်နမ်နှင့် မလေးရှားနိုင်ငံတို့ သဘောတူညီခဲ့ကြသည်။

“တောင်တရုတ်ပင်လယ်တွင် ငြိမ်းချမ်းရေး၊ လုံခြုံရေး၊ တည်ငြိမ်ရေး၊ ဘေးကင်းရေးနှင့် လွတ်လပ်စွာ ရေကြောင်းသွားလာရေးနှင့် ပျံသန်းရေးကို ထိန်းသိမ်းရန်နှင့် အငြင်းပွားမှုများကို ငြိမ်းချမ်းစွာဖြေရှင်းရေးကိုမြှင့်တင်ဆောင်ရွက်ရန် နှစ်နိုင်ငံခေါင်းဆောင်များ ကတိပြုခဲ့သည်” ဟု ပူထရာဂျာယာတွင် မလေးရှားဝန်ကြီးချုပ် အန်ဝါအီဘရာဟင်နှင့် ပူးတွဲသတင်းစာရှင်းလင်းပွဲ၌ ဗီယက်နမ်ပါတီအကြီးအကဲ တိုလမ်က ပြောဆိုခဲ့သည်။

ငါးဖမ်းလုပ်ငန်းတွင် ပူးပေါင်းဆောင်ရွက်ရေး ဖြစ်နိုင်ခြေကို ဆန်းစစ်၍ ယုံကြည်မှုနှင့် ချစ်ကြည်ရင်းနှီးမှုကို အခြေခံကာ အမှန်တကယ်အလုပ်လုပ်နိုင်စေရန် သဘောတူခဲ့သည်ဟု အန်ဝါက ပြောဆိုခဲ့သည်။

ပြိုင်ဆိုင်မှုပြင်းထန်သော တောင်တရုတ်ပင်လယ်တွင် နိုင်ငံများစွာ၏ ရေပိုင်နက်သတ်မှတ်ချက်များသည် ထပ်နေခဲ့သည်။ စပရက်တ်လေကျွန်းစုတွင် ဗီယက်နမ်၏ ကျွန်းတည်ဆောက်မှုအစီအစဉ်နှင့် ပတ်သက်၍ မလေးရှားသည် မကြာခင်က ရှားရှားပါပါး ကန့်ကွက်ခဲ့သည်ဟု ရိုက်တာသတင်းဖော်ပြချက်အရ သိရသည်။

ယင်းရေပြင်သည် တရုတ်၊ ဘရူနိုင်း၊ ထိုင်ဝမ်နှင့် ဖိလစ်နိုင်ငံတို့လည်းပါဝင်သည့် ကာလကြာရှည် ပိုင်နက်အငြင်းပွားမှု၏ ဗဟိုချက်နေရာဖြစ်သည်။

Ref: ဘန်ကောက်ပို့စ်