တရုတ်နဲ့ ရုရှားတို့ဟာ တောင်တရုတ်ပင်လယ်ဒေသမှာ ကျည်အစစ်အသုံးပြုတဲ့ ရေတပ်စစ်ရေးလေ့ကျင့်မှုတွေ စတင်လိုက်တယ်လို့ နိုင်ငံပိုင် ဂလိုဘယ်တိုင်းမ်သတင်းစာက အင်္ဂါနေ့မှာ သတင်းဖော်ပြပါတယ်။ အမေရိကန်ရဲ့ ပိတ်ဆို့ဒဏ်ခတ်မှုတွေ ၂ နိုင်ငံစလုံး ကြုံခဲ့ရအပြီးမှာ တရုတ်နဲ့ရုရှားတို့ဟာ စစ်ရေးနဲ့ ကုန်သွယ်ရေးဆိုင်ရာ ဆက်ဆံမှုတွေ အားကောင်းလာခဲ့ပါတယ်။
သုံးရက်ကြာ စစ်ရေးလေ့ကျင့်မှုအတွက် နှစ်နိုင်ငံမှ အနည်းဆုံး စစ်သင်္ဘော သုံးစင်းစီ ဖြန့်ကျက်သွားမှာဖြစ်တယ်လို့ တရုတ်ပြည်သူ့လွတ်မြောက်ရေးတပ်မတော် ရေတပ်ကို ကိုးကားပြီး သတင်းစာက ဖော်ပြခဲ့ပါတယ်။ မြောက်ပစိဖိတ် ရေပြင်မှာ ၂ နိုင်ငံ ရေတပ်တွေ ပူးတွဲ ကင်းလှည့်မှုဆောင်ရွက်ခဲ့ပြီးနောက်မှာ ယခု စစ်ရေးလေ့ကျင့်မှုကို စတင်လိုက်တာလည်းဖြစ်ပါတယ်။
အဆိုပါ စစ်ရေးလေ့ကျင့်မှုတွေမှာ စစ်ရေယာဉ် စုဖွဲ့လေ့ကျင့်မှု၊ ကျည်အစစ်သုံး ပစ်ခတ်လေ့ကျင့်မှု၊ ကင်းထောက်ခြင်း၊ တင်ကြိုသတိပေးမှုလုပ်ခြင်း၊ ရှာဖွေ ကယ်ဆယ်ရေးနဲ့ လေကြောင်းရန်ကာကွယ်ရေးဆိုင်ရာ လေ့ကျင့်မှုတွေ ပါဝင်မယ်လို့ တရုတ်တပ်မတော် PLA က ပြောဆိုကြောင်း အင်္ဂါနေ့ညပိုင်းသတင်းမှာ ဂလိုဘယ်တိုင်းမ်က ဖော်ပြခဲ့ပါတယ်။
တရုတ်-ရုရှား ပူးတွဲကင်းလှည့်မှုဟာ လမ်းကြောင်းစုံနဲ့ နယ်ပယ်စုံမှာ နှစ်နိုင်ငံအကြား နက်ရှိုင်းပြီး လက်တွေ့ကျသော ပူးပေါင်းဆောင်ရွက်မှုကို မြှင့်တင်ပေးတယ်လို့ PLA ရေတပ်ရဲ့ တောင်ပိုင်းစစ်ဒေသဆိုင်ရာ တာဝန်ရှိသူ Wang Guangzheng က စီစီတီဗီ သတင်းဋ္ဌာနကို ပြောဆိုခဲ့ပါတယ်။ ပင်လယ်ရေကြောင်း လုံခြုံရေးဆိုင်ရာ ခြိမ်းခြောက်မှုတွေကို ပူးတွဲတုန့်ပြန်ရာမှာ နှစ်ဖက်စလုံးရဲ့ စွမ်းဆောင်ရည်ကို ထိရောက်အားကောင်းစေတယ်လို့လည်း ၎င်းက ဆိုခဲ့ပါတယ်။
စစ်ရေးလေ့ကျင့်မှုမှာ ပါဝင်မယ့် စစ်သင်္ဘောတွေဟာ နိုင်ငံတောင်ပိုင်း ကွမ်တုံပြည်နယ် Zhanjiang ဆိပ်ကမ်းကနေ တနင်္လာနေ့မှာ ထွက်ခွာသွားခဲ့တယ်လို့ PLA ရဲ့ ထုတ်ပြန်ချက်မှာဖော်ပြကြောင်း သတင်းစာက ဆိုပါတယ်။
စစ်ရေးလေ့ကျင့်မှုလုပ်ဆောင်မယ့် ရေလမ်းကြောင်းနဲ့ ပတ်သက်လို့တော့ သတင်းမှာ တိတိကျကျ ဖော်ပြထားခဲ့ခြင်း မရှိပါဘူး။
Ref: Asia One
