နေပြည်တော်၊ ရန်ကုန်၊ မန္တလေး အပါအဝင် တိုင်းနှင့် ပြည် နယ်အနှံ့တို့တွင် လာမည့်ဖေဖော်ဝါရီ (၂၇)ရက်အထိ အချိန်အခါမဟုတ် မိုးရွာသွန်းနိုင်သေးကြောင်း မိုးလေဝသနှင့် ဇ လဗေဒ ညွှန်ကြားမှုဦးစီးဌာနမှ ယနေ့ ဖေဖော်ဝါရီ (၂၄) ရက်၊ ည(၆)နာရီအချိန် ထုတ်ပြန်ချက်အရ သိရသည်။
ယနေ့မြန်မာစံတော်ချိန် ညနေ (၅)နာရီအချိန် တိုင်းထွာချက်များအရ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ လေနွေးများနှင့် တရုတ်ပြည်မကြီးပေါ်ရှိ လေဖိအားကြီးရပ်ဝန်းဒေသမှ ရွေ့လျားလာသော လေအေးများတွေ့ဆုံမှုအနောက်ဘက်မှ ရွေ့လျားလာသော လေပွေလှိုင်းများ၏ အရှိန်တို့ကြောင့်နှင့် အရှေ့ဘက်မှ ရွေ့လျားလာသော လေပွေလှိုင်းများ၏ အရှိန်တို့ကြောင့်လည်းကောင်း မိုးထစ်ချုန်းရွာသွန်းနိုင်ကြောင်း မိုး/ဇလက ထုတ်ပြန်အသိပေးထားသည်။
ထို့ကြောင့် ဖေဖော်ဝါရီ (၂၇)ရက်အတွင်း နေပြည်တော်၊ ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်နှင့် ရှမ်းပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာသွန်းနိုင်ကြောင်း မိုး/ဇလက ထုတ်ပြန်ထားသည်။
ထို့ပြင် မန္တလေးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီးအထက်ပိုင်း၊ ချင်းပြည်နယ်နှင့် ရခိုင်ပြည်နယ်တို့တွင် နေရာကွက်ကျား မိုးထစ်ချုန်းရွာနိုင်ကြောင်း သိရသည်။
အချိန်အခါမဟုတ်မိုးရွာခြင်းနှင့်အတူ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်သဖြင့် ကြိုတင်သတိပြုနိုင်ရန်လည်း မိုး/ဇလက အကြံပြုထားသည်။
ထို့အတူ ရန်ကုန်တိုင်းဒေသကြီး၊ မြို့တွင်း မြို့နယ်များနှင့် ဆင်ခြေဖုံး မြို့နယ်များအပါအဝင် ရန်ကုန်စည်ပင်သာယာနယ်နမိတ်အတွင်းရှိ နေရာအနှံ့အပြားနီးပါးတွင် ယနေ့ ဖေ ဖော်ဝါရီ (၂၄)ရက်၊ နေ့လယ် (၁) နာရီ ဝန်းကျင်မှ စတင်ကာ မိုးသည်းထန်စွာ ရွာသွန်းပြီး ၊ လျှပ်စီးလက်ခြင်း၊ မိုးခြိမ်းခြ င်း၊ မိုးကြိုးပစ်ခြင်းနှင့် လေပြင်းတိုက်ခတ်ခြင်းများ ဖြစ်ပေါ်ခဲ့ကြောင်း မြို့နေပြည်သူများထံမှ စုံစမ်းသိရသည်။