ဆိုးလ်၊ဒီဇင်ဘာ ၃
တောင်ကိုရီးယားသမ္မတယွန်းဆော့ယော်က နိုင်ငံတွင်းအရေးပေါ်စစ်အုပ်ချုပ်ရေးကိုယနေ့ထုတ်ပြန်ကြေငြာလိုက်ကြောင်းသိရသည်။
ယခုလိုအရေးပေါ်အခြေအနေထုတ်ပြန်ရခြင်းမှာ တောင်ကိုရီးယားအတွင်းရှိ မြောက်ကိုရီးယားလိုလားသူများ၏ ခြိမ်းခြောက်မှုအန္တရာယ်ကြောင့်ဖြစ်သည်ဟုလည်း၎င်းကဆိုခဲ့သည်။
စစ်အုပ်ချုပ်ရေးကြေငြာခြင်းသည် တောင်ကိုရီးယား၌ ၁၉၈၀ ခုနှစ်နောက်ပိုင်း ပထမဆုံးအကြိမ်အဖြစ်ကြေငြာခြင်းလည်းဖြစ်သည်။
ယခုကြေငြာချက်အရ ပါလီမန်နှင့် နိုင်ငံရေးပါတီများ၏လှုပ်ရှားမှုများကို ပိတ်ပင်မည်ဖြစ်ပြီး မီဒီယာများနှင့်ထုတ်ဝေသူများသည် စစ်အုပ်ချုပ်ရေးအမိန့်အောက်တွင် ရှိနေရမည်ဖြစ်ကြောင်းလည်း စစ်တပ်၏ထုတ်ပြန်ချက်ကိုကိုးကား၍ယွန်ဟပ်သတင်းဌာနကဖော်ပြခဲ့သည်။
စစ်အုပ်ချုပ်ရေးကြေငြာလိုက်ခြင်းကြောင့် နိုင်ငံတစ်ဝန်းရုတ်ရုတ်သဲသဲဖြစ်သွားသလို ကိုရီးယားဝမ်ငွေတန်ဖိုးသည်လည်း ကန်ဒေါ်လာနှင့်ယှဉ်ပါကသိသိသာသာထိုးကျသွားခဲ့သည်။အဆိုပါအခြေအနေကြောင့် လိုအပ်ပါက ဈေးကွက်တည်ငြိမ်ရေးအတွက် ဗဟိုဘဏ်ကလည်းအစီအမံများချမှတ်နေကြောင်းပြောကြားခဲ့သည်။
သမ္မတယွန်က ၎င်းအနေဖြင့် အရှက်မဲ့သည့် မြောက်ကိုရီးယားလိုလားသူအင်အားစုများကို ထိထိရောက်ရောက်ကိုင်တွယ်သွားမည်ဟုလည်းဆိုခဲ့သည်။ယခုကိစ္စနှင့်ပတ်သက်၍ မှတ်ချက်ပေးရန်တောင်းဆိုချက်အား အိမ်ဖြူတော်ဘက်ကချက်ချင်းတုန့်ပြန်ခြင်းမရှိပေ။
မြောက်ကိုရီးယားရန်မှကာကွယ်ရန် အမေရိကန်တပ်ဖွဲ့ဝင် ၂၈,၅၀၀ ခန့်သည် ယခင်ကတည်းက တောင်ကိုရီးယား၌ တပ်စွဲထားပြီးဖြစ်ကာ ယခုအခြေအနေနှင့်ပတ်သက်၍ အမေရိကန်စစ်တပ်၏ ပြောရေးဆိုခွင့်ရှိသူအား ဖုန်းဖြင့်အကြိမ်ကြိမ်ဆက်သွယ်ခဲ့သော်လည်း ပြန်လည်ဖြေကြားခြင်းမရှိခဲ့ပေ။
သမ္မတယွန်၏ယခုဆုံးဖြတ်ချက်အား ၎င်း၏ပါတီဝင်အချို့အပါအဝင် အတိုက်အခံပါတီခေါင်းဆောင်များက အပြင်းအထန်ကန့်ကွက်ခဲ့ကြသည်။
Source : သည်ဂါးဒီးယန်း