တရုတ်-ရုရှား နှစ်နိုင်ငံ ကုန်သွယ်မှုအားကောင်းစေရန် နယ်စပ်ဖြတ်ကျော် တံတားအသစ်အား ဖွင့်လှစ်
ရုရှား-ယူကရိန်းအရေးနှင့်ပတ်သက်၍ ရုရှားအပေါ် အနောက်နိုင်ငံများ၏ ပိတ်ဆို့အရေးယူများ အရှိန်မြှင့်လုပ်ဆောင်လာသောကြောင့် ရုရှားနှင့် တရုတ်တို့သည် ၎င်းတို့၏ ကုန်သွယ်မှု ပိုမိုအားကောင်းလာစေရန် ရည်ရွယ်၍ နယ်စပ်ဖြတ်ကျော်တံတားအသစ်အားသောကြာနေ့ (ဇွန် ၁၀)က အရှေ့ဖျားဒေသ၌ ဖွင့်လှစ်လိုက်ပြီဖြစ်ကြောင်း ကြေငြာခဲ့သည်။
အဆိုပါတံတားသည် ဟေးလုံကျန်း(Heilongjiang) ခေါ် အမောရ်(Amur) မြစ်ကို ဖြတ်၍ ရုရှားနိုင်ငံ ဘလာဂိုဗက်ရှ်ချင့်ခ်(Blagoveshchensk) မြို့နှင့် တရုတ်နိုင်ငံ ဟေးဟဲ(Heihe) မြို့ကို ဆက်သွယ်ထားပြီး အရှည် ၁ ကီလိုမီတာ (၃၂၈၀ ပေ) ရှည်လျား၍ ဒေါ်လာ ၃၄၂ သန်း ကုန်ကျကြောင်း RIA သတင်းဌာန၏ သောကြာနေ့တွင် ဖော်ပြချက်အရ သိရသည်။
ဖေဖော်ဝါရီလ ယူကရိန်း စစ်ပွဲမစခင်၌ တရုတ်နှင့် ရုရှားတို့သည် အချင်းချင်းနယ်စည်းမခြား စီးပွားရေး ပါတနာ များအဖြစ် ကြေညာခဲ့ပြီး ၎င်းတံတားသည် နှစ်နိုင်ငံကြား ကုန်သွယ်မှု မြှင့်တင်ခြင်းဖြင့် နှစ်နိုင်ငံဆက်ဆံရေးအား ပိုမိုအားကောင်းလာစေမည်ဖြစ်ကြောင်း ရုရှားအာဏာပိုင်များက ပြောကြားခဲ့သည်။
တရုတ်ဒုတိယဝန်ကြီးချုပ် ဟူချွင်ဟွာက အဖွင့်အမှာစကားအနေဖြင့် တရုတ်နိုင်ငံသည် ရုရှားနှင့် နယ်ပယ်အားလုံး၌ လက်တွေ့ကျသော ပူးပေါင်းဆောင်ရွက်မှုများကို နက်ရှိုင်းစွာ လုပ်ဆောင်လိုကြောင်း ပြောကြားခဲ့သည်။
ရုရှားနိုင်ငံ သယ်ယူပို့ဆောင်ရေးဝန်ကြီး ဗီတာလီ ဆာဗလီဗ် က အဆိုပါတံတားသည် နှစ်နိုင်ငံကြား နှစ်စဉ်ကုန်သွယ်မှု ကုန်စည်တန်ချိန်အား တစ်သန်းကျော် အထိမြှင့်တင်နိုင်မည်ဖြစ်ကြောင်း ပြောကြားခဲ့သည်။
ယင်းတံတားအား ၂၀၁၆ ခုနှစ်ကတည်းက စတင်တည်ဆောက်ခဲ့ကာ ၂၀၂၀ ခုနှစ် မေလ ၌ ဆောက်လုပ်ပြီးစီးခဲ့သော်လည်း ကိုဗစ်-၁၉ ကပ်ရောဂါ ကန့်သတ်ချက်များကြောင့် ယခုကဲ့သို့ ဖွင့်ပွဲ နောက်ကျခဲ့ရခြင်းဖြစ်ကြောင်း ရုရှားတံတားတည်ဆောက်ရေး ကုမ္ပဏီ BTS-MOSTမှ ပြောကြားခဲ့သည်။
Source: Aljazeera
