ရှမ်းပြည်နယ်အရှေ့ပိုင်း ထိုင်း – မြန်မာနယ်စပ်ရှိ တာချီလိတ် – မယ်ဆိုင် ချစ်ကြည်ရေးတံတားကို ယခုလအတွင်း ပြန်လည်ဖွင့်လှစ်သွားမည်ဟု သတင်း ထွက်ပေါ်နေကြောင်း ဒေသခံများထံက သိရသည်။
အဆိုပါ တာချီလိတ် – မယ်ဆိုင်တံတားကို ကိုဗစ်ကာကွယ်ရေးအစီအမံများဖြင့် ပိတ်ထားခြင်းဖြစ်ကာ ယခုပြန်လည်ဖွင့်လှစ်နိုင်ရန် စီစဉ်နေခြင်းဖြစ်သည်။
ကိုဗစ်(၁၉)ရောဂါအခြေအနေကြောင့် ယာယီပိတ်ထားသည်မှာ ၃ နှစ်နီးပါးကြာမြင့်ခဲ့ပြီး တာချီလိတ်-မယ်ဆိုင် ချစ်ကြည်ရေးတံတားအမှတ်(၁)ပြန်လည်ဖွင့်လှစ်မည့်ရက်ကိုမူ အတိအကျ သတ်မှတ်ထားခြင်းမရှိသေးကြောင်း သိရသည်။
“တံတားကဘယ်နေ့မှပြန်ဖွင့်မယ်ဆိုတာတော့မသိဘူး မယ်ဆိုင်ဘက်ခြမ်းမှာတော့ နယ်စပ်ဝင်ထွက်တာနဲ့သက်ဆိုင်တဲ့ ဌာနဆိုင်ရာရုံးတွေ တံတားပေါ်တွေကို သန့်ရှင်းရေးခနခနလုပ်နေတာတွေ့တယ် မြန်မာနိုင်ငံဘက်ကတော့ လတ်တလောဒီအတိုင်းပဲရှိသေးတယ်”ဟု တာချီလိတ်မြို့ခံတစ်ဦးကပြောသည်။
” ၂၂ ရက်နေ့ ပြန်ဖွင့်မယ်လိုတော့ ကြားတယ်။ ဟိုဖက်အခြမ်းကတော့ ပြင်ဆင်မှုတွေ လုပ်နေပြီ။ ဒီဖက်ကတော့ ဘာမှလုပ်တာ မတွေ့ရသေးဘူး” ဟု တာချီလိတ်မြို့ခံ တစ်ဦးက ပြောသည်။
အဆိုပါ တာချီလိတ် – မယ်ဆိုင် ချစ်ကြည်ရေးတံတား အမှတ်(၁) အား ပြန်လည်ဖွင့်လှစ်နိုင်ရန် ပြီးခဲ့သည့် ၂၀၂၂ ခုနှစ် နှစ်လည်ပိုင်းကပင် နှစ်နိုင်ငံ တာဝန်ရှိသူများ တွေ့ ဆုံကာ ညှိနှိင်းမှုများ ပြုလုပ်ခဲ့သော်လည်း လက်ရှိအချိန်ထိ ပြန်လည်ဖွင့်လှစ်နိုင်ခြင်း မရှိသေးခြင်း ဖြစ်သည်။
တာချီလိတ်-မယ်ဆိုင်ချစ်ကြည်ရေးတံတားအမှတ်(၁)ပြန်လည်ဖွင့်လှစ်နိုင်ရန် ဇန်နဝါရီ ၁၁ ရက်က ချင်းရိုင်ခရိုင်အုပ်ချုပ်ရေးမှူးမှ တာချီလိတ်ခရိုင်အုပ်ချုပ်ရေးမှူးထံသို အကြောင်းကြားစာပေးပို့ထားကြောင်း သိရသည်။
မြန်မာ-ထိုင်း နှစ်နိုင်ငံကုန်စည်စီးဆင်းမှုပြန်လည်ပြုလုပ်နိုင်ရန်နှင့်ခရီးသွားများဝင်ထွက်သွားလာနိုင်ရန် ရည်ရွယ်၍ တာချီလိတ်-မယ်ဆိုင် ချစ်ကြည်ရေးတံတားအမှတ်(၁)အား ပြန်လည်ဖွင့်လှစ်ရန် ချင်းရိုင်ခရိုင်အုပ်ချုပ်ရေးမှူးမှ အကြောင်းကြားစာပေးပိုခဲ့ခြင်းဖြစ်ကြောင်း သိရသည်။
