လေကြောင်းတိုက်ခိုက်ခံရနိုင်ခြေများနေသည်ဆိုသော တိကျသည့်သတင်းအချက်အလက်များကြောင့် ယူကရိန်းနိုင်ငံ ကိဗ်မြို့တော်ရှိ အမေရိကန်သံရုံးကို ဗုဒ္ဓဟူးနေ့တွင် ပိတ်ခဲ့ပြီး ယူကရိန်းရောက် အမေရိကန်နိုင်ငံသားများအနေဖြင့် ခိုလှုံစရာနေရာများ အမြန်ရှာထားရေး အတွက်အသင့်ပြင်ကြရန် တိုက်တွန်းခဲ့သည်။
စစ်ပွဲ ရက် ၁,၀၀၀ ပြည့်တွင် ရာထူးမှ ဆင်းပေးရတော့မည့် အမေရိကန်သမ္မတ ဂျိုးဘိုင်ဒင်အစိုးရအဖွဲ့ထံမှ ခွင့်ပြုချက်အသစ်ကို အခွင့်ကောင်းယူ၍ ယူကရိန်းက ရုရှားပိုင်နက်အတွင်းသို့ အမေရိက၏ ATACMS ဒုံးကျည်များသုံးကာ တိုက်ခိုက်ခဲ့အပြီး တစ်ရက်အကြာတွင် ယခုကဲ့သို့ ထူးခြားသော သတိပေးချက် ထွက်လာခြင်းဖြစ်သည်။
“သတိကြီးစွာထား၍ သံရုံးကို ပိတ်မည်ဖြစ်ကာ သံရုံးဝန်ထမ်းများကိုလည်း လုံခြုံရာတွင် နေထိုင်ရန် ညွှန်ကြားထားသည်” ဟု အမေရိကန်သံရုံး၏ ဝက်ဘ်ဆိုက်ပေါ်တွင် ထုတ်ပြန်ချက်၌ အမေရိကန်နိုင်ငံခြားရေးဝန်ကြီးဌာန ကောင်စစ်ရေးရာဌာနက ပြောကြားခဲ့သည်။
ထို့အပြင် လေကြောင်း သတိပေးချက်ထုတ်ပြန်သည့် အခြေအနေတွင် အမေရိကန်နိုင်ငံသားများအနေဖြင့် ပုန်းခိုစရာနေရာအတွက် ချက်ချင်းပြင်ဆင်ထားကြရန်လည်း အမေရိကန်သံရုံးက အကြံပြုထားသည်ဟု ဆိုခဲ့သည်။
ရုရှားသည် တနင်္ဂနွေနေ့တွင် ယူကရိန်းဓါတ်အားလိုင်းများကို ဒုံးကျည်အစင်း ၁၂၀၊ ဒရုန်းစင်းရေ ၉၀ တို့ဖြင့် တိုက်ခိုက်ခဲ့မှုကြောင့် ဓါတ်အားပေးစနစ် ပျက်ဆီးခဲ့ကာ လူ ၇ ဦးေ-သဆုံးခဲ့သည်။ ယင်းတိုက်ခိုက်မှုကြောင့် ချည့်နဲ့နဲ့ဖြစ်နေသော စွမ်းအင်ကွန်ရက်၏ တာရှည်ခံနိုင်မှုအပေါ် စိုးရိမ်မှုအသစ်များဖြစ်စေခဲ့သည်။
Ref: Investing.com