“တံတားဖွင့်ဖို့ ကို ချင်းရိုင်ခရိုင်အုပ်ချုပ်ရေးမှူးက စာပို့ထားတယ်လို့ကြားတာပဲ ၂၂ ရက်နေ့လောက်ကိုပြန်ဖွင့်နိုင်ဖို့ လုပ်နေတယ်လို့လည်း သိထားတယ် ဘယ်လိုအခြေအနေဖြစ်မယ်ဆိုတာတော့ မသိဘူး မြန်မာနိုင်ငံဘက်ကတော့ ဌာနဆိုင်ရာတွေကလည်း တံတားပြန်ဖွင့်ဖို့ ကိစ္စကိုဘာမှမပြောသေးဘူး သန့်ရှင်းရေးလုပ်တာလည်း မတွေ့ရသေးဘူး”ဟု တာချီလိတ် မြို့
ခံတစ်ဦးကပြောသည်။
(၃) နှစ်ကြာ ပိတ်ထားသည့် ထိုင်း – မြန်မာနယ်စပ်ရှိ နှစ်နိုင်ငံ ချစ်ကြည်ရေး တံတားများထဲမှ မြဝတီ – မဲဆောက် ချစ်ကြည်ရေးတံတားအမှတ်(၁)ကို ယမန်နေ့ ဇန်နဝါရီ (၁၂) ရက် နံနက်ပိုင်းက ပြန်လည် ဖွင့်လှစ်ပေးလိုက်ပြီ ဖြစ်သည့်အတွက် တာချီလိတ် – မယ်ဆိုင် တံတားကိုလည်း ပြန်လည်ဖွင့်လှစ်ပေးရန် ဒေသခံများက လိုလားနေခြင်းလည်း ဖြစ်သည်။
” ဖွင့်လိမ့်မယ်လိုတော့ ထင်တယ်။ဘာဖြစ်လို့လဲဆိုတော့ ဒီမှာက မြဝတီဖက်လောက်လည်း အခြေအနေမဆိုးဘူးလေ။ ထိုင်းကလည်း ခရီးသွား လုပ်ငန်းကို တအား လုပ်နေတာဆိုတော့ အဆင်ပြေအောင် ညှိလိမ့်မယ်လို့ ထင်ပါတယ်။ ဒေသခံတွေကတော့ ပြန်ဖွင့်စေချင်တာပေါ့ ” ဟု တာချီလိတ်မြို့ခံ တစ်ဦးက ပြောသည်။
ယခင် တံတားဖွင့်လှစ်စဉ်က နှစ်နိုင်ငံ နယ်စပ်ဖြစ်ကျော်ခွင့်အနေဖြင့် တစ်ပတ်ခံ Border Pass ဖြင့် မယ်ဆိုင် ဧရိယာအတွင်းသို့ သွားရောက်လည်ပတ်နိုင်ပြီး ယခု ပြန်လည် ဖွင့်လှစ်မည်ဆိုပါက မည်သည့် စည်းကမ်းချက်များ သတ်မှတ်မည်ကို မသိရှိရသေးကြောင်းလည်း ဒေသခံများက ဆိုသည်။
ယမန်နေ့က ပြန်လည်ဖွင့်လှစ်လိုက်သည့် မြဝတီ – မဲဆောက် ချစ်ကြည်ရေးတံတားတွင် နယ်စပ်ဖြတ်ကျော်ခွင့်အနေဖြင့် မြန်မာနိုင်ငံသားများမှာ မဲဆောက် ဧရိယာအတွင်း နံနက် (၆) နာရီမှ ည (၆) နာရီအထိ သွားလာနိုင်မည်ဖြစ်ပြီးထိုင်းနိုင်ငံဖက်ခြမ်းမှ လာရောက်မည့်သူများမှာ မြဝတီ ဧရိယာအတွင်း ည(၆) နာရီအထိ နေထိုင်ခွင့်ပြုထားကြောင်း ဒေသခံများ၏ ပြောကြားချက်များအရ သိရသ ည်။
ထိုင်းနယ်စပ် မြဝတီ-မဲဆောက်ချစ်ကြည်ရေးတံတားအမှတ်(၁)အား ပြန်လည်ဖွင့်လှစ်ခဲ့ပြီးဖြစ်၍ တာချီလိတ်-မယ်ဆိုင် ချစ်ကြည်ရေးတံတားအမှတ်(၁)အား အမြန်ဆုံးပြန်လည်ဖွင့်လှစ်ရန် တာချီလိတ်မြို့ခံများက ဆန္ဒရှိနေကြောင်း သိရသည်။
Photo -CJ
